תפסיר רס"ג, בראשית ל

ולמא ראת רחל אנהא לם תלד ליעקוב חסדת אכ̇תהא וקאלת לה אסתרזק לי ולדא ואלא פאנא מיתה

פאשתד גצ̇בה עליהא וקאל אמן דון אללה אנא אלד̇י מנעך ת̇מר אלבטן

קאלת הוד̇א אמתי בלהה אדכ̇ל אליהא תלד פי חג̇רי ויבני ביתי אנא איצ̇א מנהא

פאעטתה בלהה אמתהא לה זוג̇ה פדכ̇ל עליהא

פחמלת וולדת לה אבנא

פקאלת רחל קד חכם אללה לי ואיצ̇א סמע צותי פרזקני הד̇א ואסמתה דן

וחמלת איצ̇א בלהה אמה רחל וולדת אבנא ת̇אניא ליעקוב

פקאלת רחל עטפה מן ענד אללה אנעטפת מע אכ̇תי וטקת ד̇לך פאסמתה נפתלי

ולמא ראת לאה איצ̇א אנהא קד וקפת ען אלולאדה אכ̇ד̇ת זלפה אמתהא ואעטתהא ליעקוב זוג̇ה

פולדת לה אבנא

פקאלת לאה קד צח אלכ̇בר ואסמתה גד

וולדת לה זלפה אמה לאה אבנא ת̇אניא

פקאלת לאה בוצפי אן יצפני אלנסא פאסמתה אשר

ת̇ם מצ̇א ראובן פי איאם חצאד אלחנטה פוג̇ד לפאחא פי אלצחרא פאתי בהא אלי לאה אמה פקאלת להא רחל אעטיני מנהא

קאלת להא אמא כפאך אן אכ̇ד̇ת זוג̇י חתי תאכ̇ד̇י לפאח אבני איצ̇א קאלת רחל לכנה ינאם ענדך אללילה בדל ד̇לך

פלמא ג̇א יעקוב מן אלצחרא פי אלעשא כ̇רג̇ת לאה תלקאה פקאלת אדכ̇ל אלי לאני אסתחקקתך בלפאח אבני פנאם ענדהא תלך אללילה

פסמע אללה לאה פחמלת וולדת לה אבנא כ̇אמסא

וקאלת לאה קד אעטאני אללה אג̇רי כמא זוג̇ת אמתי לרג̇לי פאסמתה יששכר

פחמלת וולדת לה אבנא סאדסא

קאלת קד פוצ̇ני אללה תפויץ̇ כ̇יר והד̇ה אלמרה יסאכנני רג̇לי אד̇ ולדת לה סתה בנין פאסמתה זבולון

ובעד ד̇לך ולדת אבנה פאסמתהא דינה

ת̇ם ד̇כר אללה רחל וסמע להא פרזקהא ולדא

פחמלת וולדת אבנא וקאלת קד צ̇ם אללה עני אלעאר

ואסמתה יוסף קאילה יזידני אללה אבנא אכ̇ר

פלמא ולדת רחל יוסף קאל יעקוב ללבן אטלקני אמץ̇ אלי מוצ̇עי ובלדי

ואעטני נסאי ואולאדי אלד̇ין כ̇דמתך בהם חתי אמצ̇י פאנך תעלם כ̇דמתי אלתי כ̇דמתך

קאל לה לבן אן וג̇דת חט̇א ענדך קד ג̇רבתך פבארכני אללה בג̇רירתך

וקאל בין לי אג̇רתך חתי אעטיך

קאל לה אנת תעלם כיף כ̇דמתך וכיף כאנת מאשיתך ענדי

פאנהא כאנת קלילה ונמת כת̇רה ובארך אללה לך בסבבי ואלאן מתי אצנע אנא איצ̇א לביתי

קאל מא ד̇א אעטיך קאל יעקוב לא תעטיני שיא לכן אצנע בי הד̇א אלאמר בה ארג̇ע ארעא גנמך ואחפט̇הא

אן אמר אליום פי גנמך ואעזל מנהא כל שא מנקט ואבלק וכל שא חמא פי אלצ̇אן ואבלק ומנקט פי אלמאעז ויכון ד̇לך אג̇רתי

פישהד לי עדלי גדא אד̇א חצ̇רת אן אטלב אג̇רתי בין ידיך באן כל מא ליס הו מנקט ואבלק מן אלמאעז וחמא מן אלצ̇אן איצ̇א פהו מסרוק ענדי

קאל לבן נעם לית יכון כמא קלת

פעזל פי ד̇לך אליום אלתיוס אלמחג̇לה ואלבלק וג̇מיע אלענוז אלמנקטה ואלבלק כל מא פיה ביאץ̇ וכל חמא מן אלצ̇אן איצ̇א ודפע ד̇לך ביד בניה

וציר מסיר ת̇לת̇ה איאם בינה ובין יעקוב ורעא יעקוב גנם לבן אלבאקיה

ת̇ם אכ̇ד̇ יעקוב עצי לבנא רטב וחור ודלב וקשרהא אלקשר אלאביץ̇ חתי קשט אלביאץ̇ אלד̇י עליהא

ווצ̇ע אלעצי אלתי קשרהא פי אלאחואץ̇ מסאקי אלמא חתי תג̇י אלגנם לתשרב חיאלהא פתתיחם פיהא ענד ד̇לך

פאד̇א תוחמת באלעצי ולדת מחג̇לה ומנקטה ובלקא

ולמא אפרד יעקוב אלצ̇אן ג̇על פי אול אלגנם כל מחג̇ל וחמא פי צ̇אן לבן וג̇על לה קטועא וחדהא ולם יצ̇פהא אלי גנם לבן

וכאן יעקוב פי כל וקת וחאם אלגנם אלרביעיה יציר אלעצי חד̇אהא פי אלאחואץ̇ לתתוחם עליהא

ואד̇א כ̇רפת לא יציר ד̇לך פתציר אלכ̇ריפיה ללבן ואלרביעיה ליעקוב

פאנמי אלרג̇ל ג̇דא ג̇דא וצאר לה גנם כת̇יר ואמא ועביד וג̇מאל וחמיר