תפסיר רס"ג, בראשית לה

ת̇ם קאל אללה ליעקוב קם פאצעד אלי בית אל וקם ת̇ם ואצנע ת̇ם מד̇בחא ללטאיק אלמתג̇לי לך פי הרבך מן ידי עשו אכ̇יך

פקאל יעקוב לאלה ולמן מעה אנזעו מעבודאת אלגרבא אלתי פי מא בינכם ותטהרו ואבדלו ת̇יאבכם

ונקום ונצעד אלי בית אל ונצנע ת̇ם מד̇בחא ללטאיק אלמג̇יבני פי יום שדתי וכאן מעי פי אלטריק אלד̇י סלכתה

פאעטו יעקוב ג̇מיע מעבודאת אלגרבא אלתי כאנת מעהם ואלאשנפה אלתי פי אד̇אנהם פדפנהא יעקוב תחת אלבטמה אלתי ענד נאבלס

ת̇ם רחלו פכאן רעד אללה עלי אהל אלקרי אלתי חואליהם ולם יכלבו ורא בני יעקוב

חתי ג̇א יעקוב אלי לוז אלתי פי בלד כנעאן הי בית אל הו ואלקום אלד̇י מעה

ובנא ת̇ם מד̇בחא ודעי פי אלמוצ̇ע בית אל אלי אלטאיק לאן ת̇ם תג̇לא לה אללה פי הרבה מן בין ידי אכ̇יה

ת̇ם מאתת דבורה דאיה רבקה פדפנת אספל מן בית אל תחת אלמרג̇ פסמאה מרג̇ אלבכא

תם תג̇לי אללה ליעקוב איצ̇א פי מג̇ייה מן פדן ארם פבארכה

וקאל לה אסמך יעקוב לא יסמי אבדא יעקוב פקט אלא אסראיל פסמאה איצ̇א אסראיל

ת̇ם קאל אללה לה אנא אלטאיק אלכאפי אנם ואכת̇ר אמה מן בעד ג̇וק אלאמם תכון מנך ומלוך מן צלבך יכ̇רג̇ון

ואלבלד אלד̇י אעטיתה לאברהים ואסחק לך אעטיה ולנסלך מן בעדך

ת̇ם ארתפע ענה נור אללה פי אלמוצ̇ע אלד̇י כ̇אטבה

פנצב יעקוב נצבה פי אלמוצ̇ע אלד̇י כ̇אטבה אללה נצבה חג̇ארה ורש עליהא מזאג̇א וצב עליהא דהנא

וסמא יעקוב ד̇לך אלמוצ̇ע אלד̇י כ̇אטבה אללה ת̇ם בית אל

ת̇ם רחלו מן בית אל ובקי להם מיל מן אלטריק לידכ̇לו אלי אפרת פולדת רחל וצעב ולאדהא

פלמא צעב ולאדהא קאלת להא אלקאבלה לא תכ̇אפי פאן הד̇א לך אבן

פענד כ̇רוג̇ נפסהא והי מיתה אסמתה אבן תרחי ואבוה אסמאה בנימין

ת̇ם מאתת רחל ודפנת פי טריק אפרת הי בית לחם

ונצב יעקוב דכה עלי קברהא הי תסמי נצבה קבר רחל אלי אליום

ת̇ם רחל אסראיל ומד כ̇באה מן הנאך מן מגדל עדר

פלמא סכן ד̇לך אלבלד מצ̇י ראובן פצ̇אג̇ע בלהה אמה אביה פסמע אסראיל פצארו בנו יעקוב בבנימין את̇ני עשר

בנו לאה בכר יעקוב ראובן ושמעון ולוי ויהודה ויששכר וזבלון

בנו רחל יוסף ובנימין

ובנו בלהה אמה רחל דן ונפתלי

ובנו זלפה אמה לאה גד ואשר האולי בנו יעקוב אלד̇ין ולדו לה פי פדן ארם

ת̇ם ג̇א יעקוב אלי אסחק אביה ממרא קריה ארבע הי חברא אלתי סכן פיהא אברהים ואסחק

פכאן עמר אסחק מאיה סנה ות̇מאנין סנה

ת̇ם תופי אסחק ומאת ואנצ̇ם אלי קומה שיך̇ קד שבע מן אלעמר ודפנה עשו ויעקוב אבנאה