תפסיר רס"ג, במדבר יט

ת̇ם כלם אללה מוסי והרון תכלימא

הד̇א רסם אלשריעה אלתי אמר אללה בהא מר בני אסריאל באן יאתוך בבקרה צ̇פרא צחיחה מא ליס פיהא עיב ממא לם יקע עליהא ניר

ואדפעוהא אלי אלעזר אלאמאם יכ̇רג̇הא כ̇ארג̇ אלעסכר ויד̇בחהא בחצ̇רתה

ויאכ̇ד̇ מן דמהא באצבעה וינצ̇ח מקאבל וג̇ה כ̇בא אלמחצ̇ר מנה סבע מראר

ויאמר בחרקהא בחצ̇רתה ג̇לדהא מע לחמהא ודמהא ופרת̇הא

ת̇ם יאכ̇ד̇ אלאמאם עוד ארז וצעתרא וצבג קרמז וילקי ד̇לך אלי וסט חריקהא

ויגסל ת̇יאבה הד̇א אלאמאם וירחץ̇ בדנה באלמא ובעד ד̇לך ידכ̇ל אלי אלעסכר וינג̇ס אלי אלמגיב

ואלמחרקהא יגסל ת̇יאבה וירחץ̇ בדנה באלמא וינג̇ס אלי אלמגיב

ויג̇מע רג̇ל טאהר רמאד אלבקרה ויצ̇עה כ̇ארג̇ אלעסכר פי מוצ̇ע טאהר ויכון לג̇מאעה בני אסראיל מחפוט̇א למא אלנצ̇ח והו ד̇כוה

ויגסל אלג̇אמע רמאדהא ת̇יאבה וינג̇ס אלי אלליל ותכון לבני אסראיל וללגריב אלדאכ̇ל פימא בינהם רסם אלדהר

ומן דני במית מן ג̇מיע אנפס אלנאס פלינג̇ס סבעה איאם

והו יתד̇כא מנה פי אליום אלת̇אלת̇ ופי אליום אלסאבע פיטהר ואן לם יתד̇ך מנה פיהמא פלא יטהר

פכל מן דנא במית מן נפוס אלנאס אלד̇י ימות ולא יתד̇כא פקד נג̇ס מסכן אללה אן דכ̇לה פינקטע ד̇לך אלאנסאן מן בין אלג̇וק אד̇ מא אלנצ̇ח לם ירש עליה פהו נג̇ס לד̇לך ונג̇אסתה עליה אבדא

והד̇ה אלשריעה אי אנסאן מאת פי כ̇בא פכל מן דכ̇ל אליה וג̇מיע מא פיה ינג̇ס סבעה איאם

וכל אנא מפתוח מא ליס עליה צמאם מקיד פהו נג̇ס

וכל מן דנא עלי וג̇ה אלצחרא בקתיל סיף או מית או עט̇ם אנסאן או קבר ינג̇ס סבעה איאם

וליוכ̇ד̇ לה מן רמאד חריק אלד̇כוה ויצב עליה מאא מן נביע פי אנא

ויאכ̇ד̇ רג̇ל טאהר שיא מן צעתר ויגמסה פי ד̇לך אלמא וינצ̇ח מנה עלי אלכ̇בא ועלי ג̇מיע אלאניה ואלנפוס אלתי כאנת פיה ועלי אלדאני באלעט̇ם או באלקתיל או אלמית או אלקבר

כד̇אך ינצ̇ח אלטאהר עלי אלנג̇ס פי אליום אלת̇אלת̇ ואלסאבע פאד̇א ד̇כאה פי אליום אלסאבע גסל ת̇יאבה ורחץ̇ באלמא וטהר באלעשי

ואי רג̇ל תנג̇ס ולם יתד̇ך פינקטע ד̇לך אלאנסאן מן בין אלג̇וק למא נג̇ס מקדס אללה אד̇ דכ̇לה ולם ינצ̇ח עליה מא אלנצ̇ח פהו נג̇ס

ויכון להם הד̇א רסם אלדהר ונאצ̇ח מא אלנצ̇ח יגסל ת̇יאבה ומן לאמס מא אלנצ̇ח ינג̇ס אלי אלליל

וכל מא לאמסה אלנג̇ס ינג̇ס פאן כאן אנסאן דנא בה פלינג̇ס אלי אלליל