תפסיר רס"ג, במדבר כ

ת̇ם ג̇או בנו אסראיל אג̇מעין אלי בריה צין פי אלשהר אלאול ואקאם אלקום פי רקים ומאתת הנאך מרים ודפנת ת̇ם

ולם יכן מא ללג̇מאעה פתג̇וקו עלי מוסי והרון

ולמא כ̇אצם אלקום מוסי קאלו יא ליתנא תופינא בופאה אכ̇ותנא בין ידי אללה

ולם ג̇יתמא בג̇וק אללה אלי הד̇א אלבר נמות פיה נחן ובהאימנא

ולם אצעדתמאנא מן מצר פג̇יתמא בנא אלי הד̇א אלמוצ̇ע אלרדי מוצ̇ע לא זרע פיה ולא תין וג̇פן ורמאן חתי מא ליס ללשרב

פאקבל מוסי והרון הארבין מן בין ידי אלג̇וק אלי באב כ̇בא אלמחצ̇ר פוקעא עלי וג̇וההמא פט̇הר נור אללה להמא

ת̇ם כלם אללה מוסי תכלימא

כ̇ד̇ אלעצאה וג̇וק אלג̇מאעה אנת והרון אכ̇וך וקולא עלי אלצכ̇ר בחצ̇רתהם אן יכ̇רג̇ מאה פתכ̇רג̇ להם אלמא מן אלצכ̇ר ותסקיהם ובהאימהם

פאכ̇ד̇ מוסי אלעצא מן בין ידי אללה כמא אמרה

וג̇וק מוסי והרון אלקום אלי חצ̇רה אלצכ̇ר פקאל להם אסמעו יא עסאה מן הד̇א אלחג̇ר נכ̇רג̇ לכם מאא

פרפע ידה וצ̇רב אלצכ̇ר בעצאה מרתין פכ̇רג̇ מא כת̇יר שרבת מנה אלג̇מאעה ובהאימהם

פקאל אללה למוסי והרון כמא לא תומנאהם בי ותקדסאני בחצ̇רה בני אסראיל כד̇אך לא תדכ̇לא הד̇א אלג̇וק אלי אלבלד אלד̇י אקסמת בה להם

ד̇לך מא אלכ̇צומה אלד̇י כ̇אצם בנו אסראיל רסולי רבהם בסבבה פתעט̇ם פיהם

ת̇ם בעת̇ מוסי ברסל מן רקים אלי מלך אדום קאילא כד̇א קאל אכ̇וך אסראיל אנת אעלם בג̇מיע אלמצאיב אלתי נאלתנא

ואן אבאינא נזלו מצר פאקמנא במצר מדה טוילה ואסי אלמצריון בנא ובאבאינא

פדעונא אללה פסמע צותנא ובעת̇ ברסול אכ̇רג̇נא מן מצר והא נחן פי קריה רקים פי טרף תכ̇מך

נריד אן נג̇וז פי בלדך ולסנא נמיל אלי צ̇יעה ולא כרם ולא נשרב מא צהריג̇ לכנא נסיר פי טריק אלג̇אדה לא נמיל ימינא ולא שמאלא אלי אן נג̇וז תכ̇מך

קאל לה אלאחמרי לא תג̇ז פי תכ̇מי כילא באלסיף אכ̇רג̇ תלקאך

קאל לה בנו אסראיל נצעד פי אלמחג̇ה ואן שרבנא לך מאא נחן ומאשיתנא דפענא ת̇מנה וליס אמר אלא אן נג̇וז פקט

קאל לא תג̇ז כד̇אך וכ̇רג̇ אדום תלקאה בשעב עט̇ים ויד שדידה

פלמא אבא אדום אן יתרך אל אסראיל אן יג̇וז פי תכ̇מה מאל ענה

פרחלו מן רקים וג̇את ג̇מאעתהם אלי ג̇בל הור

פקאל אללה למוסי והרון פי ג̇בל הור ענד תכ̇ם בלד אדום קאילא

ינצ̇ם הרון אלי קומה פאנה לא ידכ̇ל אלבלד אלד̇י אעטיתה בני אסראיל כמא קלת חין כ̇אלפתמא אמרי פי מא אלכ̇צומה

כ̇ד̇ הרון ואלעזר אבנה ואצעדהמא אלי ג̇בל הור

ואסלך̇ הרון ת̇יאבה ואלבסהא אלעזר אבנה והרון ינצ̇ם וימות הנאך

פצנע מוסי כמא אמרה אללה פצעדו אלי ג̇בל הור בחצ̇רה אלג̇מאעה

וסלך̇ מוסי ת̇יאב הרון ואלבסהא אלעזר אבנה ומאת הרון הנאך פי ראס ג̇בל הור ונזל מוסי ואלעזר מן אלג̇בל

פלמא ראת אלג̇מאעה אן הרון קד מאת בכא עליה ת̇לאת̇ין יומא ג̇מיע אלאסראיל