תפסיר רס"ג, במדבר יח

פקאל אללה להרון אנת ובנוך ואל אביך מעך תחמלון וזר אלמקדס ואנת ובנוך מעך תחמלון וזר אמאמתכם

ואיצ̇א אכ̇ותך סבט לוי סבט אביך קדמהם אליך פינצ̇אפו אליך ויכ̇דמוך ואנת ובנוך מעך פקט בין ידי כ̇בא אלשהאדה

ויחפט̇ו מחפט̇ך ומחפט̇ ג̇מיע אלכ̇בא ואמא אלי אניה אלקדס ואלי אלמד̇בח לא יתקדמו כילא יהלכו איצ̇א הם ואיצ̇א אנתם

ואלמנצ̇אפון אליך יחפט̇ון חפט̇ כ̇בא אלמחצ̇ר וג̇מיע כ̇דמתה ואג̇נבי לא יתקדם אליכם

ותחפט̇ון חפט̇ אלקדס וחפט̇ אלמד̇בח ולא יכון זיאדה סכ̇ט עלי בני אסריאל

פאני קד אכ̇ד̇ת אכ̇ותכם אלליואניין מן בין בני אסראיל וג̇עלתהא הבה לכם ללה ליכ̇דמו כ̇דמה כ̇בא אלמחצ̇ר

ואנת ובנוך מעך תחפט̇ון אמאמתכם לג̇מיע אמור אלמד̇בח ודאכ̇ל אלסג̇ף ותכ̇דמונה פקד ג̇עלת אמאמתכם כ̇דמה מוהובה ואי אג̇נבי תקדם אליהא פליקתל

ת̇ם כלם אללה הרון פקאל אני קד אעטיתך חפט̇ רפאיעי מן ג̇מיע אקדאס בני אסראיל אעטיתהא לך מסחא ולבניך רסם אלדהר

הד̇א יכון לך מן כ̇ואץ אלאקדאס מן בעד אלמחרק מן ג̇מיע קראבינהם וברהם וד̇כותהם וקרבאן אלאת̇ם אלד̇י יאתוני בה פהו מן כ̇ואץ אלאקדאס לך ולבניך

ובכ̇אץ אלטהר תאכלה כל ד̇כר יאכל מנה כד̇אך יכון לך קדסא

והד̇ה לך רפאיע עטאיאהם מן ג̇מיע מחרכאת בני אסראיל לך אעטיתהא ולבניך ולבנאתך מעך רסם אלדהר וכל טאהר פי מנזלך יאכלהא

וג̇מיע אג̇וד אלדהן ואלעציר ואלבר אואילהא אלתי יג̇עלונהא ללה קד ג̇עלתהא לך

ובכור כל מא פי ריאצ̇הם אלתי יאתון בהא ללה תכון לך וכל טאהר פי מנזלך יאכלהא

וג̇מיע צואף פי אל אסראיל יכון לך

וכל אול בטן מן כל בשרי אלד̇י יקדמונה ללה מן אנסאן ובהימה יכון לך לכן יג̇ב אן תפדי בכור אלנאס ובכור אלבהימה אלנג̇סה

ופדא אלנאס מן אבן שהר בקימתה כ̇מסה מת̇אקיל פצ̇ה במת̇קאל אלקדס והו עשרון דאנקא

פאמא בכור אלבקר ואלצ̇אן ואלמאעז פלא תפדהא פאנהא מקדסה רש דמהא עלי אלמד̇בח וקתר שחומהא קרבאנא מקבולא מרצ̇יא ללה

ולחמהא יכון לך כקץ אלתחריך וסאק אלימני יכון לך

וסאיר רפאיע אלאקדאס אלתי ירפעונהא בנו אסראיל ללה ג̇עלתהא לך ולבניך ולבנאתך מעך רסם אלדהר עהד ת̇בת אלדהר הו ללה לך ולנסלך מן בעדך

ת̇ם קאל אללה לה פי ריאצ̇הם לא תנחל ולא יכן לך קסם פימא בינהם פאני קד ג̇עלת קסמך ונחלתך פימא בין בני אסראיל

ולבני לוי קד ג̇עלת כל עשר מן אל אסראיל נחלה בדל כ̇דמתהם אלד̇ין יכ̇דמון כ̇בא אלמחצ̇ר

ולא יתקדם איצ̇א בנו אסראיל אלי כ̇בא אלמחצ̇ר פיחמלון וזרא ויהלכון

ויכ̇דם אלליואניון וחדהם כ̇בא אלמחצ̇ר והם יחמלון וזרהם רסם אלדהר עלי מר אג̇יאלהם ופימא בין אסראיל לא ינחלו נחלה

פאן עשור בני אסראיל אלתי ירפעונהא ללה רפיעה ג̇עלתהא ללליואניין נחלה פלד̇לך קלת להם פי מא בין בני אסראיל לא ינחלו נחלה

וכלם אללה מוסי קאילא

ומר אלליואניין וקל להם אד̇א תאכ̇ד̇ון מן בני אסראיל אלעשור אלתי ג̇עלתהא לכם מנהם בנחלתכם פארפעו מנהא רפיעה ללה עשרא מן אלעשור

וד̇לך אן תחסב לכם רפאיעכם כאלבר לבני אסראיל מן אלבד̇אר וכאלסלאפה מן אלתגאר

פכד̇אך תרפעו אנתם איצ̇א רפיעה ללה מן ג̇מיע אעשארכם אלתי תאכ̇ד̇ונהא מן בני אסראיל ואעטו רפיעה אללה מנהא להרון אלאמאם

וליכן מא תרפעונהא ללה מן ג̇מיע עטאיאכם אג̇ודהא ואכ̇צהא מנהא

וקל להם אד̇א רפעתם אג̇ודה מנה צאר אלבאקי לכם יא ליואניון כגלה בני אסראיל מן אלבד̇אר ואלתגאר

וג̇איז אן תאכלה פי כל מוצ̇ע אנתם ואהלכם לאנה אג̇רתכם בדל כ̇דמתכם פי כ̇בא אלמחצ̇ר

ולא תחמלו ענה וזרא ענד רפעכם אג̇ודה מנה ואקדאס בני אסראיל לא תבד̇לוהא ולא תהלכו