תפסיר רס"ג, בראשית מז

ת̇ם דכ̇ל יוסף אלי פרעון פאכ̇ברה וקאל אבי ואכ̇ותי וגנמהם ובקרהם וג̇מיע מא להם קד ג̇או מן בלד כנעאן והוד̇א הם פי בלד אלסדיר

ואכ̇ד̇ כ̇מסה אנאס מן אכ̇ותה ואוקפהם בין ידי פרעון

וקאל פרעון לאכ̇וה יוסף מא צנעתכם קאלו לפרעון רעא גנם עבידך נחן ואבאונא

ת̇ם קאלו לפרעון ג̇ינא נסכון בלדך אד̇ ליס מרעי לגנם עבידך ממא אשתד אלג̇וע פי בלד אלשאם ואלאן פליקם עבידך פי בלד אלסדיר

פקאל פרעון ליוסף אד̇ אתאך אבוך ואכ̇ותך

הוד̇א בלד מצר בין ידיך פי אג̇וד אלבלד סכן אבאך ואכ̇ותך וד̇לך אן יקימו פי בלד אלסדיר ואן כנת תעלם אן פיהם ד̇וו חיל פצירהם רוסא וכלא עלי מאשיתי

ואדכ̇ל יוסף יעקוב אבאה פאוקפה בין ידי פרעון פסלם עליה

וקאל פרעון ליעקוב כם איאם סני חיותך

וקאל יעקוב לפרעון איאם סני עמרי מאיה ות̇לת̇ון סנה וכאנת קלילה ורדיה ולם תלחק בסני חיות אבאי חסב איאם סכנאהם

ת̇ם סלם יעקוב עלי פרעון וכ̇רג̇ מן בין ידיה

ואסכן יוסף אבאה ואכ̇ותה ואעטאהם חוזא פי בלד מצר פי אג̇ודה והו בלד עין שמס כמא אמר פרעון

ומאן יוסף אבאה ואכ̇ותה וסאיר אלה טעאמא עלי קדר אטפאלהם

וטעאם ליס פי ג̇מיע אלבלד ממא אשתד אלג̇וע ג̇דא חתי כל אהל בלד מצר ובלד כנעאן מן קבל אלג̇וע

וג̇מע יוסף ג̇מיע אלורק אלד̇י כאן מוג̇ודא פי בלד מצר ובלד כנעאן באלמירה אלתי כאנו ימתארונהא ואדכ̇לה יוסף אלי בית מאל פרעון

חתי פני אלורק מן בלד מצר ובלד כנעאן ת̇ם ג̇או ג̇מיע אלמצריין אלי יוסף קאילין אעטנא טעאמא ולא נמות חד̇אך אד̇ פני אלורק

קאל להם האתו מאשיתכם אביעכם בהא אד̇ פני אלורק

פאתוה במאשיתהם פאעטאהם טעאמא באלכ̇יל ומאשיה אלגנם ואלבקר ואלחמיר וג̇זאהם באלטעאם תלך אלסנה

פלמא פנית תלך אלסנה ג̇אוה פי אלסנה אלת̇אניה וקאלו לה לא נכתם מן סידנא אן אלורק קד פני ואלמואשי מן אלבהאים ענד סידנא ולם יבק בין ידי סידנא אלא אבדאננא וריאצ̇נא

פלם נמות בחצ̇רתך נחן וריאצ̇נא אשתרנא וריאצ̇ונא באלטעאם חתי נציר עבידא וריאצ̇נא מלכא לפרעון ואעטנא חבא נחיא בה ולא נמות ואלארץ̇ לא תכ̇ל

פאשתרי יוסף ג̇מיע ריאץ̇ אלמצריין לפרעון לאנהם באעו כל רג̇ל צ̇יעתה ממא אשתד עליהם אלג̇וע פצארת אלצ̇יאע לפרעון

ונקל אלקום מן קראהם מן טרף תכ̇ם מצר אלי טרפה

עדא ריאץ̇ אימתהם פאנה לם ישתרהא לאן אלרזק כאן להם מן פרעון פכאנו יאכלון רזק פרעון ולד̇לך לם יחתאג̇ו אן יביעו ריאצ̇הם

ת̇ם קאל יוסף ללקום הוד̇א קד אשתרית אליום אנתם וריאצ̇כם לפרעון הא לכם חבא תזרעוה פי אלארץ̇

פאד̇א דכ̇לת אלגלאת פאעטו אלכ̇מס לפרעון ואלארבע אג̇זא תכון לכם לבד̇ר אלצ̇יאע ומאכלכם ומן פי מנאזלכם ואטפאלכם

קאלו קד אחייתנא נג̇ד חט̇אא ענד סידנא ונכון עבידא לפרעון

פצירה יוסף רסמא אלי הד̇א אליום עלי בלד מצר אן יעטו אלכ̇מס לפרעון עדא ריאץ̇ אימתה וחדהם לם תצר לפרעון

ולמא אקאם אסראיל פי בלד מצר פי בלד אלסדיר חאזוהא ואתימרו וכת̇רו ג̇דא

ועאש יעקוב פי בלד מצר סבע עשרה סנה פצאר ג̇מיע עמרה סני חיותה מאיה וסבעא וארבעין סנה

ולמא קרב אג̇ל אסראיל ללמות דעא באבנה יוסף וקאל לה אן וג̇דת חט̇אא ענדך אום אלאן בידך אלי עהדי ואצנע מעי פצ̇לא ואחסאנא באן לא תדפנני במצר

בל אד̇א צרת אלי אבאי אחמלני מן מצר ואדפני פי מקברתהם קאל אנא אצנע כמא קלת

קאל לה אחלף לי פחלף לה וסג̇ד אסראיל שכרא עלי טרף אלסריר