תפסיר רס"ג, ויקרא כא

ת̇ם קאל אללה למוסי מר לאימה בני הרון וקל להם לא ינג̇ס ואחד מנכם במית מן קומה

אלא בנסיבה אלאקרב אליה לאמה ואביה ואבנה ואבנתה ואכ̇יה

ואכ̇תה אלבכר אלאקרב אליה והי אלתי לם תצר לרג̇ל פבהא ינג̇ס

ולא ינג̇ס בכ̇טיר מן קומה פאנה תבד̇לה

לא ינתפו נתפא מן שעור דרוסהם וזואיא לחאהם לא יחלקוהא ופי אבדאנהם לא יכ̇דשון כ̇דשא

ליכונו מקדסין לרבהם ולא יבד̇לו אסמה פאנהם למא הם מקרבון קראבין אללה רבהם אלדאימה יכונו מקדסין

במראה פאג̇רה ומבד̇ולה לא יתזוג̇ו ובמראה מטלקה מן בעלהא לא יתזוג̇ו פאן כל ואחד מנהם מקדס לרבה

פקדסה באלאלזאם לאנה יקרב קרבאן רבך אלדאים פליכן לך מקדסא כמא אני אללה אלקדוס מקדסכם

ואי אבנה רג̇ל אמאם תבד̇לת פפג̇רת פקד פצ̇חת אבאהא פלתחרק באלנאר

ואלאמאם אלכביר מן אכ̇ותה אלד̇י יצב עלי ראסה דהן אלמסח ויכמל ואג̇בה בלבס אלת̇יאב ראסה לא ישעת̇ ות̇יאבה לא ימזקהא

ועלי אי אנסאן מית פלא ידכ̇ל חתי באביה ואמה לא ינג̇ס

ומן אלמקדס לא יכ̇רג̇ וראהמא ולא יבד̇ל תקדיס רבה פאנה למא צאר תאג̇ דהן מסח רבה עליה אנא אללה שרפתה

פלא יתזוג̇ אלא במראה בכר

ואמא ארמלה ומטלקה ומבד̇ולה ופאג̇רה פלא יתזוג̇ באחדי האולי אלא במראה בכר מן קומה יתזוג̇

ולא יבד̇ל נסלה בסואהא מן קומה לאני אללה מקדסה

ת̇ם כלם אללה מוסי קאילא

מר הרון וקל לה אי רג̇ל מן נסלך עלי מר אג̇יאלכם יכון פיה עיב לא יתקדם ליקרב קרבאן רבה

אד̇ רג̇ל פיה עיב לא יתקדם פמן ד̇לך רג̇ל אעמי ואזמן ואכ̇רם וכ̇אמע

או רג̇ל בה כסר רג̇ל או כסר יד

או אחדב או אכ̇פש או כתיב פי עינה או ג̇רב או חזאז או אדר

כד̇אך כל רג̇ל פיה עיב מן נסל הרון אלאמאם לא יתקדם ליקרב קראבין אללה ומהמא ד̇לך אלעיב פיה פקרבאן רבה לא יתקדם ליקרבה

לכן רזק רבה מן כ̇ואץ אלאקדאס ועואמהא יאכל

ואמא אלי אלסג̇ף פלא ידכ̇ל ואלי אלמד̇בח לא יתקדם אד̇ פיה עיב ולא יבד̇ל מקאדסי לאני אללה מקדסה

פאמר מוסי בד̇לך הרון ובניה וסאיר בני אסראיל