תפסיר רס"ג, במדבר ו

וכלם אללה מוסי קאילא

מר בני אסראיל וקל להם אי רג̇ל או מראה סוג נד̇ר נסך לינסך לרבה

פמן אלכ̇מר ואלמסכר מנה יתנסך חתי כיל כ̇מר וכיל מסכר מנה לא ישרב וכל נקיע אלענב לא ישרבה וענבא רטבא ויאבסא לא יאכל

וטול איאם נסכה מן כל מא יעמל מן ג̇פן אלכ̇מר מן אלפרצאן אלי אלזג̇ לא יאכל

וטול איאם נד̇ר נסכה לא ימר חאלק עלי ראסה אלי אן תתם אלאיאם אלתי תנסכהא ללה יכון מקדסא וירבי פרע שער ראסה

וטול איאם נסכה ללה אלי חצ̇רה מית לא ידכ̇ל

חתי אבוה ואמה ואכ̇וה ואכ̇תה לא יתנג̇ס בהם פי מותהם לאן נסך רבה עליה

כד̇לך טול איאם נסכה מקדסא יכון ללה

פאן מאת מעה מית בגתה או גפלה פקד קטע אול נסכה פליחלק ראסה פי יום טהרה וד̇לך פי אליום אלסאבע יחלקה

ופי אליום אלת̇אמן יאת בשפנינין או פרכ̇י חמאם אלי אלאמאם אלי באב כ̇בא אלמחצ̇ר

ויעמל אלאמאם אחדהמא ד̇כוה ואלאכ̇ר צעידה ויסתגפר ענה ממא אכ̇טא פי אמר מית ויקדס ראסה פי ד̇לך אליום

ויתנסך ללה איאם נסכה ויאת בחמל אבן סנתה לקרבאן אלאת̇ם ואלאיאם אלאואיל תסקט למא אנקטע נסכה

והד̇ה שריעה אלנאסך פי יום כמאל איאם נסכה יאתי בה אלי באב כ̇בא אלמחצ̇ר

פיקרב קרבאנה ללה חמלא אבן סנתה צחיחא ללצעידה ורחלה אבנה סנתהא צחיחה ללד̇כוה וכבשא צחיחא לד̇בח אלסלאמה

וסלה פטיר ג̇ראדק פטיר מלת̇ות̇ה בדהן ורקאק פטיר ממסוחה בדהן ואלבר ואלמזאג̇ אלד̇י מעהא

פיקדמהא אלאמאם בין ידי אללה ויצנע ד̇כותה וצעידתה

ואלכבש יצנעה ד̇בח אלסלאמה ללה מע סלה אלפטיר ת̇ם יצנע אלבר ואלמזאג̇ אלד̇י מעהא

ויחלק אלנאסך ענד באב כ̇בא אלמחצ̇ר שער ראסה ויאכ̇ד̇ה וילקיה עלי אלנאר אלתי תחת ד̇בח אלסלאמה

ויאכ̇ד̇ אלאמאם אלד̇ראע מטבוכ̇ה מן ד̇לך אלכבש וג̇רדקה ואחדה ורקאקה ואחדה מן סלה אלפטיר ויצ̇ע ד̇לך עלי כפי אלנאסך בעד חלקה שערה

ויחרך אלג̇מיע תחריכא בין ידי אללה וליכן קדסא ללאמאם מע קץ אלתחריך וסאק אלרפיעה ובעד ד̇לך ישרב אלנאסך כ̇מרא

הד̇ה שריעה אלנאסך אלד̇י ינד̇ר וקרבאנה ללה ען נסכה סוי מא תנאלה ידה וליכן ד̇לך במקדאר מדה נסכה יצ̇מה אלי שריעה אלנסך

ת̇ם כלם אללה מוסי קאילא

מר הרון ובניה וקל להם כד̇א פבארכו בני אסראיל מקולא להם

יבארכך אללה ויחפט̇ך

ויצ̇י בנור וג̇הה עליך וירופך

ויקבל בקצדה אליך ויציר לך אלסלאם

פיתלו אסמי עלי בני אסראיל ואנא אבארך פיהם