תפסיר רס"ג, בראשית מב

פסמע יעקוב אן אלמירה מוג̇ודה במצר פקאל יעקוב לבניה לא תתואנו

קאל הוד̇א קד סמעת אן מירה מוג̇ודה במצר אנחדרו אליהא ואמתארו לנא מנהא ונחיא ולא נמות

פאנחדרו עשרה אכ̇וה יוסף לימתארו ברא מן מצר

ובנימין אכ̇ו יוסף לם יבעת̇ה יעקוב מע אכ̇ותה קאל כילא תלחקה אלמניה

פלמא דכ̇לו בנו אסראיל לימתארו פי וסט אלדאכ̇לין אד̇ כאן אלג̇וע פי בלד כנעאן

ויוסף הו סלטאן אלבלד והו ממיר לג̇מיע קומה פג̇או אכ̇ותה וסג̇דו לה עלי וג̇וההם עלי אלארץ̇

פראי יוסף אכ̇ותה פאת̇בתהם ותנכר אליהם וכלמהם בצעובה פקאל להם מן אין ג̇יתם קאלו מן בלד כנעאן נמתאר טעאמא

פאת̇בת יוסף אכ̇ותה מחקקא והם לם ית̇בתוה

ולמא ד̇כר אלאחלאם אלתי ראהא להם קאל להם ג̇ואסיס אנתם אנמא ג̇יתם לתנט̇רו כ̇בר אלבלד

קאלו לה לא יא סידי אנמא ג̇או עבידך ימתארון טעאמא

ונחן כלנא בנו רג̇ל ואחד ונחן ת̇קאת מא כאן קט עבידך ג̇ואסיס

קאל להם לא בל אנמא ג̇יתם לתנט̇רו כ̇בר אלבלד

קאלו נחן עבידך את̇נא עשר אכ̇א בנו רג̇ל ואחד פי בלד כנעאן ואלאצגר אליום ענד אבינא ואלואחד מפקוד

קאל להם יוסף הו מא קלת לכם אנכם ג̇ואסיס

בהד̇ה אלכ̇לה תמתחנון וחיוה פרעון לא כ̇רג̇תם מן ההנא אלא במג̇י אכ̇יכם אלאצגר ההנא

אבעת̇ו בואחד מנכם ויאכ̇ד̇ אכ̇אכם ואנתם תחבסון חתי ימתחן כלאמכם הל אלחק מעכם ואם לא וחיוה פרעון אנכם ג̇ואסיס

פצ̇מהם אלי אלחפט̇ ת̇לת̇ה איאם

ת̇ם קאל להם פי אליום אלת̇אלת̇ אצנעו כ̇לה תחיו בהא פאני אתקי אללה

אן כנתם ת̇קאת פואחד מנכם יחבס פי בית חפט̇כם ואנתם אמצ̇ו ואדו מירה קות מנאזלכם

ואתו באכ̇יכם אלאצגר אלי ויתחקק כלאמכם ולא תהלכו פצנעו כד̇א

ת̇ם קאלו בעצ̇הם לבעץ̇ באלחקיקה את̇מון נחן פי אכ̇ינא אד̇ ראינא נפסה פי שדה וצ̇רעה אלינא ולם נקבלה לד̇לך נאלתנא הד̇ה אלשדה

פאג̇אבהם ראובן קאילא אלם אקל לכם לא תכ̇טו עליה פלם תקבלו ואלאן פהוד̇אנא מטאלבון בדמה

והם לם יעלמו אן יוסף יפהם ד̇לך לאנה אוקף תרג̇מאנא בינה ובינהם

פאסתדאר ענהם ובכא ת̇ם רג̇ע אליהם פכ̇אטבהם ואכ̇ד̇ מן בינהם שמעון פחבסה בחצ̇רתהם

ת̇ם אמר יוסף פמלית אועיתהם ברא ורדת פצ̇צ̇הם כל רג̇ל אלי ג̇ולקה ואעטי להם זאדא ללטריק פלמא צנע בהם כד̇אך

חמלו מירתהם עלי חמירהם וסארו מן ת̇ם

ופתח אלואחד ג̇ולקה ליעטי עלפא לחמארה פי אלמבית פראי פצ̇תה פאד̇א בהא פי ועאיה

פקאל לאכ̇ותה קד רדת פצ̇תי והוד̇א הי פי ועאיי פנפרת קלובהם וזעג̇ כל ואחד מע אכ̇יה קאילין מא ד̇א צנע אללה בנא

ת̇ם ג̇או אלי יעקוב אביהם אלי בלד כנעאן פקצו עליה ג̇מיע מא נאלהם קאילין

כ̇אטבנא אלרג̇ל סיד אלבלד בצעובה ואתהמנא בג̇סאסה אלבלד

פקלנא לה נחן ת̇קאת לם נכן קט ג̇ואסיס

ונחן את̇נא עשר אכ̇א בנו אבינא אלואחד מפקוד ואלאכ̇ר ענד אבינא אליום פי בלד כנעאן

פקאל לנא אלרג̇ל סיד אלבלד בכ̇לה אעלם אנכם ת̇קאת אכ̇אכם אלואחד דעו ענדי וקות מנאזלכם כ̇ד̇ו ואמצ̇ו

ואתוני באכ̇יכם אלאצגר חתי אעלם אנכם לסתם בג̇ואסיס ואנתם ת̇קאת ואכ̇אכם אעטי לכם ותתג̇רון פי אלבלד

פבינאהם יפרגון אועיתהם פאד̇א בצרה פצ̇ה כל רג̇ל פי ועאיה פלמא ראו צרר פצ̇צ̇הם הם ואבוהם פפזעו

ת̇ם קאל להם יעקוב אבוהם קד את̇כלתמוני יוסף מפקוד ושמעון מחבוס ובנימן מטלוב עלי אג̇תמעת הד̇ה כלהא

קאל לה ראובן את̇כל אבני אן לם אג̇בה אליך אעטניה ואנא ארדה אליך

קאל לא ינחדר אבני מעכם לאן אכ̇אה קד מאת והו וחדה קד בקי פאן ואפתה אלמניה פי אלטריק אלד̇י תמצ̇ון פיה אנזלתם שיבתי בחסרה אלי אלת̇רי