תפסיר רס"ג, בראשית כח

פדעא אסחק ביעקוב ובארכה ואוצאה וקאל לה לא תתכ̇ד̇ זוג̇ה מן בנאת כנעאן

פאמץ̇ אלי פדן ארם בית בתואל ג̇דך ותזוג̇ מן ת̇ם במראה מן בנאת לבן כ̇אלך

ואלטאיק אלכאפי יבארך עליך וינמיך ויכת̇רך ויכון מנך ג̇וק אמם

ויעטיך ברכה אברהים לך ולנסלך בעדך אן תחוז בלד סכנאך אלד̇י אעטאה אללה לאברהים

וארסל ביעקוב פמצ̇י אלי פדן ארם אלי לבן בן בתואל אלארמני אכ̇י רבקה אם יעקוב ועשו

פעלם עשו אן אסחק קד בארך יעקוב ובעת̇ בה אלי פדן ארם לית̇כ̇ד̇ לה מן ת̇ם זוג̇ה ואד̇ בארכה ואמרה וקאל לה לא תתזוג̇ במראה מן בנאת אלכנעאניין

וקבל יעקוב מן אביה ואמה ומצ̇א אלי פדן ארם

ולמא ראי עשו אן בנאת כנעאן אשראר ענד אסחק אביה

מצ̇א עשו אלי אסמעיל פתזוג̇ במחלת אבנה אסמעיל בן אברהים אכ̇ת נביות לתכון לה זוג̇ה מע נסאיה

ת̇ם כ̇רג̇ יעקוב מן ביר סבע לימצ̇י אלי חראן

פואפי אלי מוצ̇ע אלכ̇אץ ובאת ת̇ם אד̇ גאבת אלשמס ואכ̇ד̇ מן חג̇אר אלמוצ̇ע פצירהא מתוסדה ונאם פיה

פראי חלמא כאן סלמא מנתצבא עלי אלארץ̇ וראסה מדאן אלסמא ומלאיכה אללה תצעד ותנזל פיה

ואד̇א בנור אללה ואקף אמאמה פקאל לה אנא אללה אלאה אברהים אביך ואלאה אסחק אלארץ̇ אלתי אנת נאים עליהא לך אעטיהא ולנסלך

ויכון נסלך כתראב אלארץ̇ ותנמו גרבא ושרקא ושמאלא וג̇נובא ויתבארך בך ג̇מיע עשאיר אלארץ̇ ובנסלך

והאנא מעך אחפט̇ך אינמא סלכת וארדך אלי הד̇א אלבלד ולא אתרכך אלי אן אפי לך במא ועדתך

פאסתיקט̇ יעקוב מן נומה וקאל איקינא נור אללה פי הד̇א אלמוצ̇ע ואנא לם אעלם

פכ̇אף וקאל מא אכ̇וף הד̇א אלמוצ̇ע ומא הד̇א אלא בית אללה והד̇א באב אלסמא

ת̇ם אדלג̇ יעקוב באלגדאה פאכ̇ד̇ אלחג̇ר אלד̇י ג̇עלה מתוסדה ואנצבה דכה וצב דהנא עלי ראסה

וסמא ד̇לך אלמוצ̇ע בית אל ואנמא אסם אלקריה אולא לוז

ת̇ם נד̇ר יעקוב נד̇רא קאילא אן כאן אללה מעי וחפט̇ני פי הד̇א אלטריק אלד̇י אנא סאלכה ורזקני כ̇בזא אכלה ות̇ובא אלבסה

וארג̇ע סאלמא אלי בית אבי וכאן אללה לי וליא

פאן הד̇א אלחג̇ר אלד̇י ג̇עלתה דכה יכון לי בית אללה וג̇מיע מא תרזקני עשרא אעשרה לך