תפסיר רס"ג, בראשית כז

ת̇ם למא שאך̇ אסחק קאמתא עינאה מן אן ינט̇ר פדעא בעשו אבנה אלאכבר פקאל לה יא בני קאל לביך

קאל הוד̇א קד שכ̇ת ולם אעלם יום מותי

ואלאן אחמל אלתך סלאחך וקוסך ואכ̇רג̇ אלי אלצחרא וצד לי צידא

ואצלחה לי אלואנא כמא אחב ואתני בה אכל מנה לכי תבארכך נפסי קבל אן אמות

פסמעת רבקה חין כלם יצחק בד̇לך עשו אבנה פלמא מצ̇א עשו אלי אלצחרא ליצוד צידא יאתי בה

קאלת ליעקוב אבנהא קד סמעת אבאך יכלם עשו אכ̇אך קאילא

אתני בציד ואצלחה לי אלואנא אכל מנה חתי אבארכך בין ידי אללה קבל מותי

ואלאן יא בני אקבל מני מא אמרך בה

אמץ̇ אלי אלגנם וכ̇ד̇ לי מנהא ג̇דיין מן אלמאעז ג̇ידין אצלחהמא אלואנא לאביך כמא יחב

פתדכ̇להמא אלי אביך ויאכל מנהא לכי יבארכך קבל מותה

קאל להא הוד̇א עשו אכ̇י רג̇ל שער ואנא רג̇ל אג̇רד

לעל יג̇סני אבי פאכון ענדה כאללאעב בה פאג̇לב עלי נפסי לענה ולא ברכה

קאלת לה אמה עלי אסתדפאע לענתך יא בני לכן אקבל מני ואמץ̇ וכ̇ד̇ לי ד̇לך

פמצ̇א ואכ̇ד̇ ואתי בה אלי אמה פאצלחת אמה אלואנא כמא אחב אבוה

ת̇ם אכ̇ד̇ת רבקה ת̇יאב עשו אבנהא אלאכבר אלפאכ̇רה אלתי מעהא פי אלבית פאלבסתהא יעקוב אבנהא אלאצגר

וג̇לוד אלג̇דיין אלבסתהא עלי ידיה ועלי מלוסה חלקה

ואעטתה אלאלואן מע אלכ̇בז אלד̇י צנעתה

פדכ̇ל אלי אביה וקאל יא אבי קאל לביך מן אנת יא בני

קאל יעקוב לאביה אנא עשו בכרך צנעת כמא אמרתני קם פאג̇לס וכל מן צידי לכי תבארכני נפסך

קאל מא ד̇א אסרעת אלוג̇וד יא בני קאל לאן אללה רבך ופק בין ידי

קאל אסחק תקדם חתי אג̇סך יא בני הל אנת אבני עשו אם לא

פתקדם יעקוב לאסחק פג̇סה וקאל אלצות צות יעקוב ואלידאן ידא עשו

ולם ית̇בתה אד̇ כאנתא ידאה כידי עשו שעראניתין פבארכה

בל קאל לה אנת אבני עשו קאל אנא הו

קאל קדם לי חתי אכל מן צידך לכי תבארכך נפסי פקדם לה פאכל ואתאה בכ̇מר פשרב

ת̇ם קאל לה תקדם קבלני יא בני

פתקדם וקבלה ושם ראיחה ת̇יאבה פבארכה וקאל אנט̇ר ראיחה אבני כראיחה רוצ̇ה קד בארכהא אללה

יעטך אללה מן טל אלסמא ודסם אלארץ̇ וכ̇תרה אלבר ואלעציר

ויכ̇דמוך אלאמם ותכ̇צ̇ע לך אלאחזאב וכן מולא עלי אכ̇ותך ויכ̇צ̇ע לך בנו אמך לאענך מלעון ומבארכך מבארך

פלמא פרג אסחק מן תבריך יעקוב כאן כמא כ̇רג̇ מן בין ידיה אד̇ אקבל עשו אכ̇וה מן צידה

וצנע הו איצ̇א אלואנא אתא בהא אלי אביה פקאל לה יקם אבי ויאכל מן ציד אבנה לקבל אן תבארכני נפסך

קאל לה מן אנת קאל אנא אבנך בכרך עשו

פזעג̇ אסחק זעג̇ה עט̇ימה ג̇דא וקאל פמן ד̇אך אלד̇י צאד צידא פאתאני בה ואכלת מנה קבל אן תג̇י פבארכתה וליכן איצ̇א מבארכא

ולמא סמע עשו כלאם אביה צרך̇ צרכ̇ה עט̇ימה מרה ג̇דא וקאל לאביה בארכני אנא איצ̇א יא אבת

קאל ג̇א אכ̇וך במכר ואכ̇ד̇ ברכתך

קאל נעמא אסמי יעקוב לאנה תעקבני מרתין אולא אכ̇ד̇ בכורתי ואלאן אכ̇ד̇ ברכתי ת̇ם קאל אלא אבקית לי ברכה

אג̇אב אסחק פקאל הוד̇א קד צירתה מולאך וג̇מיע אכ̇ותה ג̇עלתהם לה עבידא ואלבר ואלעציר אסנדתה אלאן מא ד̇א אצנע יא ולדי

קאל עשו אברכה ואחדה הי לך יא אבת בארכני אנא איצ̇א ורפע צותה ובכי

פאג̇אבה וקאל הוד̇א מן דסם אלארץ̇ סיכון מסכנך ומן טל אלסמא מן עלו

ועלי סיפך תחיי ואכ̇אך תכ̇דם פיכון אד̇א אסתולית פככת אצרה ען ענקך

וחקד עשו עלי יעקוב בסבב אלברכה אלד̇י בארכה אבוה וקאל עשו פי נפסה סתקרב איאם חזן אבי ואקתל יעקוב אכ̇י

פאכ̇ברת רבקה בכלאם עשו אבנהא אלאכבר פבעת̇ת ודעת ביעקוב אבנהא אלאצגר וקאלת לה הוד̇א עשו אכ̇וך מתואעדך ליקתלך

ואלאן יא בני אקבל מני וקם פאמץ̇ אלי לבן אכ̇י אלי חרן

וקם ענדה איאמא יסירה אלי אן תרג̇ע חמיה אכ̇יך

אלי אן ירג̇ע גצ̇בה ענך פינסי מא צנעת בה פאבעת̇ אכ̇ד̇ך מן ת̇ם לילא את̇כלכמא ג̇מיעא פי יום ואחד

ת̇ם קאלת רבקה לאסחק צ̇ג̇רת פי חיותי מן קבל בנאת חת פאן תזוג̇ יעקוב במראה מנהן מת̇ל האולי או מן בנאת סאיר אהל הד̇א אלבלד פלמא ד̇א לי חיוה