תפסיר רס"ג, ויקרא יט

ת̇ם כלם אללה מוסי קאילא

מר ג̇מאעה בני אסראיל וקל להם כונו מקדסין לאני אללה רבכם אלקדוס

ליכ̇ף כל רג̇ל אמה ואבאה וסבותי אחפט̇ו אנא אללה רבכם אג̇אזיכם כ̇ירא

לא תולו אלי אות̇אן ומעבודאת מסבוכה לא תצנעו לכם אנא אללה רבכם אלואחד

ואד̇א ד̇בחתם ד̇בח סלאמה ללה פעלי מא ירתצ̇י מנכם אד̇בחוה

אן יכון יוכל יום ד̇בחכם ומן גדה ומא בקי אלי אליום אלת̇אלת̇ פליחרק באלנאר

ואן אכל מנה שי פי אליום אלת̇אלת̇ פהו כאלאכ̇ס לא יקבל

ואכלה פקד חמל וזרה למא בד̇ל אקדאס אללה וינקטע ד̇לך אלאנסאן מן קומה

ואד̇א חצדתם זרע בלדכם פלא תסתקץ ג̇הה מן צ̇יעתך פתחצדהא ולקאט זרעך פלא תלקטה

וכרמך פלא תמשה ומפרוט כרמך פלא תלקטה בל אתרכהא ללצ̇עיף ואלגריב אנא אללה רבכם אג̇אזיכם כ̇ירא

לא תסרקו ולא תג̇חדו ולא ינכת̇ כל אמר בצאחבה

לא תחלפו באסמי באטלא פאנך אד̇ בד̇לת אסם אללה רבך אנא אללה רבך אלמעאקב

לא תגשם צאחבך ילא תגצבה ולא תבת אג̇רה אלאג̇יר ענדך אלי אלגדאה

לא תשתם אצם ובין ידי אלאעמי לא תציר מעת̇רא וכ̇ף רבך אנא אללה אלמעאקב

לא תצנעו ג̇ורא פי אלחכם לא תחאבו פקירא ולא תבתהג̇ו ג̇לילא בל אחכם פי מא בין קומך באלעדל

לא תמץ̇ מאחלא בקומך ולא תקם עלי דם צאחבך אנא אללה אלמעאקב

לא תשנא אכ̇אך פי קלבך בל עט̇ה ועט̇א ולא תחמל ענה וזרה

לא תנקם ולא תחקד עלי קומך ואחבב לצאחבך מת̇ל נפסך אנא אללה אג̇אזיך כ̇ירא

ורסומי פאחפט̇והא בהאימך לא תנזוהא מן נועין וצ̇יעתך לא תזרעהא מן נועין ות̇וב מן נועין מלחמין לא יעלו עליך

ואי רג̇ל צ̇אג̇ע אמראה מצ̇אג̇עה אנסאל והי אמה מכ̇טובה לאי רג̇ל כאן ופדא לם תפדא או עתקהא לם ידפע אליהא פלתכן מחדודה ולא יקתלא אד̇ לם תעתק

פליאת בקרבאנה אלי אללה אלי באב כ̇בא אלמחצ̇ר כבשא לקרבאן אלאת̇ם

ויסתגפר אלאמאם ענה בה בין ידי אללה ען כ̇טיתה אלתי אכ̇טא פיגפר לה ד̇לך

ואד̇ תדכ̇לון אלי אלבלד פתגרסון כל שג̇ר מטעם פחרמו ת̇מרה תחרימא ת̇לאת̇ סנין יכון עליכם מחרמא לא יוכל

ופי אלסנה אלראבעה יכון ג̇מיע ת̇מרה מקדסא מוהלא ללה

ופי אלסנה אלכ̇אמסה תאכלו ת̇מרה פאני אללה רבכם אזיד לכם פי גלתה

ולא תאכלו מע אלדם ולא תתטירו ולא תתפאלו

לא תחדקו בזואיא ראסכם ולא תסתאצל זואיא לחיתך

וכ̇דשא עלי מית לא תג̇עלו פי אבדאנכם וכתאבה רשם לא תג̇עלו פיכם אנא אללה אלמעאקב

ולא תבד̇ל אבנתך ללפג̇ור כילא יפג̇ר אהל אלבלד פתמתלי פואחש

סבותי פאחפט̇והא ומקדסי פתוקוה אנא אללה שרפתהא

ולא תולו אלי אלמשעוד̇ין ואלעארפין ולא תטלבו אן תעצוני בהא אנא אללה רבכם עאלם אלגיב

מן בין ידי ד̇י אלשביה פקם ואבתהג̇ וג̇ה אלשיך̇ וכ̇ף רבך אנא אללה אלמעאקב

ואד̇א סכן מעכם גריב פי בלדכם פלא תגבנוה

וליכן כאלצריח מנכם אלגריב אלדכ̇יל פי מא בינכם ואחבב לה כנפסך לאנה טלמא כנתם גרבא פי בלד מצר אנא אללה רבכם אג̇מעין

לא תצנעו ג̇ורא פי אלחכם ולא פי אלמסאחה ואלוזן ואלמכאיל

בל מואזן עאדלה וצנג̇את עאדלה ואכיאל עאדלה ואקסאט עאדלה תכון לכם אנא אללה רבכם אלעדל אלמכ̇רג̇כם מן ארץ̇ מצר

ואחפט̇ו ג̇מיע רסומי ואחכאמי ואעמלו בהא אנא אללה אג̇אזיכם כ̇ירא