תפסיר רס"ג, ויקרא כז

ת̇ם כלם אללה מוסי קאילא

מר בני אסראיל וקל להם אי אנסאן סוג נד̇רא מן אלנפוס ללה פליקום

פיכון קימה אלד̇כר מן עשרין סנה אלי סתין סנה כ̇מסין מת̇קאל פצ̇ה במת̇קאל אלקדס

ואן כאנת אנת̇י פקימתהא ת̇לאת̇ון מת̇קאלא

ואן כאן מן אבן כ̇מס סנין אלי עשרין פקימה אלד̇כר עשרון מת̇קאלא ואלאנת̇י עשרה

ואן כאן מן אבן שהר אלי כ̇מס סנין פקימה אלד̇כר כ̇מסה מת̇אקיל פצ̇ה ואלאנת̇י ת̇לאת̇ה מת̇אקיל

ואן כאן מן סתין סנה פצאעדא פקימה אלד̇כר כ̇מסה עשר מת̇קאלא ואלאנת̇י עשרה מת̇אקיל

ואן כאן מהינא מן אלקימה פליוקף בין ידי אלאמאם ויקומה חסב מא תנאל יד אלנאד̇ר כד̇אך יקומה אלאמאם

ואן כאנת בהימה תצלח אן יקרב מנהא קרבאנא ללה פכל מא יג̇על מן ד̇לך ללה יכון קדסא בעינה

לא יבדלה ולא יגירה ג̇ידא ברדי ולא רדיא בג̇יד פאן גיר בהימה בבהימה פקד צאר הו ובדילה קדסא

ואן כאנת בהימה נג̇סה או מא לא יקרב מנהא קרבאנא ללה פלתוקף בין ידי אלאמאם

פיקומהא אלאמאם עלי ג̇ודתהא או רדאתהא ויכון אלואג̇ב כמא קום אלאמאם

ואן שא פכאכהא פליזד עלי אלקימה כ̇מסהא

ואי רג̇ל אקדס ביתה קדסא ללה פליקומה אלאמאם עלי ג̇ודתה או רדאתה וכמא יקומה כד̇אך יג̇ב

פאן שא אלמקדס פכאך מנזלה פליזד עלי קימתה כ̇מסהא ויכון לה

ואן אקדס רג̇ל ללה שיא מן צ̇יעה חוזה פלתכן אלקימה עלי קדר בד̇רה כל מבד̇ר כר מן שעיר כ̇מסין מת̇קאלא מן פצ̇ה

פאן אקדס צ̇יעתה מן סנה אלאטלאק פאלקימה ת̇אבתה בחאלהא

פאן אקדסהא בעד סנה אלאטלאק פליחסב לה אלאמאם אלדראהים עלי קדר אלסנין אלבאקיאת אלי סנה אלאטלאק וינקץ מן קימתה

ואן שא אלרג̇ל אלמקדס אלצ̇יעה אן יפתכהא פליזד עלי אלקימה כ̇מסהא פתג̇ב לה

ואן לם יפתכהא ובאעהא אלאמין לרג̇ל אכ̇ר פלא תפתך אבדא

ותכון ענד כ̇רוג̇הא מן יד אלמשתרי פי סנה אלאטלאק קדסא ללה כצ̇יאע אלצואפי ותציר ללאמאם

ואן אקדס ללה מן צ̇יעה אשתראהא וליסת לה בחוז

פליחסב לה אלאמאם תקסיט אלקימה מן סנתה אלי סנה אלאטלאק פידפע אלקימה פי ד̇לך אליום קדסא ללה

ותרג̇ע אלצ̇יעה פי סנה אלאטלאק ללבאיע אלד̇י אשתראהא מנה לאלד̇י לה חוז אלארץ̇

וג̇מיע קימתך תכון במת̇אקיל אלקדס כל מת̇קאל עשרון דאנקא

ואמא בכר יבכר ללה מן אלבהאים פלא יחתאג̇ אן יקדסה אנסאן אן כאן מן אלגנם ואלבקר פהו ללה

ואן אקדס שיא מן אלבהאים אלנג̇סה פליפדה בקימתה ויזד עליהא כ̇מסהא ואן לם יפתכהא פליבע בקימתה

ואמא כל צואף יג̇עלהא אלאנסאן ללה מן ג̇מיע מאלה מן עביד ובהאיס וצ̇יעה חוזה פלא יבאע ולא יפתך בל יכון מן כ̇ואץ אלאקדאס ללה

וכל מתלוף יסתחק אלתלף מן אלנאס פלא יפדא בל יקתל קתלא

וג̇מיע עשור אלארץ̇ מן חבהא ומן ת̇מר אלשג̇ר פהו ללה קדס

ואן אפך רג̇ל שיא מן עשורה פליזד עליה כ̇מס ת̇מנה

וג̇מיע עשור אלבקר ואלגנם מא יג̇וז תחת אלעצא פאלעאשר יכון קדסא ללה

לא יפחץ ענה בין ג̇יד או רדי ולא יגירה פאן גירה פקד צאר הו ובדילה קדסא ללה לא יפך

הד̇ה אלוצאיא אלתי אמר בהא מוסי לבני אסראיל פי ג̇בל סיני