תפסיר רס"ג, ויקרא כג
Tafsir Rasag, Leviticus 23 · תפסיר רס"ג · free full Hebrew text
Open in the reader →מר בני אסראיל וקל להם אעיאד אללה אלתי יג̇ב אן תסמוהא באסמא כ̇אצה הד̇ה הי אעיאדי
סתה איאם תצנע אלצנאיע ופי אליום אלסאבע עטלה הי סבת ואסם מקדס כל צנעה לא תצנעו כד̇אך הי סבת ללה פי ג̇מיע מסאכנכם
והד̇ה אעיאד אללה אלתי אסמאוהא כ̇אצה אלתי יג̇ב אן תסמוהא כ̇אצה פי אוקאתהא
פי אלשהר אלאול פי אליום אלראבע עשר מנה בין אלגרובין פסחא ללה
ופי אליום אלכ̇אמס עשר מן הד̇א אלשהר חג̇ אלפטיר ללה סבעה איאם תאכלו פטירא
ופי אליום אלאול מנהא אסם מקדס יכון לכם וכל צנאעה מכסב לא תצנעו
וקרבו קראבין ללה פי הד̇ה אלסבעה איאם פי אליום אלסאבע אסם מקדס וכל צנאעה מכסב לא תצנעו
מר בני אסראיל וקל להם אד̇א תדכ̇לון אלי אלבלד אלד̇י אנא מעטיכם פאחצדו מן זרעהא ואתו בגמר אול חצאדכם אלי אלאמאם
פיחרכה בין ידי אללה עלי מא ירתצ̇י מנכם וליכן תחריכה לה פי גד אלעטלה
וקרבו פי יום תחריככם לה חמלא צחיחא אבן סנתה צעידה ללה
ומעה מן אלבר עשרין מן סמיד מלת̇ות̇ בדהן קרבאנא מקבולא מרצ̇יא ללה ומזאג̇ה מן אלכ̇מר רבע קסט
וכ̇בזא וסויקא ופריכא לא תאכלו אלי ד̇את ד̇אך אליום אלי אן תאתו בקרבאן רבכם רסם אלדהר עלי מר אג̇יאלכם פי ג̇מיע מסאכנכם
ואחצו מן גד אלעטלה מן יום ג̇יתם בגמר אלתחריך סבעה אסאביע תאמה תכון
ואלי גד אלאסבוע אלסאבע פיציר ג̇מלה מא תחצונה כ̇מסין יומא וקרבו קרבאנא ג̇דידא ללה
באן תאתו מן מסאכנכם בכ̇בז ללתחריך רגיפין מן עשרין סמידא יכונאן וכ̇מירא יוכ̇בזאן המא בכור ללה
וקרבו מע אלרגיפין סבעה חמלאן צחאחא אבני סנה ות̇ורא מן אלבקר וכבשין יכונא צעידה ללה וברהמא ומזאג̇המא קרבאנא מקבולא מרצ̇יא ללה
וקרבו איצ̇א עתודא מן אלמאעז ללד̇כוה וחמלין אבני סנה לד̇בח אלסלאמה
פיחרך מא יג̇ב מנהא אלאמאם מע רגיפי אלבכור תחריכא בין ידי אללה עלי אלחמלין ולתכן קדסא ללה תדפע אלי אלאמאם
ואסמו ד̇את הד̇א אליום אסמא מקדסא יכון לכם כל צנאעה מכסב לא תצנעו רסם אלדהר בג̇מיע מסאכנכם לאג̇יאלכם
ואד̇א חצדתם זרע בלדכם פלא תסתקץ ג̇הה צ̇יעתך פי חצאדך ונת̇יר זרעך פלא תלקטה ללצ̇עיף ואלגריב אתרכהמא אנא אללה רבכם אג̇אזיכם כ̇ירא
מר בני אסראיל וקל להם פי אליום אלאול מן אלשהר אלסאבע יכון לכם עטלה ותבויק ג̇לבה ואסם מקדס
כל צנאעה מכסב לא תצנעו וקרבו קרבאנא ללה
אמא פי אלעאשר מן הד̇א אלשהר אלסאבע פהו יום אלגפראן אסם מקדס יכון לכם ואג̇יעו אנפסכם וקרבו קרבאנא זאידא ללה
וכל עמל לא תעמלו פי ד̇את הד̇א אליום לאנה יום גפראן לכי יסתגפר פיה ענכם בין ידי אללה
וכל אנסאן באלג לם יצם פי ד̇את הד̇א אליום פינקטע מן קומה
וכל אנסאן יצנע שיא מן אלעמל פי ד̇את הד̇א אליום אביד ד̇לך אלאנסאן מן בין קומה
כד̇אך שיא מן אלצנאיע לא תעמלו רסם אלדהר לאג̇יאלכם פי ג̇מיע מסאכנכם
הי עטלה סבת לכם ותג̇יעו אנפסכם מן עשיה אלתאסע פי אלשהר אלי עשא אלתאלי תעטלו עטלתכם
מר בני אסראיל וקל להם פי יום אלכ̇אמס עשר מן הד̇א אלשהר אלסאבע חג̇ אלמט̇ל סבעה איאם ללה
פי אליום אלאול אסם מקדס כל צנאעה מכסב לא תצנעו
ופי הד̇ה אלסבעה איאם תקרבו קרבאנא ללה ופי אליום אלת̇אמן אסם מקדס יכון לכם וקרבו קרבאנא זאידא ללה ואמכת̇ו פי קדסה וכל צנאעה מכסב לא תעמלו
הד̇ה אעיאד אללה אלתי יג̇ב אן תסמוהא באסמא כ̇אצה לתקרבו פיהא קרבאנא ללה מן צאעידה ובר וד̇בח ומזאג̇ ואג̇ב כל יום ביומה
מא כ̇לא סבות אללה ומא כ̇לא עטאיאכם ונד̇ורכם ותברעכם אלתי תג̇עלוהא ללה
ואמא פי אליום אלכ̇אמס עשר מן אלשהר אלסאבע פי אואן ג̇מעכם גלה אלארץ̇ תחג̇ו חג̇א ללה סבעה איאם ופי אליום אלאול מנהא עטלה ופי אליום אלת̇אמן עטלה
וכ̇ד̇ו לכם פי אליום אלאול מן ת̇מר שג̇ר אלאתרג̇ ומן לב אלנכ̇ל ומן אגצאן עוד אלאס עלי צנעה אלצ̇פר ומן ערב אלואדי ואפרחו בין ידי אללה רבכם סבעה איאם
וחג̇ו ד̇לך חג̇א ללה סבעה איאם פי אלסנה כד̇אך רסם אלדהר עלי מר אג̇יאלכם פי אלשהר אלסאבע תחג̇וה
ואג̇לסו פי אלמט̇אל סבעה איאם לאמרי וכל צריח מן אלאסראיל יג̇לסו פי אלמט̇אל
לכי יעלם אג̇יאלכם אני אללה רבכם אג̇לסת בני אסראיל פי ט̇לאל מן גמאמי חין אכ̇רג̇תהם מן בלד מצר