תפסיר רס"ג, ויקרא כה

ת̇ם כלם אללה מוסי פי טור סיני תכלימא

מר בני אסראיל וקל להם אד̇א תדכ̇לו אלי אלבלד אלד̇י אנא מעטיכם פעטלו אלארץ̇ עטלה ללה

אן תכון סת סנין תזרע צ̇יעתך וסת סנין תרפק כרמך ותג̇מע גלתהא

ופי אלסנה אלסאבעה עטלה ללארץ̇ הי סבת ללה פלא תזרע צ̇יעתך ולא תרפק כרמך

וכ̇לף זרעך לא תחצדה ואלפראד מן ענבך פלא תקטפה לאהא סנה עטלה ללארץ̇

וליכן מא ינבת פי אלארץ̇ אלמעטלה לכם מאכלא לך ולעבדך ולאמתך ואג̇ירך וצ̇יפך אלמקימין מעך

ולבהאימך וללוחש אלד̇י פי ארצ̇ך תכון ג̇מיע גלאתהא מאכלא

ת̇ם אחץ לך סבע סנין עטלה וד̇לך סבע סנין סבע מראר פתציר ג̇מלה ד̇לך תסע וארבעין סנה

ואצ̇רב בבוק מג̇לב פי אליום אלעאשר מן אלשהר אלסאבע והו יום אלגפראן אצ̇רבו פיה באלבוק פי ג̇מיע בלדכם

וקדסו הד̇ה אלסנה אלכ̇מסין ונאדו בעתק פי אלבלד לג̇מיע אהלה פיכון לכם אטלאקא ירג̇ע פיה כל אמר אלי עשירתה ואלי חוזה

ומן שרוט הד̇ה סנה אלאטלאק סנה אלכ̇מסין אן לא תזרעו פיהא ולא תחצדו כ̇לפהא ולא תקטפו פראדהא

לאנהא סנה אלאטלאק תכון לכם מקדסה ומן אלצחרא תאכלו גלתהא מבאחה

ופי הד̇ה סנה אלאטלאק ירג̇ע כל אמר אלי חוזה

ואד̇א בעת ביעא לצאחבך או אבתעת מנה פלא יגבן כל ואחד אכ̇אה

באחצא סנין מן בעד סנה אלאטלאק תשתרי מן צאחבך ובאחצא גלתהא יביעך הו

פעלי קדר כת̇רה אלסנין יג̇ב אן תכת̇ר לה אלת̇מן ועלי קדר קלתהא יג̇וז אן תקללה לאנה אנמא יביעך גלאת מחצאת

ולא יגבנו כל ואחד צאחבה וכ̇ף רבך פאני אללה רבכם אלמעאקב

ואעמלו רסומי ואחכאמי ואחפט̇והא ואסכנו אלבלד ואת̇קין

ותכ̇רג̇ אלארץ̇ ת̇מרהא פתאכלוה הניא ותקימון ואת̇קין עליהא

פאן קלתם מא נאכל פי אלסנה אלסאבעה אד̇ לא נזרע ולא נג̇מע גלתהא

פאני אמר בברכתי לכם פי אלסנה אלסאדסה פתכפיכם גלתנא ת̇לאת̇ סנין

ותזרעון פי אלסנה אלת̇אמנה ואנתם תאכלון מן גלתהא עתיקא ואלי אלסנה אלתאסעה אלי מג̇י גלתהא תאכלון עתיקא

ואלארץ̇ פלא תנבאע בתאתא לאנהא לי אלארץ̇ ואנמא אנתם סכאן ואצ̇יאף ענדי

ופי ג̇מיע בלד חוזכם אג̇עלו ולאיה ללארץ̇

ואד̇א תמאהן אכ̇וך פבאע שיא מן חוזה פליאת וליה אלאקרב אליה פיתולי ביע אכ̇יה

ואי רג̇ל לם יכן לה ולי פנאלת ידה פאצאב במקדאר פכאכה

פליחסב סני ביעה וירד אלפאצ̇ל אלי אלרג̇ל אלד̇י באעה וירג̇ע אלי חוזה

ואן לם תנל ידה מקדאר מא ירד עליה פליבק ביעה פי יד אלמשתרי לה אלי סנה אלאטלאק ויכ̇רג̇ פיהא וירג̇ע אלי חוזה

ואי רג̇ל באע ביתא מסכנא פי קריה להא סור פיכון באלכ̇יאר אלי אנקצ̇א סנה מן יום ביעה פיכון פכאכה חולא

פאן לם יפכה אלי אן כמלת סנה תאמה פקד ת̇בת אלבית אלד̇י פי אלקריה אלתי להא סור בתאתא ללמשתרי ולאג̇יאלה ולא יכ̇רג̇ פי סנה אלאטלאק

וביות אלארבאץ̇ אלתי ליס להא סור יחיט בהא פמת̇ל צ̇יאע אלארץ̇ תחסב אן יכון להא ולאיה ותכ̇רג̇ פי סנה אלאטלאק

ואמא קרי אלליואניין וביות קרי חוזהם פלהם אן יפתכוהא אבדא

פמן אשתרי ד̇לך מנהם פליכ̇רג̇ כל בית מביוע וקריה חוזה פי סנה אלאטלאק לאן ביותהם וקראהם הי חוזהם פי מא בין בני אסראיל

וצ̇יאע פנא קראהם לא תבאע לאנהא חוז אלדהר להם

ואד̇א תמאהן אכ̇וך ומאלת ידה מעך פאשדדה באן יכון לך סאכנא וצ̇יפא פיעיש מעך

ולא תאכ̇ד̇ מנה עינה ולא רבא וכ̇ף רבך חתי יעיש אכ̇וך מעך

ולא תדפע לה ורקך וטעאמך בעינה ולא ברבא

לאני אללה רבכם אלמכ̇רג̇כם מן בלד מצר לאעטיכם בלד כנעאן לאכון לכם אלאהא

ואד̇א תמאהן אכ̇וך מעך פבאע נפסה לך פלא תסתכ̇דמה כ̇דמה אלעביד

בל כאג̇יר או צ̇יף יכון מעך ואלי סנה אלאטלאק יכ̇דם מעך

ת̇ם יכ̇רג̇ מן ענדך הו ובנוה מעה וירג̇ע אלי עשירתה וחוז אבאיה

לאנהם עבידי אלד̇י אכ̇רג̇תהם מן בלד מצר פלא יבאעו ביע אלעביד

לא תסתול עליה באקמא וכ̇ף רבך

ועבדך ואמתך אלד̇אן יכונאן לך פמן אלאמם אלד̇ין חואליכם מנהם תשתרון אלעביד ואלאמא

ואיצ̇א מן בני אלסכאן מעכם אלמקימין מעכם תשתרון ומן עשירתהם אלד̇ין מעכם אלמולודין פי בלדכם פיכונו לכם חוזא

ותורת̇ונהם לבניכם מן בעדכם ורת̇ חוז אלדהר ותסתכ̇דמונהם אבדא ואמא אחד אכ̇ותכם בני אסראיל פכל ואחד לא יסתול עליה באקמא

ואד̇א נאלת יד גריב או סאכן מעך ותמאהן אכ̇וך מעה פבאע נפסה לגריב או סאכן מעך או לאצל עשירה אלגריב

פבעד מא אנבאע פכאך יכון לה וואחד מן אכ̇ותה יפתכה

או עמה או אבן עמה יפתכה או מן נסיב ד̇אתה מן עשירתה יפתכה או נאלת ידה פפך נפסה

פליחאסב משתריה כם מן סנה אנבאע לה אלי סנה אלאטלאק פיסקט ת̇מן ביעה עלי אחצא אלסנין וליכן מעה פיהא כאיאם אלאג̇יר

פאן בקי מן אלסנין כת̇יר פעלי קדרהא ירד פכאכה מנסובא מן ת̇מן שראה

ואן בקי מנהא קליל אלי סנה אלאטלאק פליחסבה ועלי קדרהא ירד פכאכה

ובאלג̇מלה כאג̇יר סנה בסנה יכון מעה ולא יסתול עליה באקמא בחצ̇רתך

ואן לם ינפך בהד̇ה אלאמור פליכ̇רג̇ פי סנה אלאטלאק הו ובנוה מעה

לאן בני אסראיל עביד לי אד̇ הם עבדי אלד̇י אכ̇רג̇תהם מן בלד מצר אנא אללה רבכם אעבדוני