תפסיר רס"ג, בראשית מט

ת̇ם דעא יעקוב בבניה וקאל אג̇תמעו אכ̇ברכם במא ינאלכם פי אכ̇ר אלאיאם

אג̇תמעו ואסמעו ד̇לך יא בנו יעקוב ואקבלו מן אסראיל אביכם

ראובן אנת בכרי וקותי ואול נילי מפצ̇ל פי אלשרף מפצ̇ל פי אלעז

ואלאן בנהלה מן אלמא לא תפצ̇ל אד̇ צעדת אלי מצ̇ג̇ע אביך חיניד̇ ממא תבד̇לת פראשי תכ̇לץ

שמעון ולוי אכ̇ואן פי אלה אלט̇לם פרצ̇תהמא

ופי עצבתהמא לא תדכ̇ל נפסי ופי תג̇וקהמא לא תג̇תמע ד̇אתי לאן בגצ̇בתהמא קתלא אמה וברצ̇אהמא קלעא סורהא

פמד̇מום גצ̇בהמא מא אעזה וחמיתהמא מא אצעבהא אקסמהמא פי אליעקב ואבדדהמא פי אלאסראיל

ואנת יא יהודה יסידונך אכ̇ותך וידך פי אקפא אעדאיך ויכ̇צ̇ע לך בנו אביך

תכון יא יהודה כשבל אלאסד פי אלקוה לאנך כ̇לצת אבני מן אלקתל אלד̇י אד̇א ג̇ת̇א ורבץ̇ כאסד ולבוה מן ד̇א ית̇ירה

ולא יזול אלקצ̇יב מן אליהודה ואלראסם מן תחת אמרה אלי אן יג̇י אלד̇י הו להו ואליה תג̇תמע אלשעוב

ראבטא ללג̇פן ג̇חאשה וללסריק בני אתניה גאסלא באלכ̇מר לבאסה ובדם אלענב כסותה

מזור אלעינין אכת̇ר מן אלכ̇מר ואביץ̇ אלאסנאן אכת̇ר מן אללבן

זבולון פי סאחל אלבחר יסכן ופי סאחלה ספן וטרף תכ̇מה אלי צידא

יששכר כג̇סם מנפרד ראבץ̇ בין אלצפין

ת̇ם ראי אלראחה מא אג̇ודהא ואלארץ̇ מא אנעמהא פימד ענקה ללנקל ויציר כאלד̇מה כ̇אדמא

דן יחכם לקומה כג̇מלה סבט מן בני אסראיל

ויכון דן כאלת̇עבאן עלי אלטריק וכאלמערון עלי אלסכה אללאסע עקב אלפרס פוקע ראכבה אלי ורא

יקול רג̇ות גות̇ך יא רבי

גד אי כרדוס תכרדס עליה פהו יג̇ד אעקאבה

ואשר טעאמה סמין והו יעטי מלאד̇ אלמלוך

נפתלי כאילה מרסלה תרד אקואל אלחסני

ויוסף אבן מת̇מר כגצן מת̇מר עלי עין מא לה ערוק קד אמתדת עלי סור

אמרוה פכת̇רו ותהדדוה אצחאב אלסהאם

פת̇בתת קוסה פי צלאבה ופאזא ד̇ראעאה מן טאעה ג̇ליל יעקוב ומן ת̇ם רעא ד̇את אסראיל

אסאל מן אלטאיק אלאה אביך אן יעינך ומן אלכאפי אן יבארך פיך ברכאת אלסמא מן אלעלו ברכאת אלגמר אלראבצ̇ה ספלא ברכאת אלת̇דאיא ואלבטון

וברכאת אביך תנצ̇אף אלי ברכאת אסלאפי ואלי מא אשתהי יפאע אלדהר ויכון ג̇מיע ד̇לך עלי ראס יוסף והאמה נאסך אכ̇ותה

בנימן כאלד̇יב יפתרס באלגדאה יאכל נהבא ובאלעשי יקסם סלבא

האולי ג̇מיע אסבאט אסראיל את̇ני עשר והד̇א מא קאל להם אבוהם ובארך פיהם כל רג̇ל חסב אסתחקאקה בארך עליהם

ת̇ם אוצאהם וקאל להם אנא מנצ̇ם אלי קומי אדפנוני מע אבאי פי אלמגארה אלתי פי צ̇יעה עפרון אלחתי

הי אלמגארה אלתי פי אלצ̇יעה אלמצ̇אעפה בחצ̇רה ממרא פי בלד כנעאן אלתי אשתראהא אברהים מן עפרון אלחתי חוז קבר

ת̇ם דפנו אברהים וסארה זוג̇תה ות̇ם דפנו אסחק ורבקה זוג̇תה ות̇ם דפנת לאה

שרא אלצ̇יעה ואלמגארה אלתי פיהא מן בני חת

פלמא פרג יעקוב מן וציתה לבניה צ̇ם רג̇ליה אלי אלסריר ותופי וצאר אלי קומה