תפסיר רס"ג, בראשית מא

פלמא מצ̇ת סנתאן חאולתאן ראי פרעון כאנה ואקף עלי שאטי אלניל

וכאן קד צעד מנה סבע בקראת חסנאת אלמנט̇ר וצ̇כ̇מאת אללחם ורעת פי אלקרט

וכאן סבע בקראת אכ̇ר קד צעדן וראהן מן אלניל קביחאת אלמנט̇ר ורקיקאת אללחם ווקפת אלי ג̇אנבהן עלי שאטי אלניל

ת̇ם אכלת אלבקראת אלקביחאת אלמנט̇ר אלרקיקאת אללחם אלסבע אלבקראת אלחסנאת אלצ̇כ̇מאת ת̇ם אסתיקט̇ פרעון

ת̇ם נאם פראי ת̇אניה כאן סבעה סנבלאת קד נבתן פי קצבה ואחדה מלא ג̇יאד

וכאן סבע סנבלאת אכ̇ר דקאק משובה בריח אלקבול קד נבתן וראהן

ת̇ם בלעת אלסנבלאת אלדקאק אלסבע סנבלאת אלסמאן אלמלא ת̇ם אסתיקט̇ פרעון פאד̇א בה חלם

פלמא כאנת אלגדאה כרבת רוחה פבעת̇ פדעא בג̇מיע עלמא מצר וחכמאהא פקץ עליהם רויאה פלם יכן מן פסרהא לה

פתכלם רייס אלסקאה אלי פרעון וקאל אני אד̇כר אליום כ̇טאי

וד̇לך אן פרעון כאן קד סכ̇ט עלי עבדיה פוצ̇עהמא פי חפט̇ בית רייס אלסיאפין אנא ורייס אלכ̇באזין

פראינא חלמא פי לילה ואחדה אנא והו וכאנת רויא כל ואחד חסב תפסירה

וכאן ת̇ם מענא גלאם עבראני עבדא לרייס אלסיאפין פקצצנאהא עליה ופסרהא לנא פסר לכל ואחד חסב רויאה

פכמא פסר לנא כד̇אך כאן רדני אלמלך עלי מרתבתי וצלב ד̇אך

פבעת̇ פרעון פדעי ביוסף פחאצ̇רו בה מן אלחבס ותקצץ שערה ואבדל ת̇יאבה ודכ̇ל אלי פרעון

וקאל פרעון ליוסף קד ראית רויא וליס להא מפסר וקד סמעת ענך אנך אד̇א סמעת אלרויא פסרתהא

אג̇אבה יוסף וקאל מן גיר עלמי אללה יג̇יב פרעון באלסלאם

ת̇ם כלמה וקאל לה ראית כאנני ואקף עלי שאטי אלניל

וכאן קד צעדת מן אלניל סבע בקראת צ̇כ̇מאת אללחם חסנאת אלחלי פרעת פי אלקרט

וכאן סבע בקראת אכ̇ר קד צעדת וראהן עג̇אף קביחאת אלחלי ג̇דא ודקיקאת אללחם לם אר מת̇להא פי ג̇מיע בלד מצר פי אלקבח

פאכלת אלבקראת אלרקאק אלקביחה אלסבע אלבקראת אלאואיל אלצ̇כ̇מאת

פדכ̇לת אלי אג̇ואפהא ולם יתבין אנהא קד דכ̇לת ומנט̇רהא קביח כמא כאן אולא ת̇ם אסתיקט̇ת

ת̇ם ראית כאן סבע סנבלאת נבתת פי קצבה ואחדה מלא ג̇יאד

וכאן סבע סנבלאת צ̇אויאת רקאק משובה בריח אלקבול קד נבתן וראהן

פבלעת אלסנבלאת אלרקאק אלסבע סנבלאת אלג̇יאד וקלת ד̇לך ללעלמא ולם יכ̇ברוני בשי

אג̇אבה יוסף וקאל רויא פרעון ואחד אלד̇י סיצנעה אללה אכ̇בר פרעון

אלסבע אלבקראת אלג̇יאד ואלסבע סנבלאת אלג̇יאד הי סבע סנין כ̇יר הד̇א חלם ואחד

ואלסבע בקראת אלרקאק אלקביחה אלצאעדה וראהן ואלסבע סנבלאת אלפארגה אלמשובה בריח אלקבול תכון סבע סנין ג̇וע

הו אלקול אלד̇י קלתה לפרעון אלד̇י סיצנעה אללה אראה לפרעון

סתאתיכם סבע סנין יכון שבע כת̇יר פי ג̇מיע בלד מצר

ת̇ם תואפיכם סבע סנין ג̇וע מן בעדהא פינסא ג̇מיע אלשבע אלד̇י כאן פי בלד מצר חתי [יכאד] אן אלג̇וע יפני אהל אלבלד

ולא יתבין את̇ר ד̇לך אלשבע פי אלבלד מן קבל אלג̇וע אלאתי בעדה לאנה עט̇ים ג̇דא

ואמא תכריר אלרויא עלי פרעון מרתין פלאן אלאמר ת̇אבת ענד אללה והו מסרע אן יצנעה

ואלאן ינט̇ר פרעון רג̇לא פהימא חכימא יוליה עלי בלד מצר

יטלק לה אן יוכל וכלא עלי אלבלד חתי יעבו גלה בלד מצר פי סבע סנין אלשבע

ויג̇מעון טעאם הד̇ה סני אלג̇יד אלאתיאת ויכנזון ברהא תחת יד וכלא פרעון ויחפט̇ון טעאמהא פי קראהא

יכון אלטעאם ודיעה פיהא לסבע סני אלג̇וע אלתי תכון פי בלד מצר ולא ינקטע אהל אלבלד באלג̇וע

פחסן כלאמה ענד פרעון וג̇מיע קואדה

ת̇ם קאל פרעון לקואדה הל נג̇ד מת̇ל הד̇א רג̇לא פיה רוח אללה עלמא

ת̇ם קאל לה בעד מא ערפך אללה ג̇מיע הד̇ה אלאמור לא פהם חכים מת̇לך

אנת תכון עלי ביתי ואלי אמרך ינקאד ג̇מיע קומי לא אשרף עליך אלא באלכרסי פקט

ת̇ם קאל פרעון ליוסף אנט̇ר קד וליתך ג̇מיע בלד מצר

ת̇ם נזע פרעון כ̇אתמה מן ידה וג̇עלה פי יד יוסף ואלבסה ת̇יאב עשר וציר טוקא מן ד̇הב פי ענקה

וארכבה פי ג̇ניבתה ונודי בין ידיה אלטריק וולאה עלי בלד מצר

ת̇ם קאל לה ועלי אני פרעון פמן גיר ראיך לא ימד רג̇ל ידה אלי ענן ולא רג̇לה אלי רכאב עלי ג̇מיע מצר

וסמי פרעון אסם יוסף מוצ̇ח אלכ̇פאיא וזוג̇ה באסנת בנת פוטיפרע אמאם אלאסכנדריה וכ̇רג̇ יוסף ואליא עלי ג̇מיע בלד מצר

וכאן יוסף אבן ת̇לאת̇ין סנה חין וקף בין ידי פרעון מלך מצר ולמא כ̇רג̇ מן בין ידיה טאף פי ג̇מיע בלד מצר

ת̇ם אנבתת אלארץ̇ פי סבע סני אלשבע מלו אלכ̇זאין

פג̇מע באקי טעאם אלסבע סנין אלתי כאנת פי בלד מצר וג̇על טעאמהא פי קראהא וג̇על טעאם כל צ̇יעה פי אלקרי אלתי חואליהא

פג̇מע יוסף מן אלבר שביהא ברמל אלבחר כ̇תרה ג̇דא חתי אנתהי ען אחצאיה ממא לא אחצא לה

וולד ליוסף אבנאן קבל אן תדכ̇ל סנה אלג̇וע ולדתהמא לה אסנת בנת פוטיפרע אמאם און

פסמי אלבכר מנשה קאל אן אללה קד נסאני ג̇מיע שקאי ומא כאן מנה פי בית אבי

וסמי אלת̇אני אפרים קאל אן אללה אנמאני פי בלד צ̇עפי

ת̇ם פנית סבע סני אלשבע אלד̇י כאן פי בלד מצר

ובדאת סבע סני אלג̇וע אן תאתי כמא קאל יוסף פכאן ג̇וע פי ג̇מיע אלבלדאן ופי ג̇מיע בלד מצר כאן טעאם

פלמא ג̇אע אהל מצר צרך̇ אלקום אלי פרעון בסבב אלטעאם וקאל להם אמצ̇ו אלי יוסף מא יקול לכם אצנעוה

ולמא אנבסט אלג̇וע עלי וג̇ה אלבלד פתח יוסף ג̇מיע מא פיה אלטעאם פאמאר אלמצריין ואשתד אלג̇וע פי בלד מצר

וכת̇יר מן אהל אלבלדאן ג̇או אלי מצר אן ימתארו מן יוסף אד̇ אשתד אלג̇וע פי בלדאנהם