תפסיר רס"ג, בראשית ד

ואן אדם ואקע חוה זוג̇תה פחמלת וולדת קין פקאלת קד רזקת רג̇לא מן ענד אללה

ת̇ם עאודת וולדת אכ̇אה הבל וכאן הבל ראעי גנם וקין כאן יפלח אלארץ̇

פלמא כאן בעד איאם אתי קין מן ת̇מר אלארץ̇ בהדיה ללה

והבל אתי הו איצ̇א מן בכור גנמה ומן סמאנהא פקבל אללה הבל והדיתה

וקין והדיתה לם יקבלהמא ואשתד עלי קין ג̇דא ווקע וג̇הה חיאא

וקאל אללה לקין לם אשתד עליך ולם וקע וג̇הך

אלא אן ג̇ודת קבלת ואד̇ לם תג̇וד פאינמא אתג̇הת כ̇טאך ראבץ̇ ואליך קיאדה ואנת אלמסלט עליה באלאכ̇תיאר

ת̇ם קאול קין הבל אכ̇אה פלמא כאנא פי אלצחרא קאם קין אלי הבל אכ̇יה פקתלה

פקאל אללה מקררא אין הבל אכ̇וך קאל לא אעלם אחאפט̇ אכ̇י אנא

פקאל לה מא ד̇א צנעת צות דם אכ̇יך צארך̇ אלי מן אלארץ̇

ואלאן אנת מלעון מן אלארץ̇ אלתי פתחת פאהא וקבלת דם אכ̇יך מן ידך

באן תפלח אלארץ̇ ולא תעוד אן תעטיך קואהא נאיעא ונאידא תכון פי אלארץ̇

קאל קין ללה ד̇נבי אעט̇ם מן אן יגפר

פאן טרדתני אליום ען וג̇ה אלארץ̇ הל מן בין ידיך אנסתר ואן כנת נאיעא ונאידא פי אלארץ̇ כאן כל מן וג̇דני יקתלני

קאל אללה לד̇לך כל מן קתל קין יקאד בה כת̇ירא פג̇על אללה לקין איה לילא יקתלה כל מן וג̇דה

פכ̇רג̇ קין מן בין ידי אללה פאקאם בבלד נוד שרקי עדן

וואקע קין זוג̇תה פחמלת וולדת חנוך ת̇ם אנה בנא קריה פסמאהא באסם אבנה חנוך

ת̇ם ולד לחנוך עירד ועירד אולד מחויאל ומחויאל אולד מתושאל ומתושאל אולד למך

ואתכ̇ד̇ לה למך זוג̇תין אסם אחדאהמא עדה ואלאכ̇רי צלה

פולדת עדה יבל והו כאן אול מן סכן אלאכ̇ביה ומלך מאשיה

ואסם אכ̇יה יובל והו כאן אול מן חמל אלטנבור ואלקיתאר

וצלה הי איצ̇א ולדת תובל קין והו כאן אול ציקל לג̇מיע צנעה אלנחאס ואלחדיד וכאנת אכ̇תה נעמה

פקאל למך לנסאה ואת̇קא יא עדה ויא צלה אסמעא קולי יא נסא למך אנצתא מקאלתי אתריאני קתלת רג̇לא בשג̇תי או צביא בג̇ראחתי

פאן כאן כת̇ירא יקאד בקין פבלמך אכת̇ר ואכת̇ר

ואן אדם ואקע איצ̇א זוג̇תה פולדת אבנא ואסמתה שת קאלת קד רזקני אללה נסלא אכ̇ר בדל הבל אד̇ קתלה קין

ולשת הו איצ̇א אולד אבן וסמאה אנוש חיניד̇ תבד̇לת אלדעוה באסם אללה