תפסיר רס"ג, במדבר ט

וקבל ד̇לך כלם אללה מוסי פי בריה סיני פי אלסנה אלת̇אניה לכ̇רוג̇הם מן בלד מצר פי אלשהר אלאול קאילא

ליצנע בנו אסראיל אלפסח פי וקתה

פי אליום אלראבע עשר מן הד̇א אלשהר בין אלגרובין יצנעוה פי וקתה כג̇מיע רסומה ואחכאמה יצנעוה

פכלם מוסי בני אסראיל פי עמל אלפסח

פעמלוה פי אלשהר אלאול פי אליום אלראבע עשר מנה בין אלגרובין פי בריה סיני כג̇מיע מא אמר אללה מוסי כד̇אך צנעו בנו אסראיל

פכאן פיהם אנאס תנג̇סו במית מן אלנאס פלם יג̇ז להם אן יצנעו אלפסח פי ד̇לך אליום פתקדמו פיה בין ידי מוסי והרון

וקאלו נחן אנג̇אס במית מן אלנאס פלם נמנע אן נקרב מת̇ל קרבאן אללה פי וקתה פימא בין בני אסראיל

קאל להם מוסי קפו חתי אסמע מא יאמר אללה פיכם

פכלם אללה מוסי קאילא

מר בני אסראיל וקל להם אי אנסאן כאן נג̇סא מן מית או פי ספר מנכם או מן אג̇יאלכם פליצנע פסחא ללה

פי אלשהר אלת̇אני פי אליום אלראבע עשר מנה יצנעוה בין אלגרובין ומע פטיר ומראר יאכלוה

ולא יבקו מנה שיא אלי אלגדאה ולא יכסרו מנה עט̇מא וכסאיר רסום אלפסח יצנעוה

ואי רג̇ל כאן טאהרא ולם יכן עלי ספר ואמתנע אן יעמל אלפסח ינקטע ד̇לך אלאנסאן מן בין קומה אד̇ לם יקרב קרבאן אללה פי וקתה פקד חמל ד̇לך אלרג̇ל וזרה

ואן דכ̇ל פיכם דכ̇יל פליצנע פסחא ללה כרסם אלפסח וחכמה כד̇אך יצנע אד̇ שריעה ואחדה תכון לכם ללדכ̇יל וצריח אלאמה

ופי יום נצב אלמסכן גטאה אלגמאם עלי כ̇בא אלשהאדה ובאלליל יכון עליה כרויא אלנאר אלי אלגדאה

כד̇אך יכון דאימא אלגמאם יגטיה נהארא ורויא אלנאר לילא

ועלי קדר ארתפאע אלגמאם ען אלכ̇בא פבעד ד̇לך ירחל בנו אסראיל ופי מוצ̇ע יסכן פיה אלגמאם ת̇ם ינזל בנו אסראיל

עלי קול אללה ירחל בנו אסראיל ועלי קולה ינזלון פהם טול מדה מא סכן אלגמאם עלי אלמסכן מקימון

ואן טאל אלגמאם עלי אלמסכן איאמא כת̇ירה פיחפט̇ בנו אסראיל חפט̇ אללה פלא ירחלון

ורבמא כאן אלגמאם איאמא מחצאה עלי אלמסכן פהם עלי קול אללה ינזלון ועלי קולה ירחלון

ורבמא כאן אלגמאם מן אלמסא אלי אלצבאח ת̇ם ירתפע באלגדאה פירחלון או נהארא ולילא ת̇ם ירתפע פירחלון

או יומין או שהרא או חולא אד̇א טאלת מדה אלגמאם עלי אלמסכן פסכן עליה פבנו אסראיל מקימון גיר ראחלין ופי ארתפאעה ירחלון

כד̇אך עלי קול אללה ינזלון ועלי קולה ירחלון יחפט̇ון מא אסתחפט̇הם מן קולה ביד מוסי