פסחים קו:

הַנּוֹטֵל יָדָיו לֹא יְקַדֵּשׁ אֲמַר לְהוּ רַב יִצְחָק בַּר שְׁמוּאֵל בַּר מָרְתָא אַכַּתִּי לָא נָח נַפְשֵׁיהּ דְּרַב שְׁכַחְנִינְהוּ לִשְׁמַעְתְּתֵיהּ זִמְנִין סַגִּיאִין הֲוָה קָאֵימְנָא קַמֵּיהּ דְּרַב זִימְנִין דַּחֲבִיבָא עֲלֵיהּ רִיפְתָּא מְקַדֵּשׁ אַרִיפְתָּא זִימְנִין דַּחֲבִיבָא לֵיהּ חַמְרָא מְקַדֵּשׁ אַחַמְרָא

אָמַר רַב הוּנָא אָמַר רַב טָעַם אֵינוֹ מְקַדֵּשׁ בְּעָא מִינֵּיהּ רַב חָנָא בַּר חִינָּנָא מֵרַב הוּנָא טָעַם מַהוּ שֶׁיַּבְדִּיל אֲמַר לֵיהּ אֲנִי אוֹמֵר טָעַם מַבְדִּיל וְרַב אַסִּי אָמַר טָעַם אֵינוֹ מַבְדִּיל

רַב יִרְמְיָה בַּר אַבָּא אִיקְּלַע לְבֵי רַב אַסִּי אִישְׁתְּלִי וְטָעִים מִידֵּי הַבוּ לֵיהּ כָּסָא וְאַבְדֵּיל אֲמַרָה לֵיהּ דְּבֵיתְהוּ וְהָא מָר לָא עָבֵיד הָכִי אֲמַר לַהּ שִׁבְקֵיהּ כְּרַבֵּיהּ סְבִירָא לֵיהּ

אָמַר רַב יוֹסֵף אָמַר שְׁמוּאֵל טָעַם אֵינוֹ מְקַדֵּשׁ טָעַם אֵינוֹ מַבְדִּיל וְרַבָּה אָמַר רַב נַחְמָן אָמַר שְׁמוּאֵל טָעַם מְקַדֵּשׁ וְטָעַם מַבְדִּיל