תפסיר רס"ג, בראשית מו

פרחל אסראיל וג̇מיע מא לה חתי ג̇א אלי ביר סבע פד̇בח ד̇באיח לאלה אביה אסחק

פקאל אללה לה פי רויא אלליל יא יעקוב יא יעקוב קאל לביך

קאל אנא אללה אלאה אביך לא תכ̇ף מן אלחדור אלי מצר פאני אציר מנך ת̇ם אמה עט̇ימה

אנא אנזל מעך אלי מצר ואנא אצעדך ויוסף יגמצ̇ך

פקאם יעקוב מן ביר סבע וחמלו בנו אסראיל יעקוב אבאהם ואטפאלהם ונסאהם עלי אלעג̇ל אלתי בעת̇ בהא פרעון לתחמלה

ואכ̇ד̇ו מאשיתהם וסרחהם אלד̇י מלכוה פי בלד כנעאן וג̇או אלי מצר וג̇מיע נסלה מעה

בנוה ובנו בניה ובנאתה ובנאת בניה וסאיר נסלה ג̇א בהם מעה אלי מצר

והד̇ה אסמא בני אסראיל אלדאכ̇לין אלי מצר יעקוב ובנוה בכרה ראובן

ובנו ראובן חנוך ופלוא חצרן וכרמי

ובנו שמעון ימואל וימין ואהד ויכין וצחר ושאול אבן אלכנעאניה

ובנו לוי גרשון וקהת ומררי

ובנו יהודה ער ואונן ושלה ופרץ וזרח ומאת ער ואונן פי בלד כנעאן וכאן בנו פרץ חצרן וחמול

ובנו יששכר תולע ופוה ויוב ושמרון

ובנו זבולן סרד ואלון ויחלאל

האולי בנו לאה אלד̇ין ולדתהם ליעקוב פי פדן ארם ודינה בנתהם ג̇מיעהם ת̇לאת̇ ות̇לאת̇ין נפסא

ובנו גד צפיון וחגי ושוני ואצבון ערי וארודי ואראלי

ובנו אשר ימנה וישוה וישוי ובריעה וסרח אכ̇תהם ובנו בריעה חבר ומלכיאל

האולי בנו זלפה אלתי אעטאהא לבן ללאה אבנתה ג̇מיע מא ולדת ליעקוב סת עשרה נפסא

בנו רחל זוג̇ה יעקוב יוסף ובנימן

פולד ליוסף פי בלד מצר מא ולדת לה אסנת אבנת פוטיפרע אמאם און מנשה ואפרים

ובנו בנימן בלע ובכר ואשבל וגרא ונעמן ואחי וראש ומפים וחפים וארד

האולי בנו רחל אלד̇ין ולדו ליעקוב ג̇מיעהם ארבע עשרה נפסא

ובנו דן חושים

ובנו נפתלי יחצאל וגוני ויצר ושלם

האולי בנו בלהה אלתי אעטאהא לבן לרחל אבנתה וג̇מיע מא ולדתה ליעקוב סבע נפוס

ג̇מיע אלנפוס אלג̇איה מן אליעקוב אלי מצר מא כ̇רג̇ מן צלבה וד̇לך סוי נסוה בני יעקוב סת וסתון נפסא

ויוסף ואבנאה אלד̇אן ולדא לה במצר נפסאן ג̇מלה אלנפוס אלד̇ין דכ̇לת מן אליעקוב אלי מצר סבעון

ת̇ם בעת̇ יעקוב ביהודה בין ידיה אלי יוסף לידלה עלי בלד אלסדיר ת̇ם ג̇או אליה

ואסרג̇ יוסף דאבתה וצעד יתלקא אסראיל אבאה אלי אלסדיר פלמא ט̇הר לה אנכב עלי ענקה ובכא עליה הויא

וקאל לה אמות אלאן בעד מא ראית וג̇הך אן עאדך באק

ת̇ם קאל יוסף לאכ̇ותה וסאיר אלאביה אצעד אלי פרעון פאכ̇ברה ואקול לה אכ̇ותי ואל אבי אלד̇ין פי בלד כנעאן קד ג̇או אלי

ואלקום רעא גנם לאנהם כאנו ד̇וי מאשיה וגנמהם ובקרהם וג̇מיע מא להם אתו בה

פאד̇א דעא בכם פרעון וקאל לכם מא צנעתכם

קולו כאן עבידך ד̇וי מאשיה מן צגרנא אלי אלאן וכד̇לך אבאונא לקבל אן תקימו פי בלד אלסדיר לאן אלמצריין יכרהון כל ראעי גנם