תפסיר רס"ג, במדבר ה

ת̇ם כלם אללה מוסי קאילא

מר בני אסראיל באן ינפו מן אלעסכר כל אברץ וכל ד̇איב וכל נג̇ס למית

מן ד̇כר אלי אנת̇י תנפוהם אלי כ̇ארג̇ אלעסכר ולא ינג̇סו עסכרהם אלד̇י אנא סאכן פימא בינהם

פצנעו כד̇אך בנו אסראיל ונפוהם אלי כ̇ארג̇ אלעסכר כמא אמר אללה מוסי כד̇אך צנעו בנו אסראיל

ת̇ם כלם אללה מוסי קאילא

קל לבני אסראיל אי רג̇ל או מראה יצנע שיא מן כ̇טאיא אלנאס פינכת̇ נכת̇א באללה פיאת̇ם

ת̇ם יקר בכ̇טיתה אלתי צנעהא פלירד אלט̇לאמה בראסהא וכ̇מסהא יזיד עליהא וידפעהא אלי מן ט̇למה

ואן לם יכן ללמט̇לום ולי לתרד אלט̇לאמה עליה פלתכן אלט̇לאמה אלמרדודה ללה והי ללאמאם סוי כבש אלגפראן ויסתגפר בה ענה

וכל רפיעה מן ג̇מיע אקדאס בני אסראיל פלאי אמאם דפעוהא פהי לה

וכל אמר יכון אמר אקדאס אליה לאי אמאם דפעהא כאנת לה

ת̇ם כלם אללה מוסי קאילא

מר בני אסראיל וקל להם אי רג̇ל חאדת זוג̇תה פכ̇אנת כ̇יאנה

באן צ̇אג̇עהא רג̇ל מצ̇אג̇עה אנסאל וכיפי ד̇לך ען זוג̇הא ואנסתרת והי נג̇סה ושאהד ליס עליהא והי לם תקהר

וכ̇טר בבאלה ראי גירה פיגאר עליהא והי נג̇סה או גיר נג̇סה

פליאת ד̇לך אלרג̇ל בזוג̇תה אלי אלאמאם ויאת בקרבאנהא מעהא עשר ויבה מן דקיק אלשעיר לא יצב עליה דהנא ולא יג̇על פוקה לבאנא לאנה קרבאן אלגירה קרבאן אלד̇כר יד̇כר באלד̇נוב

פיקדמהא אלאמאם ויוקפהא בין ידי אללה

ויאכ̇ד̇ אלאמאם מן אלמא אלמקדס פי אניה כ̇זף ומן אלתראב אלד̇י יכון פי ערצה אלמסכן יאכ̇ד̇ וילקי פי אלמא

ויוקפהא אלאמאם בין ידי אללה ויכשף ראסהא ויג̇על עלי ידיהא קרבאן אלד̇כר קרבאן אלגירה פלימסך פי ידה אלמא אלמר אללאען

ויחלפהא אלאמאם ויקול להא אן כאן לם יצ̇אג̇עך רג̇ל ולם תחידי אלי נג̇אסה גיר זוג̇ך פאברי מן הד̇א אלמא אלמר אללאען

ואן כנת קד חדת אלי גיר זוג̇ך ותנג̇סת בה וג̇על גירה פיך מצ̇אג̇עתה

ויחלף אלאמם אלאמראה בימין אלחרג̇ ויקול להא יג̇עלך אללה מסבה וימינא פי מא בין קומך במא יג̇על ורכך סאקטה ובטנך וארמא

וד̇לך אד̇א צאר הד̇א אלמא אללאען פי אמעאיך פירם אלבטן ויסקט אלורך ותקול אלמראה אמין אמין

ויכתב אלאמאם הד̇ה אללענאת פי כתאב וימחוה באלמא אלמר

ויסקיהא אלמא אלמר אללאען פיסתחיל פיהא מרא

ויאכ̇ד̇ מן ידהא קרבאן אלגירה ויחרכה בין ידי אללה ויקדמה אלי אלמד̇בח

ויקבץ̇ מנה פיהה ויקתרה עלי אלמד̇בח ובעד ד̇לך יסקיהא אלמא

פאד̇א סקאהא פאן כאנת קד תנג̇סת וכ̇אנת זוג̇הא כ̇יאנה אסתחאל פיהא מרא פורם בטנהא וסקטת ורכהא וצארת מסבה פימא בין קומהא

ואן כאנת לם תתנג̇ס בל הי טאהרה ברית וחמלת חמלא

הד̇ה שריעה אלגירה פי אן תחיד אמראה ען זוג̇הא פתתנג̇ס

או רג̇ל יכ̇טר בבאלה ראי גירה פיגאר עלי זוג̇תה פליוקפהא בין ידי אללה ויצנע בהא אלאמאם ג̇מיע מא פי הד̇ה אלשריעה

חתי יברי אלרג̇ל מן אלוזר ותלך אלמראה תחמל וזרהא