תפסיר רס"ג, במדבר י

ת̇ם כלם אללה מוסי תכלימא

אצנע בוקין מן פצ̇ה מצמתין יכונאן לך לדעוה אלג̇מאעה ותרחיל אלעסאכר

ואן צ̇רב בהמא אג̇תמע אליך אלג̇מאעה אלי באב כ̇בא אלמחצ̇ר

ואן צ̇רב באחדהמא אג̇תמע אליך אלאשראף רוסא אלוף אסראיל

ואנפכ̇ו נפכ̇ה מג̇לבה ירחל בהא אלעסאכר אלנאזלה פי אלמשרק

ואנפכ̇ו נפכ̇ה מג̇לבה ת̇אניה ירחל בהא אלעסאכר אלנאזלה פי אלג̇נוב כד̇אך ינפכ̇ון נפכ̇א לרחילהם

ופי תג̇ויק אלג̇וק תנפכ̇ו נפכ̇א ולא תג̇לבו

ובנו הרון אלאימה יצ̇רבון באלאבואק פיכון ד̇לך לכם רסם אלדהר עלי מר אג̇יאלכם

ואד̇א צעדתם אלי חרב פי בלדכם מע אלעדו אלמעאדיכם פג̇לבו באלאבואק פאד̇א בוקתם בין ידי אללה רבכם תגאת̇ון מן אעדאיכם

ופי יום פרחכם ואעיאדכם ורוס שהורכם פאצ̇רבו באלאבואק עלי צואעדכם וד̇באיח סלאמתכם פיכון לכם ד̇כרא בין ידי רבכם אנא אללה רבכם אמרת בד̇לך

פלמא כאן פי אלשהר אלת̇אני מן אלסנה אלת̇אניה פי עשרין מנה ארתפע אלגמאם ען מסכן אלשהאדה

פרחל בנו אסראיל אלי מראחילהם מן בריה סיני וסכן אלגמאם פי בריה פארן

פכאן אול רחילהם עלי קול אללה ביד מוסי

באן רחל מרכז עסכר בני יהודה עלי מקדמה לג̇יושהם ועלי ג̇ישה נחשון אבן עמינדב

ועלי ג̇יש סבט יששכר נתנאל בן צוער

ועלי ג̇יש סבט זבולן אליאב בן חלן

ת̇ם פצל אלמסכן פרחל בנו גרשון ובנו מררי חאמלוה

ת̇ם רחל מרכז עסכר ראובן לג̇יושהם ועלי ג̇ישה אליצור בן שדיאור

ועלי ג̇יש סבט שמעון שלמיאל בן צורישדי

ועלי ג̇יש סבט גד אליסף בן דעואל

ת̇ם רחל אלקהתיון חאמלו אלמקדם וקד נצב אלמסכן אלי מג̇יהם

ת̇ם רחל מרכז עסכר אפרים לג̇יושהם ועלי ג̇ישה אלישמע בן עמיהוד

ועלי ג̇יש סבט מנשה גמליאל בן פדהצור

ועלי ג̇יש סבט בנימן אבידן בן גדעוני

ת̇ם רחל מרכז עסכר בני דן עלי סאקה אלעסאכר לג̇יושהם ועלי ג̇ישה אחיעזר בן עמישדי

ועלי ג̇יש סבט אשר פגעיאל בן עכרן

ועלי ג̇יש סבט נפתלי אחירע בן עינן

הד̇ה מראחיל בני אסראיל לג̇יושהם פלמא רחלו

קאל מוסי לחובב בן רעואל אלמדיני חמוה אנא ראחלון אלי אלמוצ̇ע אלד̇י קאל אללה איאה אעטיכם פתעאל מענא נחסן אליך פאן אללה קד ועד אלאסראיל בכ̇יר

קאל לא אמצ̇י אלא אלי ארצ̇י ומולדי

קאל יא הד̇א לא תתרכנא באנך תעלם אן פי טול מקאמנא פי אלבר כנת לנא כאבצארנא

פאן סרת מענא פאי כ̇יר יחסן אללה בה אלינא נחסן אליך מנה

פרחלו מן ג̇בל אללה מסאפה ת̇לאת̇ה איאם וצנדוק עהדה יסיר בין ידיהם מסאפה תלך אלת̇לאת̇ה אלאיאם ליכ̇תאר להם מסתקרא

וגמאמה עליהם נהרא אד̇א רחלו מן אלעסכר

וכאן אלסביל ענד רחיל אלצנדוק אן יקול מוסי קם יא רב בנצרנא יתבדד אעדאוך ויהרב שאניוך מן בין ידיך

וענד נזולה אן יקול רד יא רב נורך אלי רבואת אלוף אסראיל