תפסיר רס"ג, במדבר יא

וכאן אלקום כמעתני אלשר בין ידי אללה פסמע אללה ד̇לך ואשתד גצ̇בה ואשתעלת פיהם נארה פאחרקת פי טרף אלעסכר

פצרך̇ אלקום אלי מוסי פדעי רבה פגארת אלנאר

וסמא ד̇לך אלמוצ̇ע אלמשתעלה למא אשתעלת פיהם נאר אללה

ואללפיף אלד̇ין פימא בינהם תשהו שהוה פרג̇ע בנו אסראיל איצ̇א מעהם ובכו וקאלו מן יטעמנא לחמא

ד̇כרנא אלסמך אלד̇י כנא נאכלה במצר מג̇אנא ואלקת̇א ואלבטיך̇ ואלכראת̇ ואלבצל ואלת̇ום

ואלאן אנפסנא יאבסה ממא ליס לנא שי ואנמא עיוננא אלי אלמן ממדודה

וכאן אלמן כבזר אלכזברה ולונה כלון אללולו

יטוף אלקום פילקטונה ויטחנון מנה פי אלרחא או ידקון פי אלמדק ויטבכ̇ון מנה פי אלבראם ויצנעון מנה מלילא ויכון טעמה כחלאוה בדסם

וענד נזול אלטל עלי אלעסכר לילא ינזל אלמן עליה

פלמא סמע מוסי אלקום יבכון לעשאירהם כל אמר עלי באב כ̇באה פאשתד גצ̇ב אללה ג̇דא וסא ד̇לך ענד מוסי

קאל מוסי ללה לם אבלית עבדך ולם לם אג̇ד חט̇אא ענדך אד̇ צירת כלפה ג̇מיע האולי אלקום עלי

הל אנא חמלתהם אם ולדתהם אד̇ קלת לי ססהם באנך תחמלהם פי חג̇רך כמא יחמל אלחאצ̇ן אלרצ̇יע אלי אלבלד אלד̇י אקסמת לאבאיהם

מן אין לי לחם אעטי ג̇מיעהם אד̇ יבכון עלי פיקולון אעטנא לחמא נאכלה

לא אטיק אנא וחדי אן אסוסהם בל הו תיקיל עלי

ואן כנת אלזמתניה עקובה פאג̇עלהא אמאתתי אן וג̇דת חט̇אא ענדך ולא ארי בליתי

פקאל אללה למוסי אג̇מע לי סבעין רג̇לא מן שיוך̇ אסראיל אלד̇ין תעלם אנהם שיוכ̇הם וערפאהם וכ̇ד̇הם אלי כ̇בא אלמחצ̇ר יקפו ת̇ם מעך

חתי אתג̇לי פאכ̇אטבך הנאך ואפידהם מן אלנור אלד̇י עלי וג̇הך ואג̇עלה עליהם פיעאונוך עלי סיאסה אלקום ולא תסוסהם אנת וחדך

וקל אלי אלקום אסתעדו אלי גד חתי תאכלו לחמא לאג̇ל מא בכיתם בין ידי אללה וקלתם מן יטעמנא לחמא ומא כאן אצלח לנא פי מצר ויעטיכם אללה לחמא תאכלונה

לא יומא ואחדא ולא יומין תאכלון ולא כ̇מסה ולא עשרה ולא עשרין

אלא אלי איאם שהר אלי אן יכ̇רג̇ מן אנאפכם מת̇לא ויציר לכם הזאלה לאג̇ל מא זהדתם פי נור אללה אלד̇י פי מא בינכם ובכיתם בין ידיה וקלתם לם אכ̇רג̇נא מן מצר

קאל מוסי סת מאיה אלף רג̇אל אלקום אלד̇ין אנא פי מא בינהם ואנת קלת אני אעטיהם לחמא יאכלונה שהרא

פמן אגנא ענהם אגנם ובקר תד̇בח להם פתכפיהם או ג̇מיע סמך אלבחר יחאש להם פיקנעהם

פקאל אללה למוסי הל קדרה אללה תקצר אלאן תנט̇ר איואפיכם כלאמי אם לא

פכ̇רג̇ מוסי ואכ̇בר אלקום בג̇מיע כלאם אללה וג̇מע סבעין רג̇לא מן שיוכ̇הם ואוקפהם חואלי אלכ̇בא

פתג̇לי אללה פי אלגמאם וכ̇אטבה ואפאד מן אלנור אלד̇י עליה וג̇עלה עלי אלסבעין אלשיוך̇ פלמא אסתקר עליהם ד̇לך אלנור תנבו ולם יחתאג̇ו אלי עודה

ובקי רג̇לאן פי אלעסכר אסם אחדהמא אלדד ואלאכ̇ר מידד פאסתקרת עליהמא אלנבוה והמא מן אלמכתובין לם יכ̇רג̇א אלי אלכ̇בא בל תנביא פי אלעסכר

פחאצ̇ר גלאם פאכ̇בר מוסי אן אלדד ומידד מתנביאן פי אלעסכר

פאג̇אבה יהושע בן נון כ̇אדם מוסי מן תלאמיד̇ה וקאל יא סידי יא מוסי אחבסהמא

קאל לה מוסי הל תגאר לי לית צאר אמה אללה אנביא באן יג̇על אללה מן נורה ונבותה עליהם

פלמא אנצ̇ם מוסי אלי אלעסכר הו ושיוך̇ בני אסראיל

הבת ריח מן ענד אללה פקטעת סלוי מן אלבחר ואלקתה עלי אלעסכר שביה במסיר יום ימנה ויום יסרה חואליה וארתפאעה מן אלארץ̇ מת̇ל ד̇רעין

פאקאם אלקום באקי יומהם ולילתהם וטול נהאר ג̇דהם פג̇מעו אלסלוי אקלהם ג̇מע עשרה אנאביר פסטחוהא להם סטיחא חואלי אלעסכר

אללחם בעד בין אסנאנהם קבל אן ימצ̇גוה אד̇ אשתד גצ̇ב אללה עליהם פצ̇רבהם צ̇רבה עט̇ימה ג̇דא

פסמי ד̇לך אלמוצ̇ע קבור אלשהוה לאנהם דפנו פיה אלקום אלמשתהיין

ורחלו מנה אלי חצרות פלמא אקאמו בהא