תפסיר רס"ג, במדבר יג

ת̇ם כלם אללה מוסי תכלימא

אבעת̇ ברג̇אל ירומו בלד כנעאן אלד̇י אנא מעטיה לבני אסראיל רג̇לא ואחדא מן סבט אבאיה תבעת̇ו בה כל שריף מנהם

פבעת̇ בהם מוסי מן בריה פארן עלי קול אללה וכלהם רג̇אל רוסא בני אסראיל

והד̇ה אסמאוהם מן סבט ראובן שמוע בן זכור

ומן סבט שמעון שפט בן חורי

ומן סבט יהודה כלב בן יפנה

ומן סבט יששכר יגאל בן יוסף

ומן סבט אפרים הושע בן נון

ומן סבט בנימן פלטי בן רפוא

ומן סבט זבולן גדיאל בן סודי

ומן סאיר סבט יוסף ומן סבט מנשה גדי בן סוסי

ומן סבט דן עמיאל בן גמלי

ומן סבט אשר סתור בן מיכאל

ומן סבט נפתלי נחבי בן ופסי

ומן סבט גד גאואל בן מכי

הד̇ה אסמא אלרג̇אל אלד̇ין בעת̇ בהם מוסי לירומו אלבלד וסמי מוסי הושע בן נון יהושע

ולמא בעת̇ בהם מוסי לירומו בלד כנעאן קאל להם אצעדו אולא אלי אלדארום ת̇ם אצעדו אלי אלג̇בל

ואנט̇רו אלבלד מא הו ואלקום אלמקימין בה אשדיד הו אם מסתרך̇ אקליל הו אם כת̇יר

ומא אלארץ̇ אלתי הו סאכנהא אג̇ידה הי אם רדיה ומא אלקרי אלתי הו סאכנהא אפי ארבאץ̇ אם פי חצון

ומא היה אלארץ̇ אהי סמינה אם הזלי והל פיהא שג̇ר מגרוס אם לא ותשדדו וכ̇ד̇ו מן ת̇מרהא והד̇א אלפצל איאם בכור אלענב

פצעדו וראמו אלבלד מן בריה צין אלי רחוב אלי חמאה

פצעדו אולא אלי אלדארום וג̇או אלי חברי ות̇ם אחימן וששי ותלמי בנו אלג̇באברה וכאנת חברי קד בנית קבל צען מנבר מצר בסבע סנין

וג̇או אלי ואדי אלענקוד וקטעו מן ת̇ם חבלה וענקוד ענב ואחדא וחמלוה באלדהק פימא בין את̇נין ומן אלרמאן ומן אלתין

פלד̇לך סמי אלמוצ̇ע ואדי אלענקוד בסבב אלענקוד אלד̇י קטעוה מן ת̇ם בנו אסראיל

ורג̇עו מן ריאם אלבלד בעד ארבעין יומא

וסארו חתי ג̇או אלי מוסי והרון וסאיר ג̇מאעה בני אסראיל אלי בריה פארן אלי רקים פאג̇אבוהמא באלכ̇בר וסאיר אלג̇מאעה ואורוהם ת̇מר אלארץ̇

וקצו עליה וקאלו צרנא אלי אלבלד אלד̇י בעת̇ת בנא אליה וחקא אנה יפיץ̇ אללבן ואלעסל והד̇א ת̇מרה

כ̇לא אן אלקום אלמקימין בה עזיזון ואלקרי חזינה עט̇ימה ג̇דא ואיצ̇א אולאד אלג̇באברה ראינאהם ת̇ם

ואלעמאלקה מקימון פי בלד אלדארום ואלחתיון ואליבוסיון ואלאמוריון סכאן פי אלג̇בל ואלכנעאני סאכן עלי אלבחר ועלי שאטי אלארדן

פאסכת כלב אלקום אלי קול מוסי וקאל בל נצעד צעודא ונחוזהם פאנא נטיקהם

ואלקום אלד̇ין מצ̇ו מעה קאלו לא נטיק אן נצעד אלי אלקום לאנהם אשד מנא

ואכ̇רג̇ו שנאעה עלי אלבלד אלד̇י ראמוה אלי בני אסראיל וקאלו אלבלד אלד̇י מררנא בה פרמנאה הו בלד יהלך אהלה וג̇מיע אלקום אלד̇ין ראינאהם פיה ד̇וו מסאחה

וראינא ת̇ם אלעלוג̇ בני אלג̇באברה מן עלוג̇הם פצרנא פי עיוננא כאלג̇ראד וכ̇דאך כנא פי עיונהם