תפסיר רס"ג, בראשית נ

פאנכב יוסף עלי וג̇ה אביה פבכא עליה וקבלה

ואמר יוסף עבידה אלאטבא אן יחנטו אבאה פחנטת אלאטבא אסראיל

אלי אן כמל לה ארבעון יומא לאן כד̇אך כאנת תכמל איאם אלמחנוטין ובכא עליה אלמצריון סבעין יומא

ולמא ג̇אזת איאם בכאיה כלם יוסף אל פרעון וקאל להם אן וג̇דת חטאא ענדכם כלמו פרעון וקולו לה

אן אבי כאן אסתחלפני וקאל לי הא אנא מאית אדפני פי קברי אלד̇י כריתה לי פי בלד כנעאן ואלאן אצעד אדפן אבי וארג̇ע

קאל אצעד אדפן אבאך כמא אחלפך

פצעד יוסף לידפן אבאה פצעד מעה ג̇מיע קואד פרעון ושיוך̇ אלה וג̇מיע שיוך̇ בלד מצר

וג̇מיע אל יוסף ואכ̇ותה ואל אביה עדא אן אטפאלהם וגנמהם ובקרהם תרכוהא פי בלד אלסדיר

וצעד מעה איצ̇א אלכ̇יל ואלפרסאן פכאן אלעסכר עט̇ימא ג̇דא

וג̇או אלי אנדר אלעוסג̇ אלד̇י פי עבר אלארדן פנדבוה ת̇ם נדבא כבירא עט̇ימא ג̇דא וצנע לאביה חזנא סבעה איאם

פרא סאכן אלבלד אלכנעאני אלחזן פי אנדר אלעוסג̇ פקאלו הד̇א חזן עט̇ים ללמצריין ולד̇לך סמי חזן אלמצריין אלד̇י פי עבר אלארדן

וצנע בה בנוה בג̇מיע מא אוצאהם

וחמלוה אלי בלד כנעאן ודפנוה פי מגארה אלצ̇יעה אלמצ̇אעפה אלתי אשתראהא אברהים אלצ̇יעה לחוז קבר מן עפרון אלחתי בחצ̇רה ממרא

תם רג̇ע יוסף אלי מצר הו ואכ̇ותה וסאיר מן כאן צעד מעה לידפן אבאה בעד מא דפנה

פלמא ראו אכ̇וה יוסף אן מאת אבוהם קאלו כילא יחקדנא יוסף ויכאפינא בג̇מיע אלשר אלד̇י אולינאה

פאמרו מן קאל ליוסף אן אבאך אוצאנא קבל מותה קאילא

כד̇א קולו ליוסף יא יוסף אגפר ד̇נב אכ̇ותך וכ̇טיתהם פקד אולוך שרא פאלאן נסאלך אן תצפח ד̇נב עביד אלאה אביך פבכא יוסף חין כלמוה בד̇לך

וג̇או אכ̇ותה איצ̇א ווקעו בין ידיה וקאלו הוד̇א נחן עביד לך

וקאל להם יוסף לא תכ̇אפו אנני אכ̇אף אללה

אנתם קדרתם עלי שרא ואללה קדר כ̇ירא לקבל אן יצנע מא תרוהא אליום ויחיי מנכם קומא כת̇ירא

פאלאן לא תכ̇אפו אנא אמונכם ואטפאלכם פעזאהם ודאראהם

ת̇ם אקאם במצר הו ואל אביה ועאש יוסף מיאה ועשר סנין

חתי ראי לאפרים בנין ת̇ואלת̇א ואיצ̇א בנו מכיר אבן מנשה ולדו פי חג̇רה

ת̇ם קאל לאכ̇ותה אנא מאית ואללה סיד̇כרכם ויצעדכם מן הד̇א אלבלד אלי אלבלד אלד̇י אקסם לאברהים ואסחק ויעקוב

פאחלף יוסף בני אסראיל וקאל להם אד̇א ד̇כרכם אללה פאצעדו בעט̇אמי מעכם

פמאת יוסף אבן מיאה ועשר סנין וחנטוה וציר פי צנדוק במצר