תפסיר רס"ג, בראשית ה

הד̇א כתאב שרח תאליד אדם פי יום כ̇לקה אללה בשבהה מסלטא צנעה

ד̇כרא ואנת̇א כ̇לקהמא ובארך פיהמא ודעא אסמהמא אדם פי יום כ̇לקהמא

כד̇אך למא עאש אדם מאיה ות̇לת̇ין סנה אולד אבנא בשבהה בצורתה וסמאה שת

פעאש בעד ד̇לך ת̇מאן מאיה סנה אולד פיהא בנין ובנאת

פצאר ג̇מיע עמרה תסע מאיה ות̇לת̇ין סנה ת̇ם מאת

ולמא עאש שת מאיה וכ̇מס סנין אולד אנוש

ועאש בעד ד̇לך ת̇מאן מאיה סנה וסבע סנין אולד פיהא בנין ובנאת

פצאר ג̇מיע עמרה תסע מאיה ואת̇נתי עשרה סנה ת̇ם מאת

ולמא עאש אנוש תסעין סנה אולד קינן

ועאש אנוש בעד ד̇לך ת̇מאן מאיה סנה וכ̇מס עשרה סנה אולד פיהא בנין ובנאת

פצאר ג̇מיע עמרה תסע מאיה סנה וכ̇מס סנין ת̇ם מאת

ולמא עאש קינן סבעין סנה אולד מהללאל

ועאש קינן בעד ד̇לך ת̇מאן מאיה וארבעין סנה אולד פיהא בנין ובנאת

פצאר ג̇מיע עמרה תסע מאיה סנה ועשר סנין ת̇ם מאת

ולמא עאש מהללאל כ̇מס וסתין סנה אולד ירד

ועאש בעד ד̇לך ת̇מאן מאיה סנה ות̇לת̇ין סנה אולד פיהא בנין ובנאת

פצאר ג̇מיע עמרה ת̇מאן מאיה סנה וכ̇מס ותסעין סנה ת̇ם מאת

ולמא עאש ירד מאיה ואת̇נתין וסתין סנה אולד חנוך

ועאש בעד ד̇לך ת̇מאן מאיה סנה אולד פיהא בנין ובנאת

פצאר ג̇מיע עמרה תסע מאיה ואת̇נתין וסתין סנה ת̇ם מאת

ולמא עאש חנוך כ̇מס וסתין סנה אולד מתושלח

וסלך חנוך פי טאעה אללה בעד מא אולד מתושלח ת̇לת̇ מאיה סנה אולד פיהא בנין ובנאת

פצאר ג̇מיע עמרה ת̇לת̇ מאיה סנה וכ̇מס וסתין סנה

ולמא סלך חנוך פי טאעה אללה תופי וקבצ̇ה אללה

ולמא עאש מתושלח מאיה וסבעה ות̇מאנין סנה אולד למך

ועאש בעד ד̇לך סבע מאיה את̇נתין ות̇מאנין סנה אולד פיהא בנין ובנאת

פצאר ג̇מיע עמרה תסע מאיה סנה ותסע וסתין סנה ת̇ם מאת

ולמא עאש למך מאיה את̇נתין ות̇מאנין סנה אולד אבנא

וסמאה נוחא קאילא הד̇א יעזינא מן אעמאלנא ומן משקה אידינא פי אלארץ̇ אלתי לענהא אללה

ועאש בעד ד̇לך כ̇מס מאיה וכ̇מס ותסעין סנה אולד פיהא בנין ובנאת

פצאר ג̇מיע עמרה סבע מאיה סנה וסבע וסבעין סנה ת̇ם מאת

ולמא צאר נוח אבן כ̇מס מאיה סנה אולד שם וחם ויפת