חולין קיב.

דְּאַגַּב חוּרְפֵּיהּ בָּלַע אֲבָל קִישּׁוּת גָּרֵיר לְבֵי פְסָקֵיהּ וְאָכֵיל

קִילְחֵי דְּלִיפְתָּא שְׁרֵי דְּסִילְקָא אֲסִירי וְאִי פְּתַךְ בְּהוּ דְּלִיפְתָּא שַׁפִּיר דָּמֵי

בְּעָא מִינֵּיהּ רַב דִּימִי מֵרַב נַחְמָן מַהוּ לְאַנּוֹחֵי כַּדָּא דְמִלְחָא גַּבֵּי כַּדָּא דְכַמְכָּא אֲמַר לֵיהּ אָסוּר דְּחַלָּא מַאי אֲמַר לֵיהּ שְׁרֵי

וּמַאי שְׁנָא לְכִי תֵּיכוּל עֲלַהּ כּוֹרָא דְמִלְחָא מַאי טַעְמָא הַאי אִיתֵיהּ [לְ]אִיסּוּרָא בְּעֵינֵיהּ וְהַאי לֵיתֵיהּ [לְ]אִיסּוּרָא בְּעֵינֵיהּ

הָהוּא בַּר גּוֹזָלָא דִּנְפַל לְכַדָּא דְּכַמְכָּא שַׁרְיֵיהּ רַב חִינָּנָא בְּרֵיהּ דְּרָבָא מִפַּשְׁרוּנְיָא אָמַר רָבָא מַאן חַכִּים לְמִישְׁרֵי כִּי הַאי גַוְונָא אִי לָאו רַב חִינָּנָא בְּרֵיהּ דְּרָבָא מִפַּשְׁרוּנְיָא קָסָבַר כִּי אָמַר שְׁמוּאֵל מָלִיחַ הֲרֵי הוּא כְּרוֹתֵחַ הָנֵי מִילֵּי הֵיכָא דְּאֵינוֹ נֶאֱכָל מֵחֲמַת מִלְחוֹ אֲבָל הַאי כּוּתָּחָא הֲרֵי נֶאֱכָל מֵחֲמַת מִלְחוֹ

וְהָנֵי מִילֵּי חַי אֲבָל צָלִי בָּעֵי קְלִיפָה וְאִי אִית בֵּיהּ פִּילֵי כּוּלֵּיהּ אָסוּר וְאִי מְתַבַּל בְּתַבְלִין כּוּלֵּיהּ אָסוּר

אָמַר רַב נַחְמָן אָמַר שְׁמוּאֵל כִּכָּר שֶׁחָתַךְ עָלֶיהָ בָּשָׂר אָסוּר לְאׇכְלָהּ וְהָנֵי מִילֵּי דְּאַסְמֵיק וְהָנֵי מִילֵּי דְּאַבְרְיֵהּ וְהָנֵי מִילֵּי דְּאַסְמְכֵיהּ אֲבָל קְלִישְׁתָּא לֵית לַן בַּהּ

שְׁמוּאֵל שָׁדֵי לֵיהּ לְכַלְבֵּיהּ רַב הוּנָא יָהֵיב לֵיהּ לְשַׁמָּעֵיהּ מָה נַפְשָׁךְ אִי שְׁרֵי לְכוּלֵּי עָלְמָא שְׁרֵי אִי אֲסִיר לְכוּלֵּי עָלְמָא אֲסִיר שָׁאנֵי רַב הוּנָא דַּאֲנִינָא דַּעְתֵּיהּ רָבָא אָכֵיל לֵיהּ וְקָרֵי לֵיהּ חֲמַר בָּשָׂר

אָמַר רַב נַחְמָן אָמַר שְׁמוּאֵל אֵין מַנִּיחִין כְּלִי תַּחַת בָּשָׂר עַד שֶׁיִּכְלֶה כׇּל מַרְאֵה אַדְמוּמִית שֶׁבּוֹ מְנָא יָדְעִינַן מָר זוּטְרָא מִשְּׁמֵיהּ דְּרַב פָּפָּא אָמַר מִשֶּׁתַּעֲלֶה תִּימְרָתוֹ

מַתְקֵיף לַהּ רַב אָשֵׁי וְדִלְמָא תַּתָּאָה מְטָא עִילָּאָה לָא מְטָא אֶלָּא אָמַר רַב אָשֵׁי לֵית לֵיהּ תַּקַּנְתָּא אֶלָּא מִשְׁדֵּא בֵּיהּ תַּרְתֵּי גַּלְלֵי מִלְחָא