תפסיר רס"ג, בראשית מח

וכאן בעד הד̇ה אלאמור קיל ליוסף אן אבאך מריץ̇ פאכד̇ אבניה מעה מנשה ואפרים

ת̇ם אכ̇בר יעקוב וקיל לה הוד̇א אבנך יוסף דאכ̇ל אליך פתקוי אסראיל וג̇לס עלי אלסריר

פקאל יעקוב ליוסף אעלם אן אלטאיק אלכאפי תג̇לא לי פי לוז פי בלד כנעאן ובארך פי

וקאל לי האנא מת̇מרך ומכת̇רך ואג̇על מנך ג̇וק אמם ואעטי הד̇א אלבלד לנסלך בעדך חוז אלדהר

פאלאן אבנאך אללד̇ין ולדא לך פי בלד מצר אלי אן אתיתך אלי מצר המא ינסבאן אלי אפרים ומנשה מת̇ל ראובן ושמעון יכונא לי

ותאלידך אלד̇י תלד בעדהמא אליך ינסבון ואלי אסמא אכויהם יצ̇אפון פי נחלתהם

ואמא אנא פפי מג̇יי מן פדן מאתת עני רחל פי בלד כנעאן פי אלטריק וקד בקי מיל מן אלמסאפה אלי דכ̇ול אלי אפרת פדפנתהא ת̇ם פי טריק אפרת הי בית לחם פלם יולד לי בעד ד̇לך

ולמא רא אסראיל אבני יוסף קאל מן האולי

קאל יוסף אלי אביה אבנאי אללד̇ין רזקניהמא אללה ההנא קאל קדמהמא אלי ואבארך פיהמא

ועינא אסראיל קד תיקלתא מן אלשיכ̇וכ̇ה לם יטק אן ינט̇ר פקדמהמא אליה פקבלהמא ועאנקהמא

וקאל אסראיל ליוסף אלנט̇ר אלי וג̇הך לם אט̇ן בה והוד̇א קד אראני אללה איצ̇א נסלך

ת̇ם אכ̇רג̇המא מן ענד חג̇רה וסג̇ד יוסף עלי וג̇הה עלי אלארץ̇

ת̇ם אכ̇ד̇ יוסף כליהמא אפרים מן ימינה מן יסאר אסראיל ומנשה ביסארה מן ימין אסראיל וקדמהמא אליה

פמד אסראיל ימינה פג̇עלהא עלי ראס אפרים והוא אלאצגר ויסארה עלי ראס מנשה אחכם ידיה כד̇אך עלי אן מנשה אלבכר

ובארך פי יוסף וקאל לה אללה אלד̇י סלכו אבאי פי טאעתה אברהים ואסחק הו אללה אלד̇י רעאני מד̇ כנת אלי הד̇א אליום

באלמלאך אלד̇י פכני מן כל שר הו יבארך פי הד̇ין אלגלאמין ויסמיאן באסמי ואסם אבאי אברהים ואסחק וינמיאן כת̇רה פי אלארץ̇

פלמא ראי יוסף אן אבאה קד ג̇על ידה אלימני עלי ראס אפרים סאה ד̇לך ענדה פאסנדהא ליזילהא ען ראס אפרים אלי ראס מנשה

וקאל יוסף לאביה ליס כד̇א יא אבי בל הד̇א אלבכר אג̇על ימינך עלי ראסה

פאבא אבוה וקאל קד עלמת יא בני אן הד̇א יכת̇ר איצ̇א ותכון מנה אמה ולכני אעלם אן אכ̇אה אלאצגר יכת̇ר מנה ויכון נסלה מל אלאמם שבהא

פלמא ברך פיהמא פי ד̇לך אליום קאל בך יתבארך בנו אסראיל קאילין בעץ̇ לבעץ̇ יצירך אללה מת̇ל אפרים ומנשה פקדם אפרים עלי מנשה

ת̇ם קאל אסראיל ליוסף אנא מאית ויכון אללה מעכם וירדכם אלי בלד אבאיכם

ואנא קד אעטיתך חט̇אא זאידא עלי אכ̇ותך אלד̇י אכ̇ד̇תה מן ידי אלאמוריין בסיפי וקוסי