תפסיר רס"ג, במדבר א

וכלם אללה מוסי פי בריה סיני פי כ̇בא אלמחצ̇ר פי אליום אלאול מן אלשהר אלת̇אני מן אלסנה אלת̇אניה לכ̇רוג̇הם מן בלד מצר קאילא

ארפעו ג̇מלה ג̇מאעה בני אסראיל לעשאירהם וביות אבאיהם באחצא אסמא כל ד̇כר לג̇מאג̇מהם

מן אבן עשרין סנה פצאעדא כל מן יכ̇רג̇ אלי ג̇יש בני אסראיל תחציהם לג̇יושהם אנת והרון

וליכן מעכם רג̇ל מן כל סבט והד̇א אלרג̇ל הו רייס בית אביה

והד̇ה אסמא אלרג̇אל אלד̇ין יקומון מעכם מן ראובן אליצור בן שדיאור

ומן שמעון שלמיאל בן צורישדי

ומן יהודה נחשון בן עמינדב

ומן יששכר נתנאל בן צוער

ומן זבולן אליאב בן חלן

ומן בני יוסף פמן אפרים אלישמע בן עמיהוד ומן מנשה גמליאל בן פדהצור

ומן בנימן אבידן בן גדעני

ומן דן אחיעזר בן עמישדי

ומן אשר פגעיאל בן עכרן

ומן גד אליסף בן דעואל

ומן נפתלי אחירע בן עינן

האולי דעאה אלג̇מאעה אשראף אסבאט אבאיהם והם רוסא אלוף בני אסראיל

פאכ̇ד̇ מוסי והרון האולי אלרג̇אל אלד̇ין שרחת אסמאוהם

וג̇וקו ג̇מיע אלג̇מאעה פי אליום אלאול פי אלשהר אלת̇אני פתנסבו לעשאירהם וביות אבאיהם באחצא אלאסמא מן אבן עשרין סנה פצאעדא לג̇מאג̇מהם

כמא אמר אללה מוסי עדהם פי בריה סיני

פכאן בנו ראובן בכר אסראיל תאלידהם לעשאירהם לביות אבאיהם באחצא אסמא לג̇מאג̇מהם כל ד̇כר מן אבן עשרין סנה פצאעדא כל מן יכ̇רג̇ פי ג̇יושהם

ואלמעדודון כד̇לך מנהם סתה וארבעון אלפא וכ̇מס מאיה

ואלמעדודון כד̇לך מן בני שמעון תאלידהם לעשאירהם לביות אבאיהם באחצא אסמא לג̇מאג̇מהם כל ד̇כר מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט שמעון תסעה וכ̇מסון אלפא ות̇לאת̇ מאיה

ואלמעדודון כד̇לך מן בני גד תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט גד כ̇מסה וארבעון אלפא וסת מאיה וכ̇מסון

ואלמעדודון כד̇לך מן בני יהודה תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט יהודה ארבעה וסבעון אלפא וסת מאיה

ואלמעדודון כד̇לך מן בני יששכר תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט יששכר ארבעה וכמסון אלפא וארבע מאיה

ואלמעדודון כד̇לך מן בני זבולון תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט זבולון סבעה וכ̇מסון אלפא וארבע מאיה

ואלמעדודון כד̇לך מן יוסף פמן אפרים תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט אפרים ארבעון אלפא וכ̇מס מאיה

ואלמעדודון כד̇לך מן בני מנשה תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט מנשה את̇נאן ות̇לאת̇ון אלפא ומיאתאן

ואלמעדודון כד̇לך מן בני בנימן תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט בנימן כ̇מסה ות̇לאת̇ון אלפא וארבע מאיה

ואלמעדודון כד̇לך מן בני דן תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט דן את̇נאן וסתון אלפא וסבע מאיה

ואלמעדודון כד̇לך מן בני אשר תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט אשר אחד וארבעון אלפא וכ̇מס מאיה

ואלמעדודון כד̇לך מן בני נפתלי תאלידהם לעשאירהם לביות אבאיהם באחצא אסמא מן אבן עשרין סנה פצאעדא כל כ̇ארג̇ ג̇ישה

ואלמעדודון לסבט נפתלי ת̇לאת̇ וכ̇מסון אלפא וארבע מאיה

האולי אלמעדודון אלד̇ין עדהם מוסי והרון ואשראף אסראיל אלאת̇ני עשר רג̇לא כל ואחד מנהם שריף בית אבאיה

וכאן מן עדה מנהם מנסובא אלי בית אביה מן אבן עשרין סנה פצאעדא כל מן יכ̇רג̇ פי ג̇יושהם

פד̇לך ג̇מלה עדדהם סת מאיה אלף ות̇לאת̇ אלאף וכ̇מס מאיה וכ̇מסון

ואמא אלליואניון לסבט אבאיהם פלם יעדו מעהם

ת̇ם כלם אללה מוסי קאילא

אמא סבט לוי לא תעדה ולא תרפע ג̇מלתהם פי מא בין בני אסראיל

ואנת פוכל אלליואניין עלי מסכן אלשהאדה ועלי ג̇מיע אניתה וג̇מיע מא לה פהם יחמלון אלמסכן וג̇מיע אניתה והם יכ̇דמונה וחואליה ינזלון

ופי רחילה יפצלוה אלליואניון ופי מולה ינצבוה אלליואניון ואי אג̇נבי תקדם אלי ד̇לך פליקתל

וינזלו בנו אסראיל כל סבט פי עסכרה פי מרכזה עלי ג̇יושהם

ואלליואניון ינזלון חואלי מסכן אלשהאדה לילא יכון סכ̇ט עלי גמאעה בני אסראיל ויחפט̇ון אלליואניון מא אסתחפט̇תהם מן ד̇לך

פצנע בנו אסראיל בג̇מיע מא אמר אללה מוסי