תפסיר רס"ג, בראשית לד

ת̇ם כ̇רג̇ת דינה אבנה לאה אלתי ולדתהא ליעקוב לתנט̇ר אלי בנאת אהל אלבלאד

פראהא שכם בן חמור אלחוי שריף אלבלד פאכ̇ד̇הא וצ̇אג̇עהא ואתאהא

ותעלקת נפסה בדינה בנת יעקוב ואחבהא ודאראהא

וקאל שכם לחמור אביה כ̇ד̇הא לי זוג̇ה

וסמע יעקוב אנה קד נג̇ס דינה בנתה וכאן בנוה מע מאשיתה פי אלצחרא פאמסך יעקוב אלי מג̇יהם

ת̇ם כ̇רג̇ חמור אבו שכם אלי יעקוב ליכלמה פי ד̇לך

ובנו יעקוב ג̇או מן אלצחרא כמא סמעו פאגתם אלקום ואשתד עליהם ג̇דא לאנה קד צנע כ̇סאסה באסראיל אד̇ צ̇אג̇ע בנת יעקוב וכד̇אך לא יצנע

פכלמהם חמור קאילא שכם אבני קד שגפת נפסה באבנתכם פאעטוהא לה זוג̇ה

וצאהרונא אעטונא בנאתכם וכ̇ד̇ו בנאתנא

ואקימו מענא הוד̇א אלבלד בין ידיכם אג̇לסו ואתג̇רו פיה וחוזוה

וקאל שכם איצ̇א לאביהא ולאכ̇ותהא אג̇ד חט̇א ענדכם ומא תקולון לי אעטיכם

כת̇רו עלי ג̇דא מן אלמהר ואלאעטא אעטיכם כמא תקולון לי ואעטוני אלג̇אריה זוג̇ה

פאג̇אבוהמא בנו יעקוב במכר קאילין כמא נג̇ס דינה אכ̇תהם

וקאלו להמא לא נטיק אן נצנע הד̇א אלאמר אן נעטי אכ̇תנא לרג̇ל לה קלפה לאנה עאר עלינא

לכנא בכ̇לה נטאבקכם אן צרתם מת̇לנא ואכ̇תתן מנכם כל רג̇ל

נעטיכם בנאתנא ותזוג̇נא בנאתכם ואקמנא ענדכם וצרנא אמה ואחדה

ואן לם תקבלו מנא אן תכ̇תתנו אכ̇ד̇נא אכ̇תנא ומצ̇ינא

וחסן כלאמהם ענד חמור ושכם אבנה

ולם יוכ̇ר אלגלאם אן יצנע ד̇לך אלאמר לאנה מריד אבנה יעקוב והו אכרם מן ג̇מיע בית אביה

פלמא דכ̇ל חמור ושכם אבנה אלי קריתהמא כ̇אטבא אהלהא קאילין

האולי אלקום מסאלמון לנא אן יג̇לסו פי אלבלד ויתג̇רון פיה והוד̇א הו ואסע אלאמאכן בין ידיהם ואן נתזוג̇ אבנאתהם ונזוג̇הם בנאתנא

לכן בכ̇לה יטאבקונא אלקום עלי אן יקימו מענא ונציר אמה ואחדה באן נכ̇תתן כל רג̇ל כמא הם מכ̇תנון

ומואשיהם ובהאימהם וסאיר מלכהם אנמא הי לנא עדא אן נטאבקהם עלי הד̇א ויקימון מענא

פקבל מן חמור ומן שכם אבנה כל מן כ̇רג̇ מן באב קריתה פאכ̇תתן כל רג̇ל מנהם

פלמא כאן פי אליום אלת̇אלת̇ והם ואג̇עון אכ̇ד̇ שמעון ולוי אכ̇וא דינה כל רג̇ל סיפה פדכ̇לא עליהם והם מטמאנון פקתלא כל ד̇כר

וחמור ושכם אבנה קתלהמא בחד אלסיף ואכ̇ד̇א דינה מן בית שכם וכ̇רג̇א

ובנו יעקוב דכ̇לו עלי אלצרעי וגנמו מא פי אלקריה כמא נג̇סו אכ̇תהם

גנמהם ובקרהם וחמירהם ומא פי אלקריה ומא פי אלצ̇יעא אכ̇ד̇וה

וג̇מיע את̇את̇הא ואטפאלהם ונסאיהם סבוהא וגנמוהא וסאיר מא פי אלמנאזל

פקאל יעקוב לשמעון ולוי קד פצ̇חתמאני ואפסדתמא חאלי מע אהל אלבלד ואלכנעאניין ואלפריזיין ואנא פי רהט ד̇י אחצא פיג̇תמעון עלי ויקתלוני פאנפד אנא ואלי

קאלא אכזאניה יצנע אכ̇תנא