תפסיר רס"ג, בראשית לב

פאדלג̇ לבן באלגדאה פקבל בניה ובנאתה ודעי להם ת̇ם מצ̇א לבן ורג̇ע אלי מוצ̇עה

ויעקוב מצ̇א אלי טריקה ופאג̇אתה מלאיכה אללה

פקאל יעקוב למא ראהם הד̇א עסכר אללה וסמא ד̇לך אלמוצ̇ע ד̇א אלעסכרין

ת̇ם בעת̇ יעקוב ברסל בין ידיה אלי עשו אכ̇יה אלי בלד אלשראה בלד אדום

ואוצאהם קאילא כד̇א קולו לסידי לעשו כד̇א קאל עבדך יעקוב מע לבן סכנת פתאכ̇רת אלי אלאן

וצאר לי בקר וחמיר וגנם ועביד ואמא ובעת̇ת אכ̇בר סידי לאג̇ד חט̇א ענדך

פרג̇ע אלרסל אלי יעקוב קאילין צרנא אלי אכ̇יך עשו פאד̇א בה מאץ̇ תלקאך ומעה ארבע מאיה רג̇ל

פכ̇אף יעקוב ג̇דא וצ̇אק בה אלאמר פקסם אלקום אלד̇ין מעה ואלגנם ואלבקר ואלג̇מאל עלי עסכרין

קאל אן ג̇א עשו אלי אלעסכר אלואחד פאהלכה כאן אלעסכר אלבאקי פליתא

ת̇ם קאל יעקוב יא אלאה גד̇י אברהים ואלאה אבי אסחק אללה אלד̇י קאל לי ארג̇ע אלי בלדך ואלי מולדך ואחסן אליך

אנא אקל מן אסתחקאק ג̇מיע אלפצ̇ל ואלאחסאן אלד̇י צנעתה מע עבדך לאני בעצאי עברת הד̇א אלארדן ואלאן פקד צאר לי עסכראן

פכ̇לצני מן יד אכ̇י מן יד עשו פאנני אכ̇אפה כילא יאתי פיקתלני אלאם מע אלבנין קסאוה

ואנת קלת אני אחסן אליך ואציר נסלך כרמל אלבחר אלד̇י לא יחצא מן כת̇רה

ת̇ם באת ת̇ם תלך אללילה ועזל ממא ג̇א בה מעה הדיה לעשו אכ̇יה

מאיתי ענז עשרין תיסא ומאיתי רכ̇לה עשרין כבשא

ת̇לת̇ין נאקה מרצ̇עה מע אולאדהא ארבעין בקרה עשרה ת̇יראן עשרין אתאנא עשרה ג̇חאש

ואעטי ד̇לך ביד עבידה קטיעא קטיעא עלי חדה וקאל להם תקדמוני וצירו פרג̇ה בין קטיע וקטיע

ואמר אלאול קאילא אן פאג̇אך עשו אכ̇י וסאלך קאילא למן אנת ואלי אין תמצ̇י ולמן הד̇א אלד̇י בין ידיך

פקל לעבדך ליעקוב הי הדיה מבעות̇ה לסידי עשו והוד̇א הו איצ̇א וראנא

ואמר אלת̇אני ואיצ̇א אלת̇אלת̇ ואיצ̇א סאיר אלמאצ̇יין מע אלקטוע קאילא מת̇ל הד̇א אלקול תקולון לעשו אד̇א ואפיתמוה

וקולו איצ̇א הוד̇א עבדך יעקוב וראנא לאנה קאל אתרצ̇אה אולא באלהדיה אלמתקדמה בין ידי ובעד ד̇לך אנט̇ר אלי וג̇הה לעלה ישפעני

פתקדמת אלהדיה בין ידיה ובאת הו תלך אללילה פי אלעסכר

וקאם תלך אללילה פאכ̇ד̇ זוג̇תיה ואמתיה ואחד עשר אבנא לה פעבר מעבר יבק

ת̇ם אכ̇ד̇הם פעבר בהם אלואדי ועבר בג̇מיע מא לה

ובקי יעקוב פי ד̇לך אלג̇אנב וחדה פצארעה אלמלאך אלי מטלע אלפג̇ר

פלמא ראי אנה לם יטקה דנא מן חק ורכה פזאל חק ורך יעקוב פי מצארעתה מעה

ולמא טלע אלפג̇ר קאל לה אטלקני קאל לא אטלקך דון אן תבארכני

קאל לה מה אסמך קאל יעקוב

קאל לא יסמי אסמך אבדא יעקוב פקט אלא אסראיל לאנך תראסת ענד אללה וענד אלנאס וטקת ד̇לך

ת̇ם סאלה יעקוב פקאל לה אכ̇ברני אסמך קאל ומא סואלך ען אסמי ולמא בארכה ת̇ם

סמי יעקוב אלמוצ̇ע פניאל קאילא אני ראית מלאך אללה מואג̇הה ותכ̇לצת נפסי

פלמא עבר פניאל אשרקת לה אלשמס וכאן יט̇לע מן ורכה

ולד̇לך לא יאכלו בנו אסראיל ערק אלנסא אלד̇י מע חק אלורך אלי הד̇א אליום למא דנא מן חק ורך יעקוב בערק אלנסא