תפסיר רס"ג, ויקרא טז

אן אללה כלם מוסי בעד מות אבני הרון אד̇ תקדמא בין ידי אללה עלי מא בין פמאתא

וקאל אללה למוסי מר הרון אכ̇אך באן לא ידכ̇ל פי כת̇יר מן אלאוקאת אלי אלקדס מן דאכ̇ל אלסג̇ף אלי חצ̇רה אלגשא אלד̇י עלי אלצנדוק לילא ימות פאני מתג̇ל באלגמאם פוק אלגשא

בהד̇ה אלאמור ידכ̇ל הרון אלי אלקדס באן יחצ̇ר רת̇א מן אלבקר ללד̇כוה וכבשא ללצעידה

ואן ילבס תוניה מן עשר מקדסה בעד אן יכון עלי בדנה סראויל מן עשר ויתקלד בזנאר מן עשר מחץ̇ ויתעמם בעמאמה מת̇ל ד̇לך פהד̇ה הי ת̇יאב אלקדס ויגסל בדנה באלמא וילבסהא

וליאכ̇ד̇ מן ענד ג̇מאעה בני אסראיל עתודין ללד̇כוה וכבשא ללצעידה

פיבתדי אולא פיקדם רת̇ אלד̇כוה אלד̇י לה ויסתגפר ענה וען אלה

ת̇ם יאכ̇ד̇ אלעתודין ויוקפהמא בין ידי אללה ענד באב כ̇בא אלמחצ̇ר

וילקי עליהמא סהמין אחדהמא לבית אללה ואלאכ̇ר לג̇בל עזאז

פליקדם אלעתוד אלד̇י וקע עליה אלסהם לבית אללה ויצנעה ד̇כוה

ואלעתוד אלד̇י וקע עליה אלסהם לג̇בל עזאז יוקף חיא בין ידי אללה ליסתגפר ענה ליבעת̇ה לג̇בל עזאז ללבריה

ויקדם הרון ת̇אניה רת̇ אלד̇כוה אלד̇י לה ויסתגפר ענה וען אלה ת̇ם יד̇בחה

ת̇ם יאכ̇ד̇ מלא אלמג̇מר ג̇מר נאר מן פוק אלמד̇בח מן בין ידי אללה ומלו חפניה מן בכ̇ור אלצמוג אלמדקוק וידכ̇ל אלג̇מיע אלי דאכ̇ל אלסג̇ף

פילקי ד̇לך אלבכ̇ור עלי אלנאר בין ידי אללה חתי יגטי צ̇באב אלבכ̇ור אלגשא אלד̇י עלי אלצנדוק פאנה לא ימות

ת̇ם יאכ̇ד̇ מן דם אלרת̇ פינצ̇ח באצבאעה קבאלה אלגשא שרקא מרה ואחדה ת̇ם ינצ̇ח בין ידיה מנה סבע מראת

ת̇ם יד̇בח עתוד אלד̇כוה אלד̇י ללקום וידכ̇ל מן דמה אלי דאכ̇ל אלסג̇ף פיצנע בה כמא צנע בדם אלרת̇ אן ינצ̇ח מנה קבאלה אלגשא ובין ידיה

פיסתגפר פי אלקדס ען מעאצי בני אסראיל וג̇רומהם וג̇מיע ד̇נובהם וכד̇לך יצנע מן אלדמוין פי כ̇בא אלמחצ̇ר אלד̇י הו סאכן מעהם פי מא בין מעאציהם

ולא יכון אחד מן אלנאס פי כ̇בא אלמחצ̇ר חין ידכ̇ל ליסתגפר פי אלקדס אלי אן יכ̇רג̇ וקד אסתגפר ענה וען אלה וען ג̇מיע ג̇וק אלאסראיל

ת̇ם יכ̇רג̇ אלי אלמד̇בח אלד̇י בין ידי אללה פיסתגפר עליה באן יאכ̇ד̇ מן דם אלרת̇ ודם אלעתוד מג̇מועין פיצ̇ע עלי ארכאן אלמד̇בח מסתדירא

ת̇ם ינצ̇ח עליה מן אלדם באצבאעה סבע מראת פיטהרה ויקדסה מן מעאצי בני אסראיל

פאד̇א פרג מן אלאסתגפאר פי אלקדס ופי כ̇בא אלמחצ̇ר וענד אלמד̇בח קדם אלעתוד אלחי

פאסנד ידיה עלי ראסה ואקר בד̇נוב בני אסראיל וג̇רומהם וג̇מיע כ̇טאיאהם פאד̇א תלאהא ענד ראס אלעתוד בעת̇ בה מע רג̇ל מעד לה אלי אלבר

פהו יחמל אלעתוד עלי ענקה ען ג̇מיע ד̇נובהם אלי ארץ̇ מנקטעה ת̇ם יטלקה פי אלבר

ת̇ם ידכ̇ל הרון אלי כ̇בא אלמחצ̇ר פיכ̇רג̇ אלמג̇מרה ת̇ם ינזע אלת̇יאב אלעשר אלתי לבסהא פי דכ̇ולה אלי אלקדס וידעהא הנאך

ת̇ם יגסל בדנה באלמא פי מוצ̇ע מקדס וילבס ת̇יאבה אלמעלומה ת̇ם יכ̇רג̇ פיקרב צואעדה וצואעד אלקום ויסתגפר ענה וען אלקום

ושחום אלד̇כואת יקתרהא עלי אלמד̇בח

ואלמטלק אלעתוד פי ג̇בל עזאז יגסל ת̇יאבה וירחץ̇ בדנה באלמא ובעד ד̇לך ידכ̇ל אלי אלעסכר

ואמא רת̇ אלד̇כוה ועתוד אלד̇כוה אללד̇ין אדכ̇ל מן דמהמא ללאסתגפאר פי אלקדס פליכ̇רג̇א אלי כ̇ארג̇ אלעסכר פיחרקו באלנאר ג̇לודהמא ולחומהמא ופרות̇המא

ואלמחרקהמא יגסל ת̇יאבה וירחץ̇ בדנה באלמא ובעד ד̇לך ידכ̇ל אלי אלעסכר

פיכון ד̇לך לכם רסם אלדהר פי אליום אלעאשר מן אלשהר אלסאבע תג̇יעו אנפסכם ושיא מן אלעמל לא תעמלו אלצריח ואלגריב אלדכ̇יל פי מא בינכם

ופי הד̇א אליום יסתגפר ענכם ליטהרכם כמא בינת פמן ג̇מיע כ̇טאיאכם בין ידי אללה פתטהרון

וסבת הי עטלה לכם אד̇ תג̇יעון אנפסכם רסם אלדהר

וכד̇לך יסתגפר אלאמאם אלד̇י ימסח ויכמל ואג̇בה ליאם מכאן אביה פילבס ת̇יאב אלעשר ת̇יאב אלקדס

פיסתגפר פי כ̇ואץ אלאקדאס ופי כ̇בא אלמחצ̇ר וענד אלמד̇בח יסתגפר פיהא ען אלאימה וען סאיר אלג̇וק

פיכון הד̇א לכם רסם אלדהר אן יסתגפר כד̇אך ען בני אסראיל מן ג̇מיע כ̇טאיאהם מרה ואחדה פי אלסנה פצנע הרון כמא אמר אללה מוסי