תפסיר רס"ג, בראשית מג

ואלג̇וע שדיד פי אלבלד

פלמא פרג מן אכל אלמירה אלתי אתו בהא מן מצר קאל להם אבוהם ארג̇עו אמתארו לנא קלילא מן טעאם

קאל לה יהודה אן אלרג̇ל נאשדנא וקאל לנא לא תרו וג̇הי אלא ואכ̇וכם מעכם

פאן בעת̇ת אכ̇אנא מענא אנחדרנא ואמתרנא לך טעאמא

ואן לם תבעת̇ה לא ננחדר לאן אלרג̇ל קאל לנא לא תרו וג̇הי אלא ואכ̇וכם מעכם

קאל אסראיל ולם אסאתם אלי פאכ̇ברתם אלרג̇ל אן קד בקי לכם אך̇

קאלו אנה סאלנא אלרג̇ל ענא וען תאלידנא וקאל הל עאד אבוכם באק והל בקי לכם אך̇ פאכ̇ברנאה עלי סביל הד̇א אלכלאם הל עלמנא אנה סיקול אחדרו אכ̇אכם

ת̇ם קאל יהודה לאסראיל אביה אבעת̇ באלגלאם מענא ונמצ̇י ונחיא ולא נמות נחן ואנת ואטפאלנא

אנא אצ̇מנה ומן ידי תטלבה פאן לם אג̇בה אליך ואצ̇עה בין ידיך פאנא מכ̇טי לך טול אלזמאן

לולא אנא תלבת̇נא לכנא קד רג̇ענא מרתין

קאל להם אסראיל אבוהם אן כאן כד̇אך פאצנעו כ̇לה כ̇ד̇ו מן פאכהה אלבלד פי אועיתכם ואחדרוהא ללרג̇ל הדיה קליל תריאק וקליל עסל וכ̇רנוב ושאה בלוט ובטם ולוז

וצ̇עפא מן אלפצ̇ה כ̇ד̇ו מעכם ואלפצ̇ה אלמרדודה פי פואה אועיתכם רדוהא מעכם לעל כאן סהוא

וכ̇ד̇ו אכ̇אכם וקומו וארג̇עו אלי אלרג̇ל

ואלטאיק אלכאפי יעטיכם רחמה בין ידיה ויטלק לכם אכ̇אכם אלאכ̇ר ובנימין ואנא אכיאף אן את̇כל כמא ת̇כלת

פאכ̇ד̇ אלקום אלהדיה וצ̇עפא מן אלפצ̇ה אכ̇ד̇וה מעהם ובנימין פקאמו ואנחדרו אלי מצר ווקפו בין ידי יוסף

פלמא ראי יוסף אן בנימין מעהם קאל לחאג̇בה אדכ̇ל אלקום אלי אלמנזל ואד̇בח ד̇בחא ואצלחה פאן מעי יאכלון אלקום פי אלט̇הירה

פצנע אלרג̇ל כמא קאל לה יוסף פאדכ̇להם אלי מנזלה

ולמא ראי אלקום אנהם אדכ̇לו אלי מנזל יוסף וקאלו בסבב אלפצ̇ה אלמרדודה פי אועיתנא פי אלאבתדא נחן מדכ̇ולון ליתסבב עלינא ויתג̇נא עלינא ויכ̇ד̇נא עבידא וחמירנא מלכא

פתקדמו אלי חאג̇ב יוסף וכלמוה ענד באב אלבית

וקאלו יא סידי אנא אנחדרנא פי אלאבתדא נמתאר טעאמא

פלמא צרנא אלי אלמבית פתחנא אועיתנא פאד̇א בפצ̇ה כל רג̇ל פי ועאיה פצ̇תנא בוזנהא פרדדנאה מענא

ופצ̇ה אכ̇רי אחדרנאהא מענא לנמתאר טעאמא ולם נעלם מן ציר פצ̇תנא פי אועיתנא

קאל להם סלאם לכם לא תכ̇אפו אלאהכם ואלאה אביכם רזקכם כנזא פי אועיתכם ואמא פצ̇תכם פקד צארת אלי ת̇ם אכ̇רג̇ אליהם שמעון

ולמא אדכ̇ל אלרג̇ל אלקום אלי בית יוסף אעטאהם מאא פגסלו ארג̇להם וטרח קתא לחמירהם

והיו אלהדיה אלי אן ג̇א יוסף פי אלט̇הירה לאנהם סמעו אן ת̇ם יאכלון טעאמא

ולמא ג̇א יוסף אלי מנזלה אדכ̇לו אלהדיה אלתי מעהם אלי מנזלה וסג̇דו לה עלי אלארץ̇

פסאלהם ען סלאמתהם וקאל הל עאד אבוכם אלשיך̇ אלד̇י קלתם באק והל הו סאלם

קאלו עאד עבדך אבונא באק והו סאלם וכ̇רו וסג̇דו

ת̇ם רפע עיניה ונט̇ר בנימין אכ̇אה אבן אמה פקאל אהד̇א אכ̇וכם אלאצגר אלד̇י קלתם לי פקאל אללה ירוף עליך יא בני

פאסרע יוסף ממא האג̇ת רחמתה עלי אכ̇יה פטלב אן יבכי פדכ̇ל אלי אלכ̇דר ובכא ת̇ם

ת̇ם גסל וג̇הה וכ̇רג̇ ותרפק וקאל קדמו אלטעאם

פג̇עלו לה וחדה ולהם וחדהם וללמצריין אלד̇ין יאכלון מעה וחדהם ממא אלמצריון לא יסתג̇יזון אן יאכלו מע אלעבראנין טעאמא פאנה מכרוה ענדהם

ואג̇לסהם בין ידיה אלבכר כבכורתה ואלצגיר פי מרתבתה ואבהת אלקום בעצ̇הם לבעץ̇

פארסל בזלאת מן ענדה אליהם פכאנת זלה בנימין אכת̇ר מן זלאתהם כ̇מסה אצ̇עאף ושרבו מעה חתי סכרו