תפסיר רס"ג, במדבר כב

ת̇ם רחלו בנו אסראיל פנזלו פי בידאת מואב אלתי עלי ארדן יריחא

ולמא ראי בלק אבן צפור ג̇מיע מא צנע אסראיל באלאמוריין

וחד̇ר אלמואביון מן קבל אלקום ג̇דא אד̇ הם כת̇ירון וצ̇ג̇רו מנהם

פקאל לשיוך̇ מדין אלאן סילחס הד̇א אלג̇וק כל אנאם חואלינא כמא ילחס אלת̇ור כ̇צ̇ר אלצחרא ובלק אבן צפור מלכהם פי ד̇לך אלוקת

פבעת̇ ברסל אלי בלעם אבן בעור אלי פתורא אלתי עלי אלפראת בלד קומה לידעו בה קאילה הוד̇א אלקום אלד̇י כ̇רג̇ מן מצר קד גטא ט̇אהר אלארץ̇ והו ג̇אלס מקאבלי

ואלאן פתעאל אלענה לי אד̇ הו אעט̇ם מני פלעלי אסתטיע אן אחארבה ואטרדה ען בלדי לאני אעלם אן מן תבארכה מבארך ומן תלענה ילען

פמצ̇י שיוך̇ מואב ושיוך̇ מדין בפאלאת מעהם חתי ואפו בלעם פאכ̇ברוה בכלאם בלק

קאל להם ביתו ההנא אללילה ארד עליכם ג̇ואבא כמא יקול אללה לי פאקאם ריסא מואב ענד בלעם

פואפא אמר אללה בלעם וקאל לה מפתתחא מן האולי אלקום אלד̇ין ענדך

קאל אן בלק אבן צפור מלך מואב בעת̇ בהם אלי

יקול אן אלקום אלד̇ין כ̇רג̇ו מן מצר קד גטו ט̇אהר אלארץ̇ פאלאן תעאל סבהם לי פלעלי אסתטיע אחארבהם פאטרדהם

קאל לה לא תמץ̇ מעהם ולא תלען אלקום פאנה מבארך

פקאם בלעם באלגדאה וקאל לריסא בלק אמצ̇ו אלי בלדכם פאן אללה נהאני ען אן אמצ̇י מעכם

פקאם ריסא מואב וג̇או אלי בלק וקאלו קד אבא בלעם אן יג̇י מענא

ועאוד בלק איצ̇א בעת̇ ריסא אג̇ל ואעט̇ם מן ד̇לך

פג̇או אלי בלעם וקאלו לה כד̇א קאל בלק אבן צפור לא תמתנע מן אלמסיר אלי

פאני סאכרמך ג̇דא וכל מא תקול לי אצנעה ותעאל פאלען לי האולי אלקום

פאג̇אב בלעם קואד בלק וקאל להם לו אעטאני בלק מל ביתה פצ̇ה וד̇הבא לם אסתטע אן אתג̇אוז אמר אללה רבי פאעמל צגירה או כבירה

ואלאן אקימו אנתם איצ̇א ההנא אללילה חתי אנט̇ר מא יעאוד אללה יכ̇אטבני בה

פואפא אמר אללה בלעם לילא וקאל לה אן כאן האולי אלקום ג̇או לידעוך פקם אמץ̇ מעהם לכן אלאמר אלד̇י אקולה לך אצנעה פקט

פקאם באלגדאה ואסרג̇ אתאנה ומצ̇י מע ריסא מואב

ת̇ם אשתד גצ̇ב אללה למצ̇יה טאמעא פוקף מלאך אללה פי אלטריק ליחידה ען ד̇לך והו ראכב עלי אתאנה ומעה גלאמאה

פלמא ראת אלאתאן מלאך אללה קאימא פי אלטריק וסיפה מצלת בידה מאלת ען אלטריק וסארת פי אלצ̇יאע פצ̇רבהא בלעם לירדהא אלי אלטריק

ת̇ם וקף מלאך אללה פי זקוק אלכרום והנאך ג̇דאר ימנה ויסרה

פלמא ראתה אלאתאן אזדחמת מע אלחאיט פצ̇גטת רג̇ל בלעם אלי אלחאיט פזאד פי צ̇רבהא

ת̇ם עאוד מלאך אללה פג̇אז ווקף פי מוצ̇ע מצ̇יק מא ליס טריק ימאל ענה ימנה או יסרה

פלמא ראתה רבצ̇ת תחת בלעם פאשתד גצ̇בה פצ̇רבהא באלעצא

פפתח אללה פאהא פקאלת לבלעם מא ד̇א צנעת בך אד̇ צ̇רבתני הד̇ה אלמרה אלת̇אלת̇ה

קאל לאנך תמרסת בי ולו אן כאן פי ידי סיף לכנת קד קתלתך

קאלת אלסת אנא אתאנך אלתי רכבתני מד̇ כנת אלי אליום הל עודתך אן אצנע בך כד̇א קאל לא

ת̇ם כשף אללה ען בצר בלעם פראי אלמלאך ואקפא פי אלטריק וסיפה מצלת בידה פכ̇ר בין ידיה סאג̇דא

פקאל לה לם צ̇רבת אתאנך הד̇ה אלמרה אלת̇אלת̇ה ואנא כ̇רג̇ת פי אן אחידך אן תורטת אלטריק חד̇אי

חתי ראתני אלאתאן פמאלת עני הד̇ה אלמרה אלת̇אלת̇ה ולו לם תמל עני לקתלתך אלאן ובקיתהא

קאל לה קד אכ̇טאת ולם אעלם אנך ואקף תלקאי פי אלטריק ואלאן פאן סאך מצ̇יי רג̇עת

קאל אמץ̇ מע אלקום ואלקול אלד̇י אקולה לך קלה פקט פמצ̇י מעהם

פלמא סמע בלק במג̇י בלעם כ̇רג̇ תלקאה אלי קריה מואב עלי ארנון אלתי פי טרפה

פקאל בלק לבלעם אלם ארסל אליך מרה קבל הד̇ה לאדעוך לם לם תג̇ אלי אתראני לסת אקדר אן אכרמך

קאל ואלאן אד̇ קד צרת אליך אתראני אסתטיע אן אקול שיא אלא מא ילקנניה אללה פקט

ומצ̇יא ג̇מיעא חתי ג̇אא אלי קריה חצות

וד̇בח בלק בקרא וגנמא ובעת̇ בד̇לך אלי בלעם ואלי אלריסא אלד̇ין מעה

פלמא כאן באלגדאה אכ̇ד̇ בלק בלעם ואצעדה אלי בעץ̇ ביע מעבודה פנט̇ר מן ת̇ם אלי בעץ̇ אלקום