תפסיר רס"ג, ויקרא כד

ת̇ם כלם אללה מוסי קאילא

אוץ בני אסראיל אן יאתוך בדהן זיתון צאף מן אלמדקוק ללאצ̇אה יסרג̇ בה אלסרג̇ דאימא

כ̇ארג̇ סג̇ף אלשהאדה פי כ̇בא אלמחצ̇ר ינצ̇דה הרון מן אלמסא אלי אלצבח בין ידי אללה דאימא רסם אלדהר עלי מר אג̇יאלכם

עלי אלמנארה אלטאהרה ינצ̇דהא בין ידי אללה דאימא

וכ̇ד̇ סמידא פאכ̇בזה את̇נתי עשרה ג̇רדקה לתכון כל ג̇רדקה מן עשרין

וצירהא צפין פי כל צף סת מנצ̇דה עלי אלמאידה אלטאהרה בין ידי אללה

ואג̇על עלי אלמצפפה לבאנא ד̇כיא וליכן ען אלכ̇בז פוחא מקרבא ללה

ופי כל יום אלסבת יצפה בין ידי אללה דאימא מן ענד בני אסראיל עהד אלדהר

ת̇ם ידפע אלי הרון ובניה ויאכלוה פי מוצ̇ע מקדס לאנה להם מן כ̇ואץ אלאקדאס מן קרבאן אללה רסם אלדהר

ולמא קאם אבן מראה אסראיליה והו אבן רג̇ל מצרי פי מא בין בני אסראיל תנאצי פי אלעסכר הד̇א אלאבן אלאסראיליה ואלרג̇ל אלאסראילי

וסב אבן אלאסראיליה אלאסם ושתמה פאתו בה אלי מוסי וכאן אסם אמה שלומית בנת דברי מן סבט דן

פוצ̇עוה פי אלחבס ליבין להם אמרה ען קול אללה

ת̇ם כלם אללה מוסי קאילא

אכ̇רג̇ אלשאתם כ̇ארג̇ אלעסכר וליסנד כל מן סמעה אידיהם עלי ראסה ולירג̇מה ג̇מיע אהל אלמחצ̇ר רג̇מא

ומר בני אסראיל וקל להם אי אנסאן שתם רבה פקד חמל וזרא עט̇ימא

ומן סב כד̇אך אסם אללה פליקתל קתלא ולירג̇מה ג̇מיע אהל אלמחצ̇ר רג̇מא ואלדכ̇יל כאלצריח סואא איהמא סב אלאסם פליקתל

ואי אנסאן קתל אחדא מן נפוס אלנאס פליקתל קתלא

ומן קתל בהימה יג̇רמהא ראסא מת̇להא בדל ראס

ואי אנסאן ג̇על עיבא פי אחד מן אמתה פליצנע בה כמא צנע

ללכסר בדל כסר וללעין בדלהא וללסן בדלהא כמא יג̇על עיבא פי אנסאן כד̇אך יג̇על עליה

ומן צ̇רב בהימה פליג̇רם ומן צ̇רב אנסאנא פמאת פליקתל

וליכן לכם חכם ואחד יסאוי פיה אלדכ̇יל ואלצריח לאני אללה רבכם אלואחד

פכלם מוסי כד̇לך בני אסראיל ואכ̇רג̇ו אלשאתם כ̇ארג̇ אלעסכר פרג̇מוה בלאחג̇ארה וצנעו בני אסראיל פי סאיר מא נזל עליהם כמא אמר אללה מוסי