תפסיר רס"ג, ויקרא יז

ת̇ם כלם אללה מוסי קאילא

מר הרון ובניה וסאיר בני אסראיל וקל להם הד̇א אלאמר אלד̇י אמר אללה בה

אי רג̇ל מן בני אסראיל יד̇בח ת̇ורא או כבשא או ענזא פי אלעסכר או כ̇ארג̇ה

ולא יאתי בה אלי באב כ̇בא אלמחצ̇ר פיקרבה אד̇ הו קרבאן ללה בין ידי מסכנה פהו יחסב עליה כמן קד ספך דם אנסאן פינקטע ד̇לך אלאנסאן מן בין קומה

לכי יאתו בנו אסראיל בד̇באיחהם אלתי לעלהם יד̇בחוהא עלי וג̇ה אלצחרא פיג̇ו בהא בין ידי אללה אלי באב כ̇בא אלמחצ̇ר אלי אלאמאם פיד̇בחוהא ד̇באיח סלאמה ללה

וירש אלאמאם דמהא עלי מד̇בח אללה אלד̇י ענד באב כ̇בא אלמחצ̇ר ויקתר שחמהא מקבולא מרצ̇יא ללה

ולא יד̇בחון אבדא ד̇באיחהם ללשיאטין אלד̇י הם יגטון פי תבעהם פיכון להם ד̇לך רסם אלדהר לאג̇יאלהם

וקל להם אי רג̇ל מן בני אסראיל ומן אלגריב אלדכ̇יל פי מא בינהם יחרק צעידה או ד̇בחא

ואלי באב כ̇בא אלמחצ̇ר לא יאתי בה ליקרבה כד̇אך ללה פינקטע דלך̇ אלאנסאן מן בין קומה

ואי רג̇ל מן אל אסראיל ומן אלגריב אלדכ̇יל פי מא בינהם יאכל שיא מן אלדם אחללת גצ̇בי פיה וקטעתה מן בין קומה

לאן נפס ג̇מיע אלבשרין אלדם מסכנהא ולד̇לך ג̇עלתה לכם עלי אלמד̇בח ליסתגפר בה ען נפוסכם לאן אלדם כד̇אך כפר ען אלנפס

ולד̇לך קלת לבני אסראיל כל אנסאן מנכם לא יאכל דמא חתי אלגריב אלדכ̇יל פי מא בינכם לא יאכל דמא

ואי רג̇ל מן אלאסראיל ומן אלגריב אלדכ̇יל פי מא בינכם צאד צידא מן אלוחש ואלטאיר אלד̇ין יוכלאן חלאלא פליצב דמה ויוארה באלתראב

לאן נפוס אלבשרין כל ואחדה פי דמה ולאני קלת לבני אסראיל דם כל בשרי לא תאכלו אד̇ נפוס כל אלבשרין אלדם מסכנהא וכל מן אכלה ינקטע

ואי אנסאן אכל נבילה או פריסה מן אלצריח ואלגריב פיגסל ת̇יאבה וירחץ̇ באלמא וינג̇ס אלי אלמגיב ויטהר

פאן הו לם יגסלהא או לם ירחץ̇ בדנה פקד זאד פי חמל וזרה