תפסיר רס"ג, בראשית ו

ולמא אבתדא אלנאס אן יכת̇רו עלי וג̇ה אלארץ̇ וולד להם בנאת

ראו בנו אלאשראף בנאת אלעאמה אנהן חסאן פאתכ̇ד̇ו להם נסא מן ג̇מיע מא אכ̇תארוה

פקאל אללה לא ינגמד ד̇אתי פי הולא אלנאס אלי אלדהר אד̇ הם בשריון ותכון מדתהם מאיה ועשרין סנה

וכאן אלג̇באברה פי אלארץ̇ פי ד̇לך אלזמאן ובעד ד̇לך איצ̇א כאנו ידכ̇לון בנו אלאשראף אלי בנאת אלעאמה חראמא פילדן להם הם אלג̇באברה אלד̇ין מן אלדהר ד̇וו אלאסמא

פלמא ראי אללה אן קד כת̇ר שר אלנאס פי אלארץ̇ וג̇מיע כ̇אטר אפכאר קלובהם רד̇י מחץ̇ טול אלזמאן

תואעדהם אללה במא צנעהם פי אלארץ̇ ואוצל אלמשקה אלי קלובהם

באן קאל אללה אמחו אלנאס אלד̇ין כ̇לקתהם ען וג̇ה אלארץ̇ מן אנסאן אלי בהימה אלי דביב ואלי טאיר אלסמא אד̇ תואעדתהם במא כ̇לקתהם

ונוח וג̇ד חט̇אא ענד אללה

הד̇א שרח תאליד נוח וכאן נוח רג̇לא צאלחא צחיחא פי אג̇יאלה פי טאעה אללה סלך נוח

ואולד נוח ת̇לת̇ה בנין שם וחם ויפת

ואנפסדת אלארץ̇ בין ידי אללה ואמתלת אלארץ̇ ט̇למא

ולמא ראהא אללה אד̇ אנפסדת באן אפסד כל בשרי טריקה עליהא

קאל אללה לנוח קד דנא אג̇ל כל בשרי בין ידי אד̇ אמתלת אלארץ̇ ט̇למא מן קבלהם והאנא מהלכהם מנהא

אצנע לך תאבותא מן כ̇שב אלשמשאר ואצנעהא טבקאת וקפרהא מן דאכ̇ל ומן כ̇ארג̇ באלקפר

והד̇א מקדאר מא תצנעהא ת̇לת̇ מאיה ד̇ראע טולהא וכ̇מסין ערצ̇הא ות̇לת̇ין סמכהא

ואצנע להא צ̇יאא ואלי ד̇ראע תכמלהא מן אלעלו וציר להא באבא פי ג̇נבהא אסאפל ות̇ואני ות̇ואלת̇ תצנעהא

והא אנא אתי בטופאן אלמא עלי אלארץ̇ לאהלך כל בשרי פיה רוח אלחיוה מן תחת אלסמא כל מן פי אלארץ̇ יתופי

ואת̇בת עהדי מעך ותדכ̇ל אלי אלתאבות אנת ובנוך וזוג̇תך ונסא בניך מעך

ומן כל חי מן ג̇מיע אלבשר אזואג̇א מן אלכל תדכ̇להם אלי אלתאבות ליחיו מעך ד̇כור ואנאת̇ יכונון

מן אלטאיר לאצנאפה ומן אלבהאים לאצנאפהא ומן סאיר דביב אלארץ̇ לאצנאפה אזואג̇א מן אלכל ידכ̇לון אליך ליחיו

ואנת פכ̇ד̇ לך מן כל טעאם יוכל וצימה אליך ויכון לך ולהא מאכלא

ועמל נוח בג̇מיע מא אמרה אללה בה