תפסיר רס"ג, ויקרא כו

לא תצנעו לכם אות̇אנא ומנחותא ונצבא לא תקימו לכם וחג̇רא מזכ̇רפא לא תצ̇עו פי בלדכם לתסג̇דו לה לאני אללה רבכם אלואחד

סבותי פאחפט̇ו ומקדסי פהאבוה אנא אללה רבכם אג̇אזיכם כ̇ירא

אלא אן סרתם פי רסומי וחפט̇תם וצאיאי ועמלתם בהא

אנזלת אגיאת̇כם פי וקתהא פאכ̇רג̇ת אלארץ̇ אדאהא ושג̇ר אלצחרא יכ̇רג̇ ת̇מרה

חתי ידרך לכם אלדיאס אלקטאף ואלקטאף ידרך לכם אלבד̇אר ותאכלון טעאמכם הניא ותקימון ואת̇קין פי בלדכם

ואג̇על לכם אלסלאמה פי אלארץ̇ פתנצ̇ג̇עון וליס מזעג̇ ואעטל שר אלחיואן אלמפסד מן אלארץ̇ וסיף לא ימר בבלדכם.

ואד̇א כלבתם אעדאכם וקעו בין ידיכם תחת סיפכם

חתי יכלב מנכם אלכ̇מסה מאיה ואלמאיה תכלב רבוה ויקע אעדאכם בין ידיכם תחת אסיאפכם

ואקבל ברחמתי אליכם ואת̇מרכם ואכת̇רכם ואפי בעהדי לכם

ותאכלון עתיק אלמעתק ותכ̇רג̇ון אלעתיק מן חצ̇רה אלחדית̇

ואג̇על מסכני פי מא בינכם ולא אקלאכם

ואסיר נורי פי מא בינכם ואכון לכם אלאהא ואנתם תכונו לי שעבא

אנא אללה רבכם אלד̇י אכ̇רג̇תכם מן בלד מצר מן אן תכונו להם עבידא וכסרת קראביס אסרכם וסירתכם אחרארא

פאן לם תסמעו לי ולם תעמלו בג̇מיע הד̇ה אלוצאיא

ואן זהדתם פי רסומי ואחכאמי ואקלאת אנפסכם לילא תעמלו וצאיאי ותפסכ̇ו עהדי

אנא איצ̇א אצנע בכם הד̇ה אלעקובאת פאוכל בכם עלי סרעה מן חמי אלסל ואלחארה מא תשכ̇ץ עיונכם ותד̇בל נפוסכם ותזרעון זרעכם ללפראג או יאכלה אעדאכם

ואחל גצ̇בי בכם פתנצדמון בין ידי אעדאיכם ויסתולי עליכם שאניכם פתהרבון ולא כאלב לכם

ואן לם תקבלו מני מע הד̇ה זדתכם פי אלתאדיב סבעא עלי כ̇טאיאכם

ואכסר אקתדאר עזכם וג̇עלת סמאכם כאלחדיד וארצ̇כם כאלנחאס

פיפנא קואכם פראגא ולא תכ̇רג̇ ארצ̇כם אדאהא ושג̇ר אלצחרא לא יכ̇רג̇ ת̇מרה

ואן סלכתם מעי לג̇אג̇א ולם תשאו אן תסמעו לי זדתכם צ̇רבה הי סבע ככ̇טאיאכם

ואטלק פיכם חיואן אלצחרא פית̇כל מנכם ויקטע מן בהאימכם ויקלל עדדכם ותתוחש טרקאתכם

ואן לם תתאדבו לי בהד̇ה אלעקובאת וסלכתם מעי לג̇אג̇א

וסרת אנא איצ̇א מעכם עלי לג̇אג̇ וצ̇רבתכם בסבע עלי כ̇טאיאכם

ואג̇זיכם סיפא מנתקמא נקמה אלעהד פתג̇תמעון אלי קראכם ואבעת̇ אלובא פי מא בינכם ותסלמון ביד אלעדו

ואכסר לכם מעונה אלטעאם ויכ̇בזו כת̇ירה מן אלנסא טעאמכם פי תנור ואחד וירדדנה פי אלמיזאן ותאכלון ולא תשבעון

ואן לם תסמעו לי ותטיעו בהד̇ה אלעקובאת וסלכתם מעי לג̇אג̇א

סרת איצ̇א בעקובה אללג̇אג̇ ואדבתכם סבעא עלי כ̇טאיאכם

פתאכלון לחום בניכם ובנאתכם

ואנפד̇ ביעכם ואקטע אנדאדכם ואלקי אג̇סאדכם עלי אג̇סאד טואגיתכם ואקלאכם

ואג̇על קראכם כ̇ראבא ואוחש מקאדסכם ולא אקבל ולא ארצ̇א קראבינכם

ואוחש אלבלד מנכם ויסתוחש מנה אעדאכם אלמקימון בה

ואד̇ריכם פי מא בין אלאמם ואג̇רד וראכם אלסיף פתציר ארצ̇כם וחשה וקראכם כ̇ראבא

חיניד̇ תסתופי אלארץ̇ עטלהא טול איאם וחשתהא ואנתם פי בלד אעדאיכם חיניד̇ תתסיב אלארץ̇ ותסתופי עטלהא

וסבב טול איאם וחשתהא אן תתעטל כמא לם תעטלוהא פי עטלכם פי מקאמכם בהא

ואלבאקון מנכם אדכ̇ל אלג̇בן פי קלובהם פי בלדאן אעדאיהם חתי אנה לו לחקהם צות ורקה מנדפעה להרבו כאלהרב מן אלסיף ווקעו וליס כאלב

ועת̇ר בעצ̇הם בבעץ̇ כמא יכון מן קבל אלסיף וליס כאלב ולא יכון לכם קיאם מן בין ידי אעדאיכם

ויביד מנכם פי מא בין אלאמם ויפניכם בלד אעדאיכם

ואלבאקון מנכם יכ̇שעון בד̇נובהם פי בלדאן אעדאיהם ואיצ̇א בד̇נוב אבאיהם אלד̇ין מעהם יכ̇שעון

פאן אקרו בד̇נובהם וד̇נב אבאיהם בנכת̇הם אלד̇י נכת̇ו בי ואיצ̇א במא סלכו מעי לג̇אג̇א ולם יתובו

אנא איצ̇א אסיר מעהם עלי אללג̇אג̇ ואדכ̇להם בלדאן אעדאיהם אכ̇רין או אלי אן ינהזם קלבהם אלגאש או אלי אן יסתופי ד̇נובהם

ואד̇כר עהדי אלד̇י מע יעקוב ואיצ̇א עהדי אלד̇י מע אסחק ואיצ̇א עהדי אלד̇י מע אברהים אד̇כרה להם ולארצ̇הם

אלארץ̇ אלתי תרכת מנהם ואסתופת עטלהא באסתיחאשהא מנהם והם אסתופו ד̇נובהם ג̇זאהם אד̇ זהדו פי אחכאמי ורסומי אקלתהא אנפסהם

ואיצ̇א מע הד̇ה אלאמור פי כונהם פי בלד אעדאיהם לא אזהד פיהם ולא אקלאהם ולא אפניהם ולא אפסך̇ עהדי מעהם לאני אללה רבהם

ואד̇כר להם עהד אלאולין אלד̇י אכ̇רג̇תהם מן בלד מצר בחצ̇רה אלאמם לאכון להם אלאהא אנא אללה רבכם אלצאדק אלועד

הד̇ה אלרסום ואלאחכאם ואלדלאיל אלתי ג̇עלהא אללה בינה ובין בני אסראיל עלי טור סיני על יד מוסי