תפסיר רס"ג, ויקרא יח

ת̇ם כלם אללה מוסי קאילא

כלם בני אסראיל וקל להם אנא אללה רבכם

כצנאיע אהל בלד מצר אלד̇י אקמתם פיה לא תצנעו וכצנאיע אהל בלד כנעאן אלד̇י אנא מדכ̇לכם ת̇ם פלא תצנעו וברסומהם לא תסירו

אחכאמי פאצנעו ורסומי פאחפט̇ו וסירו בהא אנא אללה רבכם אג̇אזיכם כ̇ירא

ואחפט̇ו רסומי ואחכאמי פאן ג̇זא אי אנסאן עמל בהא אן יחיא אלחיאה אלדאימה אנא אללה אלדאים אלבקא

וכל רג̇ל מנכם אלי נסיב ד̇אתה לא יתקדם לכשף סואתהא אנא אללה נהיתכם ען ד̇לך

סואה אביך וסואה אמך לא תכשף אמא סואה אמך פהי אמך נפסהא פלא תכשפן סואתהא

ואמא סואה זוג̇ה אביך פהי זוג̇ה אביך פלא תכשפן סואתהא

וסואה אכ̇תך אבנת אביך או אבנת אמך אלמולודה דאכ̇לא או כ̇ארג̇א פלא תכשפן סואתהא

סואה בנת אבנך או בנת אבנתך פלא תכשפהמא לאנהמא סואתך

סואה בנת זוג̇ה אביך אלמולודה מן אביך הי אלתי בינת אנהא אכ̇תך פלא תכשפן סואתהא

סואה אכ̇ת אביך פלא תכשף לאנהא נסיבה אביך

סואה אכ̇ת אמך פלא תכשף לאנהא נסיבה אמך

סואה עמך לא תכשף וד̇לך אלא תתקדם אלי זוג̇תה אד̇ הי עמתך

סואה כנתך פלא תכשף והי זוג̇ה אבנך פלא תכשף סותהא

סואה זוג̇ה אכ̇יך פלא תכשף לאנהא סואה אכ̇יך

סואה מראה ואבנתהא פלא תכשפן וכד̇לך בנת אבנהא ובנת אבנתהא לא תתכ̇ד̇ לתכשף סואתהמא אד̇ הן נסאיב פהי פאחשה

ומראה מע אכ̇תהא פלא תתכ̇ד̇ לתכון צ̇רתהא לתכשף סואתהא מעהא פי חיאתהא

ואלי מראה פי חיצ̇ה נג̇אסתהא לא תתקדם לתכשף סואתהא

ומע זוג̇ה צאחבך לא תג̇על מצ̇אג̇עתך לאנסאל לתתנג̇ס בהא

ולא תעט מן נסלך ללתקריב ללצנם ולא תבד̇ל אסם רבך אנא אללה אלמעאקב

ואלד̇כר פלא תצ̇אג̇ע עלי צ̇רוב מצ̇אג̇עאת אלנסא פאנהא כריהה

ומע שי מן אלבהאים לא תג̇על מצ̇אג̇עתך ללתתנג̇ס בהא וכד̇לך אלמראה לא תקף בין ידי בהימה לתנזוהא פאנהא אבדה

לא תעצוני בשי מן הד̇ה פאן במת̇להא עאצוני אלאמם אלד̇ין אנא טארדהם מן בין ידיכם

ולמא נג̇ס אהל אלבלד טאלבתהם בד̇נובהם פשתת אלבלד אהלה

פאחפט̇ו אנתם רסומי ואחכאמי ולא תצנעו שיא מן הד̇ה אלמכארה אלצריח ואלגריב אלדכ̇יל פי מא בינכם

אד̇ ג̇מיע הד̇ה אלמכארה צנעהא אהל אלבלד אלד̇ין מן קבלכם חתי נג̇ס

לילא ישתתכם אלבלד אד̇ נג̇סתמוה כמא שתת אלאמם אלד̇ין מן קבלכם

ואעלמו אן מן צנע שיא מן הד̇ה אלמכארה תנקטע תלך אלנפוס אלצאנעאת מן קומהא

פאחפט̇ו מא אסתחפט̇תכם לילא תצנעו מן רסום אלמכארה אלתי צנעת מן קבלכם ולא תעצוני בהא אנא אללה רבכם אג̇אזיכם כ̇ירא