תפסיר רס"ג, בראשית לא

וסמע כלאם בני לבן יקולון קד אכ̇ד̇ יעקוב מא לאבינא ומן מאלה אצטנע ג̇מיע הד̇א אליסאר

וראי יעקוב איצ̇א וג̇ה לבן פאד̇א ליס הו מעה מת̇ל אמס ומא קבלה

וקאל אללה לה ארג̇ע אלי ארץ̇ אבאיך ומולדך אכן מעך

פבעת̇ יעקוב ודעא ברחל ולאה אלי אלצחרא אלי גנמה

פקאל להן הוד̇א ארא וג̇ה אביכן ליס הו מעי מת̇ל אמס ומא קבלה ואלאה אבי לם יזל מעי

ואנתן תערפן אני כ̇דמתה בג̇מיע קותי

ואבוכן סכ̇ר בי ובדל אג̇רתי עשרה אעדאד ולם ידעה אללה אן יסי בי

אן קאל כד̇א יכון אג̇רך מנקטה ולד ג̇מיע אלגנם כד̇אך ואן קאל מחג̇לה ולד ג̇מיע אלגנם כד̇אך

פאפאד אללה מן גנם אביכן ואעטאני

ולמא כאן וקת וחאם אלגנם רפעת עיני פראית פי אלמנאם פכאן אלתיוס אלצאעדה עלי אלגנם מחג̇לה ומנקטה וכ̇לנג̇יה

ת̇ם קאל לי מלאך אללה פי אלחלם יא יעקוב פקלת לביך

קאל ארפע עיניך ואנט̇ר ג̇מיע אלתיוס אלצאעדה עלי אלגנם מחג̇לה ומנקטה וכ̇לנג̇יה פאני קד ראית ג̇מיע מא לבן צאנע לך

אנא אלטאיק אלמבשרך פי בית אל אלד̇י מסחת ת̇ם אלנצבה ונד̇רת לי ת̇ם אלנד̇ר ואלאן קם פאכ̇רג̇ מן הד̇א אלבלד וארג̇ע אלי בלד מולדך

פאג̇בתא רחל ולאה וקאלתא לה הל בקי לנא נציב או נחלה פי בית אבינא

אלא אן כאלגרבא חסבנא ענדה וכאנה באענא ואכל ת̇מננא

אמא ג̇מיע אלגנא אלד̇י אפאדה אללה מן קבל אבינא הו לנא ולבנינא ואלאן ג̇מיע מא קאל אללה לך אצנעה

פקאם יעקוב וחמל בניה ונסאה עלי אלג̇מל

וסאק ג̇מיע מאשיתה וג̇מיע סרחה אלד̇י מלכה ומע מאשיתה סאיר מלכה אלד̇י מלכה פי פדן ארם ליג̇י אלי אסחק אביה אלי בלד כנעאן

וכאן לבן קד מצ̇א ליג̇ז גנמה פאכ̇פת רחל אלתמת̇אל אלד̇י לאביהא

וכתם יעקוב סרה ען לבן אלארמני אד̇ לם יכ̇ברה באנה מנצרף

פאנצרף הו וג̇מיע מאלה וקאם ועבר אלפראת וג̇על קצדה ג̇בל ג̇רש

פאכ̇בר לבן פי אליום אלת̇אלת̇ אן אנצרף יעקוב

פאכ̇ד̇ אצחאבה מעה וכלבה מסיר סבעה איאם ולחקה פי ג̇בל ג̇רש

פג̇א מלאך אללה אלי לבן אלארמני פי חלם אלליל וקאל לה אחד̇ר לך אן תכלם יעקוב מן כ̇יר אלי שר

ת̇ם לחק לבן יעקוב וכאן יעקוב קד צ̇רב כ̇באה פי אלג̇בל ולבן אנזל אכ̇ותה פי ג̇בל ג̇רש

פקאל לבן ליעקוב מא ד̇א צנעת אד̇ כתמתני וסקת בנאתי כאלסביאת באלסיף

ולם אכ̇תפית פאנצרפת וכתמתני ולם תכ̇ברני פכנת אשיעך בפרח וגנא ודפוף וטנאביר

ולם תדעני אן אקבל בני ובנאתי אלאן קד ג̇הלת פי מא צנעת

ומוג̇וד טאקה פי ידי אן אצנע בכם שרא לולא אן אלאה אביכם אלבארחה קאל לי אחד̇ר לך אן תכלם ליעקוב מן כ̇יר אלי שר

ואלאן מצ̇ית מצ̇יא אד̇ אשתקת אלי בית אביך פלם סרקת מעבודי

פאג̇אב יעקוב וקאל ללבן לאני תכ̇ופת וקלת כילא תגצבני עלי בנאתך

וענד מן יוג̇ד מעבודך לא יחיי חד̇א אצחאבנא את̇בת מא לך ענדי וכ̇ד̇ה ולם יעלם יעקוב אן רחל אכ̇פתה

פדכ̇ל לבן כ̇בא יעקוב וכ̇בא לאה וכ̇בא אלאמתין ולם יג̇ד שיא ת̇ם כ̇רג̇ מן כ̇בא לאה פדכ̇ל אלי כ̇בא רחל

ורחל קד אכ̇ד̇ת אלתמת̇אל וצירתה פי קתב אלג̇מל וג̇לסת פוקה פג̇סס לבן ג̇מיע אלכ̇בא ולם יג̇ד שיא

פקאלת לה לא ישתד עלי סידי פאני לא אטיק אן אקום מן בין ידיך אד̇ סביל אלנסא קד ערץ̇ לי פפתש ולם יג̇ד אלתמת̇אל

פאשתד ד̇לך עלי יעקוב וכ̇אצם לבן ואג̇אבה וקאל לה מא ג̇רמי ומא כ̇טאי אד̇ רהקתני

וקד ג̇ססת ג̇מיע אניתי מא וג̇דת מן ג̇מיע אניה ביתך צירה ההנא חד̇א אצחאבי ואצחאבך ויובכ̇ונא בה עלי אלבדל

הד̇א לי עשרון סנה מעך רכ̇אלך וענוזך לם תת̇כל ומן כבאש גנמך לם אכל

ופריסה לס אדפע אליך ומא אסתהלכתהא מן ידי תטלבהא כדדת נהארא ולילא

וכנת פי אלנהאר תחרקני אלסמום ואלג̇ליד פי אלליל ונפר נומי ען עיני

הד̇א לי עשרון סנה פי מנזלך כ̇דמתך מנהא ארבע עשרה סנה בבנתיך וסת סנין פי גנמך פבדלת אג̇רתי עשרה אעדאד

לולא אלאה אבי אברהים ופזע אסחק כאן לי עונא לקד כנת אטלקתני פארגא לצ̇עפי ולתעב כפי נט̇ר אללה וובכ̇ך אלבארחה

פאג̇אבה לבן וקאל אלאולאד אולאדי ואלבנאת בנאתי ואלגנם גנמי וג̇מיע מה תראה פהו לי פמא עסי אן אצנע אליום בבנאתי או באולאדהן אלד̇ין ולדן

ואלאן תעאל נעהד עהדא אנא ואנת יכון שאהדא ביני ובינך

פאכ̇ד̇ יעקוב חג̇רא ורפעה נצבה

ת̇ם קאל יעקוב לאצחאבה אג̇מעו חג̇ארה פג̇מעו חג̇ארה ונצבוהא רג̇מא ואכלו ת̇ם טעאמא פוקהא

וסמאה לבן רג̇ם אלשהאדה ויעקוב סמאה באלעבראניה גלעד

וקאל לה לבן הד̇א אלרג̇ם שאהד ביני ובינך אליום ולד̇לך סמאה אלרג̇ם אלשאהד

וסמא אלחג̇ר אלמטלע אד̇ קאל יטלע אללה ביני ובינך פאנא ננסתר כל אמר מן צאחבה

אלא תעד̇ב בנאתי ולא תתכ̇ד̇ עליהן נסאא ליס מענא אנסאן גריב אנט̇ר אללה שאהד ביני ובינך

וקאל לבן ליעקוב הד̇א אלרג̇ם והד̇ה אלנצבה אלתי סדות בהא ביני ובינך

הד̇א אלרג̇ם שאהד ואלנצבה שאהדה עלי אלא אג̇וזהמא אליך ועליך אלא תג̇וזהמא אלי לשר

אלאה אברהים ואלאה נחור יחכם פי מא ביננא הו אלאה אביהמא וחלף יעקוב בפזע אביה אסחק

ת̇ם ד̇בח יעקוב ד̇בחא פי אלג̇בל ודעי באצחאבה אן יאכלו טעאמא פאכלו טעאמא ובאתו פי אלג̇בל