תפסיר רס"ג, במדבר ח

ת̇ם כלם אללה מוסי קאילא

מר הרון וקל לה אד̇א אסרג̇ת אלסרג̇ פאלי מא ילי וג̇ה אלמנארה תצ̇י סבעתהא

פצנע הרון כד̇אך ואסרג̇ סרג̇ אלמנארה אלי מא ילי וגההא כמא אמר אללה מוסי

והד̇ה צנאעה אלמנארה מצמתה מן ד̇הב חתי ארג̇להא וסוסאנהא מצמתה כאלמנט̇ר אלד̇י ארא אללה מוסי כד̇אך צנעהא

ת̇ם כלם אללה מוסי קאילא

קדם אלליואניין מן בין בני אסראיל פטהרהם

וכד̇א אצנע בהם פי תטהירהם אנצ̇ח עליהם מן מא אלד̇כוה וימרו אלמוס עלי ג̇מיע בדנהם ויגסלו ת̇יאבהם ויטהרו

ויאכ̇ד̇ו ת̇ורא מן אלבקר ומעה בר סמיד מלת̇ות̇ בדהן ורת̇ אכ̇ר כ̇ד̇ה מן אלבקר ללד̇כוה

וקדמהם בין ידי כ̇בא אלמחצ̇ר וג̇וק ג̇מאעה בני אסראיל

וקדמהם בין ידי אללה ויסנד בנו אסראיל אידיהם עליהם

ויזפהם הרון זפא בין ידי אללה מן בין בני אסראיל פיכונו יכ̇דמון כ̇דמה אללה

ואלליואניון יסנדו אידיהם עלי ראס אלת̇ורין ואצנע אחדהמא ד̇כוה ואלאכ̇ר צעידה ללה ואסתגפר ענהם

ואוקפהם בין ידי הרון ובניה וזפהם זפא ללה

ואעזלהם מן בין בני אסראיל ויכונו לי

ובעד ד̇לך ידכ̇לו ליכ̇דמו כ̇בא אלמחצ̇ר וקד טהרתהם וזפפתהם זפא

לאנהם מג̇עולון לי מן בין בני אסראיל בדל כל בכר פאתח בטן מן בני אסראיל אתכ̇ד̇תהם לי

כמא כאן לי כל בכר ממא בין בני אסראיל מן אנסאן אלי בהימה וד̇לך אנני פי יום אהלכת כל בכר פי בלד מצר אקדסתהם לי

כד̇לך אתכ̇ד̇ת אלליואניין בדלהם

וג̇עלתהם להרון ולבניה מן בין בני אסראיל ליכ̇דמו כ̇דמתהם פי כ̇בא אלמחצ̇ר ויסתגפרו ענהם ולא יחל בהם ובא אד̇א הם תקדמו אלי אלקדס

פצנע מוסי והרון וג̇מאעה בני אסראיל ללליואניין כג̇מיע מא אמר אללה בה מוסי פי סבבהם כד̇לך צנעו בהם

פתד̇כו וגסלו ת̇יאבהם וזפהם הרון זפא בין ידי אללה ואסתגפר ענהם וטהרהם

ובעד ד̇לך דכ̇לו אלליואניון ליכ̇דמו כ̇דמתהם פי כ̇בא אלמחצ̇ר בין ידי הרון ובניה כג̇מיע מא אמר אללה מוסי בסבבהם כד̇אך צנעו בהם

ת̇ם כלם אללה מוסי תכלימא

הד̇א רסם אלליואניין מן אבן כ̇מס ועשרין סנה פצאעדא ידכ̇ל ללג̇יש לכ̇דמה כ̇בא אלמחצ̇ר

ומן אבן כ̇מסין סנה ירג̇ע ענה ולא יכ̇דמה אבדא

לכן יכ̇דם מע אכ̇ותה פי חפט̇ כ̇בא אלמחצ̇ר ואמא כ̇דמתה אלאולי פלא יכ̇דמהא כד̇א פאצנע בהם פי מחפט̇הם