תפסיר רס"ג, ויקרא כב

ת̇ם כלם אללה מוסי קאילא

מר הרון ובניה באן יג̇אנבו אקדאס בני אסראיל ולא יבד̇לו מא סמיתה קדסא ממא הם מקדסוה לי אנא אללה שרפתה

קל להם עלי מר אג̇יאלכם אי רג̇ל מן נסלכם תקדם אלי אלאקדאס אלתי יקדסוהא בנו אסראיל ללה והו פי חד נג̇ס ילזמה פינקטע תלך אלנפס מן עאלמי לאני אללה אלמעקב

אי רג̇ל מן נסל הרון והו אברץ או ד̇איב פלא יאכל מן אלאקדאס אלי אן יטהר ומן דני במית או כ̇רג̇ת מנה מצ̇אג̇עה אנסאל

ואי רג̇ל דני בכל דביב סבילה אן ינג̇ס מנה או באנסאן סבילה אן ינג̇ס מנה עלי סביל נג̇אסתה

פאי אנסאן דני בשי מן ד̇לך פלינג̇ס אלי אלמגיב ולא יאכל מן אלאקדאס אלי אן יגסל ד̇אתה באלמא

פאד̇א גאבת אלשמס פקד טהר ובעד ד̇לך יאכל מן אלאקדאס לאנה טעאמה

ואלמיתה ואלסקימה לא יאכלהמא פיעצוני בהא אנא אללה אלמעאקב

פליחפט̇ו מא אסתחפט̇תהם ולא יחמלו עליה וזרא פיהלכון בסבבה אד̇א הם תבד̇לוה לאני אללה מקדס ד̇לך

וכל אג̇נבי פלא יאכל קדסא חתי צ̇יף אלאמאם ואג̇ירה לא יאכלא קדסא

ואי אמאם אשתרי אנסאנא שראא במאלה פהו יאכל מנה וכד̇לך תילאד ביתה הם יאכלון מן טעאמה

ואיה אבנה אמאם תזוג̇ת רג̇לא אג̇נביא פהי לא תאכל מן רפאיע אלאקדאס

ואיה אבנה אמאם צארת ארמלה או מטלקה לא נסל להא פלתרג̇ע אלי בית אביהא כחכם צבאיהא ומן טעאם אביהא תאכל וסאיר אלאג̇נביין לא יאכלו מנה

ואי אנסאן אכל שיא מן אלאקדאס סהוא פליזד עליה מת̇ל כ̇מסה וידפעה אלי אלאמאם ען אלקדס

ולא יבד̇לו אקדאס בני אסראיל ומא ירפעונה ללה

פיחמלון ענהא ד̇נובא ואת̇אמא אד̇א אכלו כד̇אך אקדאסהם לאני אללה מקדסהם

ת̇ם כלם אללה מוסי קאילא

מר הרון ובניה וסאיר אל אסראיל וקל להם אי רג̇ל מן אל אסראיל או אלגרבא אלדאכ̇לין פי אל אסראיל שא אן יקרב קרבאנה עלי צ̇רב נד̇ורהם או תברעהם אלד̇י יקרבונהא ללה ללצעידה

פאלמרתצ̇א מנכם אן יכון ד̇כרא מן אלבקר ואלצ̇אן ואלמאעז

ומא פיה עיב פלא תקרבוה פאנה לא ירתצ̇א מנכם

וכד̇לך אי רג̇ל שא אן יקרב ד̇בח סלאמה ללה תסויג נד̇רא או תברעא מן אלבקר או מן אלצ̇אן פאלצחיח הו אלמרתצ̇י מנה לא יכון פיה עיב

מן עורא או מכסורה או מבתורה או ד̇את ת̇אלול או ג̇רב או חזאז פלא תקרבוהא ללה ולא תג̇עלו מנהא קרבאנא עלי אלמד̇בח ללה

ואי ת̇ור או שאה גאמזה או מדמגה פאצנעה עלי ג̇הה תברע ואמא עלי ג̇הה אלנד̇ר פלא ירתצ̇י

ואלממרוס ואלמדקוק ואלמנצול ואלמקטוע פלא תקרבוהא ללה ופי בלדכם לא תצנעוהא

ומן יד אלאמם לא תקבלו קרבאן רבכם אלדאים ופיה שי מן הד̇ה אלעיוב לאן פסאדהא מעהא והו אלעיב אלד̇י פיהא פלא ירתצ̇י מנכם

ת̇ם כלם אללה מוסי קאילא

אי עג̇ל או חמל או ג̇די ולד פליקם סבעה איאם מע אמה ומן אליום אלת̇אמן פצאעדא ירתצ̇י אן יקרב קרבאנא ללה

ואלבקרה ואלנעג̇ה הי וולדהא לא תד̇בחוהמא פי יום ואחד

ואד̇א ד̇בחתם ד̇בח שכר ללה פעלי מא ירתצ̇י מנכם אד̇בחוה

אן יכון יוכל פי ד̇לך אליום פקט לא תבקו מנה אלי אלגדאה אני אללה אמרת בד̇לך

פאחפט̇ו וצאיאי ואעמלו בהא לאני אללה אג̇אזיכם כ̇ירא

ולא תבד̇לו אסם קדסי בל אתקדס פי מא בין בני אסראיל אני אללה מקדסכם

אלמכ̇רג̇כם מן בלד מצר לאכון לכם אלאהא אנה אללה צאדק אלדהר