תפסיר רס"ג, ויקרא כ

ת̇ם כלם אללה מוסי קאילא

מר בני אסראיל איצ̇א וקל להם אי אנסאן מן בני אסראיל ומן אלגריב אלדכ̇יל פי מא בינהם יעטי מן נסלה ללצנם פליקתל קתלא והוא אן אהל אלבלד ירג̇מוה באלחג̇ארה

ואנא אחל גצ̇בי בד̇לך אלאנסאן פאקטעה מן בין קומה אד̇ אעטא מן נסלה ללצנם לכי ינג̇ס מקדסי ויבד̇ל אסם קדסי

ואן תגאפל אהל אלבלד תגאפלא ען ד̇לך אלאנסאן מע אעטאיה מן נסלה ללצנם פלם יקתלוה

אחללת גצ̇בי בד̇לך אלאנסאן ובמג̇אנסיה פאקטעתה וג̇מיע אלטאגיין פי תבעה מן בין קומהם

ואי אנסאן ולי אלי אלמשעוד̇ין ואלעארפין ליטגי אלנאס פי תבעהם אחללת גצ̇בי בד̇לך אלאנסאן פאקטעתה מן בין קומה

פתקדסו וכונו מקדסין לאני אללה רבכם אלקדוס

ואחפט̇ו רסומי ואעמלו בהא לאני אללה מקדסכם

ואי אנסאן לען אבאה ואמה פליקתל למא לען אבאה ואמה פקד חל דמה

ואי רג̇ל זנא בזוג̇ה רג̇ל או זנא במראה צאחבה פליקתל אלזאני ואלזאניה קתלא

ואי רג̇ל צ̇אג̇ע זוג̇ה אביה פקד כשף סואה אביה פליקתלא ג̇מיעא פקד חל דמאהמא

ואי רג̇ל צ̇אג̇ע כנתה פליקתלא ג̇מיעא ולמא צנעא דאהיה פקד חל דמאהמא

ואי רג̇ל צ̇אג̇ע ד̇כרא עלי פן מצ̇אג̇עה אלנסא פקד צנעא ג̇מיעא כריהה וליקתלא פקד חל דמאהמא

ואי רג̇ל אתכ̇ד̇ מראה ואמהא פתלך פאחשה פליחרק באלנאר הו והן עלי אלבדל ולא תכון פאחשה פי מא בינכם

ואי רג̇ל ג̇על מצ̇אג̇עתה מע בהימה פליקתל קתלא ואלבהימה איצ̇א פאקתלוהא

ואיה מראה תקדמת אלי בהימה לתנזוהא פאקתל אלמראה ואלבהימה למא צנעא דאהיה פקד חל דמאהמא בד̇לך

ואי רג̇ל אכ̇ד̇ אכ̇תה בנת אביה או בנת אמה פנט̇ר אלי סואתהא ונט̇רת הי אלי סואתה פד̇לך עאר פלינקטעא מן חצ̇רה קומהם למא כשף סואה אכ̇תה פקד חמל וזרה

ואי רג̇ל צ̇אג̇ע מראה חאיצ̇א פכשף סואתהא וערי נביעהא והי כשפת נביע דמהא פלינקטעא ג̇מיעא מן בין קומהם

וסואה כ̇אלתך ועמתך פלא תכשף לאן מן ערי נסיבתה פקד חמל וזרה

ואי רג̇ל צ̇אג̇ע זוג̇ה עמה פקד כשף סואה עמה וממא חמלא וזרהמא ימותאן עקימאן

ואי רג̇ל אתכ̇ד̇ זוגה אכ̇יה אלתי הי מבעדה מנה פלמא כשף סואה אכ̇יה יכונאן עקימאן

פאחפט̇ו ג̇מיע רסומי ואחכאמי ואעמלו בהא ולא ישתתכם אלבלד אלד̇י אנא מדכ̇לכם ת̇ם לתחוזוה

ולא תסירו פי רסום אלאמם אלד̇ין אנא טארדהם מן בין ידיכם פאנהם למא צנעו ג̇מיע הד̇ה אקליתהם

וקלת לכם חאכמא אנתם תחוזון בלדהם ואנא אעטיה לכם תחוזוה בלדא יפיץ̇ אללבן ואלעסל אנא אללה רבכם אלד̇י אפרזתכם מן ג̇מיע אלאמם

פמיזו אלבהימה אלטאהרה מן אלנג̇סה ואלטאיר אלנגס מן אלטאהר ולא תנג̇סו אנפסכם באלבהאים ואלטאיר וסאיר מא ידב אלי אלארץ̇ אלד̇י אפרזתה לכם ללתנג̇יס

וכונו לי מקדסין לאני אללה אלקדוס אפרזתכם מן בין אלאמם לתוכנו לי כ̇אצה

ואי רג̇ל או מראה כאן ואחד מנהמא משעוד̇א או עארפא פליקתלא קתלא ובאלחג̇רה ירג̇מוהמא פקד חל דמאהמא