תפסיר רס"ג, במדבר כא

ת̇ם סמע אלכנעאני מלך ערד אלמקים פי אלדארום באן בני אסראיל קד ג̇או טריק את̇רים פחארבהם וסבא מנהם סביא

פנד̇ר אלאסראיל נד̇רא ללה וקאלו אן אסלמת האולי אלקום פי ידי ג̇עלת קראהם צואפי

פסמע אללה דעא אלאסראיל ואסלם פי אידיהם אלכנעאני פג̇עלוה וקראה צואפי וסמי ד̇לך אלמוצ̇ע חרמה

ת̇ם רחלו מן ג̇בל הור טריק בחר אלקלזם ליסתדירו בבלד אדום וצ̇ג̇רת נפוסהם פי אלטריק

פתכלמו פי אללה ופי מוסי וקאלו לם אצעדתמאנא מן מצר נמות פי אלבר ממא ליס כ̇בז ולא מא וקד צ̇ג̇רת נפוסנא מן אלטעאם אלכ̇פיף

פבעת̇ אללה פי אלקום חיאת מחרקה לסעתהם פמאת מנהם קום כת̇ירון

פג̇או אלקום אלי מוסי וקאלו קד אכ̇טאנא אד̇ תכלמנא פי אללה ופיך אדע אללה אן יזיל ענא אלחיאת פדעי להם מוסי

פקאל אללה לה אצנע מחרקא וארפעה עלי עלם פכל מלסוע ילתפת לה תאיבא פיבקא

פצנע מוסי ת̇עבאנא מן נחאס וג̇עלה עלי עלם פכאן אי אנסאן לדגה ת̇עבאן אלתפת תאיבא אלי ד̇לך בקי חיא

ת̇ם רחלו בנו אסראיל מן ת̇ם ונזלו פי אבת

ורחלו מנהא ונזלו פי עיי אלמג̇אז פי אלבריה אלתי עלי ג̇הה מואב מן משרק אלשמס

ורחלו מן ת̇ם ונזלו פי ואדי זרד

ורחלו מן ת̇ם ונזלו פי ג̇אנב אלארנון אלד̇י פי אלבריה אלכ̇ארג̇ ען תכ̇ם אלאמוריין לאן ארנון הו אלחד בין מואב ואלאמוריין

ולד̇לך יקאל פי כתאב פתוח אללה מן דרדור אלקלזם ומן אלאודיה פארנון

ומצב אלאודיה אלד̇י מילה אלי עמארה ער ואסנאדה אלי תכ̇ם מואב

ורחלו מן ת̇ם אלי אלביר והי אלביר אלתי קאל אללה למוסי ענהא אג̇מע אלקום חתי אעטיהם מאא

חיניד̇ אנשא אסראיל הד̇ה אלאנשא פקאלו אצעדי יא ביר תג̇אובו להא

ביר חפרהא אלריסא וכראהא נבל אלקום ראסמוהא בוכאיאתהם ת̇ם רחלו מן תלך אלבריה אלי ד̇את אלעטא

ומן ד̇את אלעטא אלי אלואד ומן ד̇לך אלואד אלי ד̇את אלכנאיס

ומן ת̇ם אלי אלואד אלד̇י פי בלד מואב ענד ראס אלקלעה אלמטלעה עלי וג̇ה אלסמאוה

ת̇ם בעת̇ אלאסראיל ברסל אלי סיחון מלך אלאמוריין קאילא

אריד אן אג̇וז פי בלדך ולסנא נמיל אלי צ̇יעה וכרם ולא נשרב מא צהריג̇ בל פי טריק אלג̇אדה נסיר אלי אן נג̇וז תכ̇מך

פלם ידע סיחון אסראיל אן יג̇וז פי תכ̇מה פג̇מע ג̇מיע קומה וכ̇רג̇ תלקאהם אלי אלבריה חתי ואפי יהץ פחארבהם

פקתלה אסראיל בחד אלסיף וחאז בלדה מן ארנון אלי יבק אלי בני עמון אד̇ כאן תכ̇מהם שדידא עליה

ואכ̇ד̇ו ג̇מיע הד̇ה אלקרי פסכנו אסראיל פי ג̇מיע קרי אלאמוריין פי חשבון ורסאתיקהא

וד̇לך אן חשבון הי מנבר סיחון מלך אלאמוריין והו כאן חארב מלך מואב אלאול פאכ̇ד̇ ג̇מיע בלדה מן ידה אלי ארנון

ולד̇לך יקול אלממת̇לון אדכ̇לו אלי חשבון חתי תבנא ותהיא קריה סיחון

לאן נארא כ̇רג̇ת מן חשבון ולהיב מן קריה סיחון פאכלת ער מואב ואצחאב ביע ארנון

פוילך יא מואב כיף בדת יא קום עבדת כמוש לקד ג̇על בניה אסארי ובנאתה סביא לסיחון מלך אלאמוריין

וזאל סימאהם מן חשבון אלי דיבון ותוחש אלי נפח אלתי ענד מידבא

ולמא אקאם אסראיל פי בלד אלאמוריין

בעת̇ מוסי בקום ירומון יעזר פפתחו רסאתיקהא וקרצ̇ו אלאמורי אלד̇י פיהא

ת̇ם ולו פצעדו טריק אלבת̇ניה פכ̇רג̇ עוג מלך אלבת̇ניה תלקאהם הו וג̇מיע קומה ללחרב אלי אדרעאת

פקאל אללה למוסי לא תכ̇פה פאני מסלמה בידך וג̇מיע קומה ובלדה פאצנע בה כמא צנעת בסיחון מלך אלאמוריין אלמקים פי חשבון

פקתלוה ובניה וג̇מיע קומה חתי לם יבק להם שריד וחאזו בלדה