תפסיר רס"ג, במדבר יב

תכלמת מרים והרון פי מוסי בסבב אלמראה אלחסנא אלתי תזוג̇הא לאנה כאן קד אעתזלהא

וקאלא אן כאן מן אג̇ל אלנבוה אפתראה וחדה פקט כ̇אטבה אללה אליס קד כ̇אטבנא איצ̇א פסמע אללה ד̇לך

וכאן מוסי כ̇אשעא ג̇דא אכת̇ר מן ג̇מיע אלנאס אלד̇ין עלי וג̇ה אלארץ̇

פקאל אללה גפלה למוסי והרון ומרים אכ̇רג̇ו ת̇לת̇אתכם אלי כ̇בא אלמחצ̇ר פכ̇רג̇ו ת̇לאת̇תהם

פתג̇לי אללה בעמוד גמאם וקאם עלי באב אלכ̇בא ונאדא יא הרון ויא מרים פכ̇רג̇א כלאהמא

קאל אסמעא כלאמי אן יכון נביכמא אנא אללה תערפת בה פי רויא או כ̇אטבתה פי חלם

פליס כד̇אך עבדי מוסי בל פי ג̇מיע אמתי מחקק הו

אן שפאהא אכ̇אטבה ורויא ולא באחאדית̇ וצור אללה אלמכ̇לוקה לה יראהא פמא באלכמא לם תכ̇אפא אן תתכלמא פי עבדי מוסי

פאשתד גצ̇ב אללה עליהמא וארתפע נורה

פכמא זאל אלגמאם ען אלכ̇בא פאד̇א במרים ביצ̇א כאלת̇לג̇ פלמא אלתפת הרון אלי מרים פאד̇א בהא ברצא

פקאל למוסי יא סידי לא תג̇על עלינא כ̇טיה פימא ג̇הלנא ואכ̇טאנא

ולא תבק הד̇ה כסקט כ̇רג̇ מן בטן אמה וקד תהרא נצף ג̇סמה

פדעי מוסי רבה קאילא אללהם פאשפהא

פקאל אללה לה ולו אן אבאהא בצק פי וג̇ההא אלם יג̇ב אן תסתחי מנה סבעה איאם פלתקף כד̇אך כ̇ארג̇ אלעסכר ובעד ד̇לך תנצ̇ם אליה

פוקפת מרים כ̇ארג̇ אלעסכר סבעה איאם ולם ירחל אלקום אלי אנצ̇מאמהא

ובעד ד̇לך רחלו אלקום מן חצרות ונזלו פי בריה פארן