תפסיר רס"ג, במדבר ד

ת̇ם כלם אללה מוסי והרון קאילא

ארפעא ג̇מלה בני קהת מן בין בני לוי לעשאירהם וביות אבאיהם

מן אבן ת̇לת̇ין סנה פצאעדא אלי כ̇מסין סנה כל מן ידכ̇ל ללג̇יש ליעמל צנאעה פי כ̇בא אלמחצ̇ר

והד̇ה כ̇דמה בני קהת פי כ̇בא אלמחצ̇ר כ̇אץ אלאקדאס

וידכ̇ל הרון ובנוה ענד רחיל אלעסכר פיהיו אלסג̇ף אלמסתור ויגטון בה צנדוק אלשהאדה

ויג̇עלו עליה גשא ג̇לוד דארש ויבסטו ת̇ובא ג̇מלתה אסמאנג̇ון פוקה ויצלחו אקואבה

ועלי אלמאידה אלמוג̇הה יבסטו ת̇וב אסמאנג̇ון ויג̇עלו עליהא אלקצאע ואלדרוג̇ ואלמלאעק ומדאהן אלסתר ואלכ̇בז אלדאים יכון עליהא

ויבסטו עליהא ת̇וב צבג קרמז ויגטוהא בגשא ג̇לוד דארש ויצלחו אקואבהא

וליאכ̇ד̇ו ת̇וב אסמאנג̇ון פיגטו בה מנארה אלאצ̇אה וסרג̇הא וכלאבאתהא ומג̇אמרהא וג̇מיע אניה דהנהא אלתי יכ̇דמונהא בהא

ויג̇עלוהא וג̇מיע אניתהא פי גשא ג̇לוד דארש ויצנעו ד̇לך עלי אלדהק

ועלי מד̇בח אלד̇הב פליבסטו ת̇וב אסמאנג̇ון ויגטוה בגשא ג̇לוד דארש ויצלחו אקואבהא

ויאכ̇ד̇ו ג̇מיע אניה אלכ̇דמה אלתי יכ̇דמון בהא פי אלקדס פיג̇עלוהא פי ת̇וב אסמאנג̇ון ויגטוהא בגשא ג̇לוד דארש ויצנעוהא עלי אלדהק

וירמדו אלמד̇בח ויבסטו עליה ת̇וב ארג̇ואן

ויג̇עלו עליה ג̇מיע אניתה אלתי יכ̇דמון עליה בהא אלמג̇אמר ואלמנאשל ואלמג̇ארף ואלכראנב וסאיר אניה אלמד̇בח ויבסטו עליה גשא ג̇לוד דארש ויצלחו אקואבה

פאד̇א פרג הרון ובנוה מן תגטיה אלקדס וג̇מיע אניתה ענד רחיל אלעסכר פבעד ד̇לך ידכ̇ל בנו קהת ויחמלוהא ולא ידנו מן אלקדס פיהלכון הד̇ה צפה חמל בני קהת בכ̇בא אלמחצ̇ר

ווכאלה אלעזר אבן הרון אלאמאם דהן אלאצ̇אה ובכ̇ור אלצמוג ואלבר אלדאים ודהן אלמסח פד̇לך וכאלה אלמסכן וג̇מיע מא פיה מן קדס ואניתה

ת̇ם כלם אללה מוסי והרון תכלימא

לא תקטעא עשאיר סבט קהת מן בין אלליואניין

בל אצנעא להם הד̇ה אלכ̇לה חתי יחיו ולא יהלכו בדנוהם אלי כ̇אץ אלאקדאס ידכ̇ל הרון ובנוה ויולונהם כל פריק עלי כ̇דמתה וחמלה

ולא ידכ̇לו פינט̇רו ענד תגטיה אלקדס פיהלכון

ת̇ם כלם אללה מוסי תכלימא

ארפע ג̇מלה בני גרשון הם איצ̇א לביות אבאיהם ועשאירהם

מן אבן ת̇לת̇ין סנה פצאעדא אלי אבן כ̇מסין סנה תעדהם כל מן ידכ̇ל ללג̇יש לכ̇דמה כ̇בא אלמחצ̇ר

והד̇ה כ̇דמה עשאיר גרשון לכ̇דמה ולחמל

ויחמלו שקאק אלמסכן וכ̇בא אלמחצ̇ר וגשאה וגשא אלדארש אלד̇י עליה מן פוק וסתר באב כ̇בא אלמחצ̇ר

וקלוע אלצראדק וסתר באבה אלתי עלי אלמסכן ואלמד̇בח מסתדירא ואטנאבהא וסאיר אניה כ̇דמתהא וכל מא יצלח להא הם יכ̇דמון

עלי קול הרון ובניה יכון ג̇מיע כ̇דמה בני גרשון מן חמלהם וג̇מיע עמלהם ועדו עליהם בחפט̇ ג̇מיע חמלהם

הד̇ה כ̇דמה עשאיר גרשון פי כ̇בא אלמחצ̇ר וחפט̇הא עלי יד איתמר אבן הרון אלאמאם

ובנו מררי לעשאירהם וביות אבאיהם תעדהם

מן אבן ת̇לת̇ין סנה פצאעדא אלי אבן כ̇מסין סנה כל מן ידכ̇ל ללג̇יש לכ̇דמה כ̇בא אלמחצ̇ר

והד̇א חפט̇ חמלהם וג̇מיע עמלהם פי כ̇בא אלמחצ̇ר תכ̇אתג̇ אלמסכן ואמהאג̇ה ועמדה וקואעדה

ועמד אלצראדק מסתדירא וקואעדהא ואותאדהא ואטנאבהא וג̇מיע אניתהא וסאיר אעמאלהא ועדו באסמא ג̇מיע אניה חפט̇ חמלהם

הד̇ה כ̇דמה בני מררי פי כ̇בא אלמחצ̇ר עלי יד איתמר אבן הרון אלאמאם

פעד מוסי והרון ואשראף אלג̇מאעה בני קהת לעשאירהם לביות אבאיהם

מן אבן ת̇לת̇ין סנה פצאעדא אלי אבן כ̇מסין סנה כל מן ידכ̇ל ללג̇יש לכ̇דמה כ̇בא אלמחצ̇ר

וכאן עדדהם לעשאירהם אלפין וסבע מאיה וכ̇מסין

האולי עדד עשאיר קהת כל מן יכ̇דם פי כ̇בא אלמחצ̇ר אלד̇י עד מוסי והרון עלי קול אללה ביד מוסי

ועדד בני גרשון לעשאירהם ולביות אבאיהם

מן אבן ת̇לאת̇ין סנה פצאעדא אלי אבן כ̇מסין סנה כל מן דכ̇ל ללג̇יש ללכ̇דמה פי כ̇בא אלמחצ̇ר

וכאן עדדהם לעשאירהם לביות אבאיהם אלפין וסת מאיה ות̇לאת̇ין

האולי מעדודו עשאיר בני גרשון כל מן כ̇דם פי כ̇בא אלמחצ̇ר אלד̇י עד מוסי והרון קול אללה

ועדד עשאיר בני מררי לעשאירהם לביות אבאיהם

מן אבן ת̇לאת̇ין סנה פצאעדא אלי אבן כ̇מסין סנה כל מן דכ̇ל ללג̇יש ללכ̇דמה פי כ̇בא אלמחצ̇ר

וכאן עדדהם לעשאירהם ת̇לאת̇א אלאף ומאיתין

האולי מעדודו עשאיר בני מררי אלד̇ין עד מוסי והרון עלי קול אללה ביד מוסי

וג̇מיע אלמעדודין אלד̇י עד מוסי והרון ואשראף אסראיל אלליואניין לעשאירהם ולביות אבאיהם

מן אבן ת̇לאת̇ין סנה פצאעדא אלי אבן כ̇מסין סנה כל מן דכ̇ל ליכ̇דם כ̇דמה עמל וכ̇דמה אלחמל פי כ̇בא אלמחצ̇ר

וכאן עדדהם ת̇מאניה אלאף וכ̇מס מאיה ות̇מאנין

עלי קול אללה עדהם מוסי כל פריק פי עמלה וחמלה ועדדה כמא אמר אללה מוסי