תפסיר רס"ג, בראשית לג

ת̇ם רפע יעקוב עיניה פנט̇ר פאד̇א בעשו מקבל ומעה ארבע מאיה רג̇ל פפרק אלאולאד עלי לאה ועלי רחל ועלי אלאמתין

וציר אלאמתין ואולאדהמא אולא ת̇ם לאה ואולאדהא בעדהם ת̇ם רחל ויוסף בעדהם

והו תקדמהם פסג̇ד עלי אלארץ̇ סבע מראת אלי אן דנא מן אכ̇יה

פחאצ̇ר עשו תלקאה פעאנקה ואנכב עלי ענקה פקבלה ובכיא

פרפע עיניה פנט̇ר אלנסא ואלאולאד פקאל מן הולא מנך קאל אולאדי אלד̇ין רזקהם אללה לעבדך

פתקדמתא אלאמתאן ואולאדהמא וסג̇דו

ת̇ם תקדם לאה ואולאדהא פסג̇דו ובעד ד̇לך תקדם יוסף ורחל פסג̇דא

ת̇ם קאל למא לך ג̇מיע אלעסכר אלד̇י פאג̇תה קאל לאג̇ד חט̇א ענד סידי

קאל עשו מוג̇וד לי אכת̇ר מן ד̇לך יא אכ̇י יכן לך מא לך

קאל יעקוב לא יא סידי אן וג̇דת חט̇א ענדך אקבל הדיתי מן ידי פאני קד ראית וג̇הך כנט̇ר וג̇ה אלאשראף פארץ̇ עלי

ואקבל ברכתי אלתי ג̇בת לך פאן אללה קד ראפני ומוג̇וד לי אכת̇ר מן ד̇לך פאלח עליה חתי קבלהא

ת̇ם קאל נרחל ונמץ̇ ואסיר מעך

קאל לה סידי יעלם אן אלאולאד רכ̇צה ואלגנם ואלבקר מרצ̇עאת ענדי פאן כדדתהא יומא ואחדא תמאות כת̇יר מנהא

יתקדם סידי בין ידי עבדה ואנא אסוקהם רוידא לאג̇ל אלמלך אלד̇י מעי ומן אג̇ל אלאולאד אלי אן אג̇י אלי סידי אלי אלשראה

קאל עשו אכ̇לף מעך מן אלקום אלד̇י מעי קאל למא ד̇א וג̇דת חט̇א ענד סידי

פרג̇ע עשו פי ד̇לך אליום אלי טריקה אלי אלשראה

ורחל יעקוב אלי סכות פבנא לה ביתא ולמאשיתה צנע ערשא ולד̇לך אסמי אלמוצ̇ע סכות

ת̇ם דכ̇ל יעקוב סאלמא אלי קריה נאבלס אלתי פי בלד כנעאן פי מג̇יה מן פדן ארם פנזל קבאלה אלקריה

פאבתאע חדיקה אלצ̇יעה אלתי צ̇רב ת̇ם כ̇באה מן ידי בני חמור אבי שכם במאיה נעג̇ה

ונצב ת̇ם מד̇בחא ודעא אמאמה באסם אלטאיק אלאה אסראיל