תפסיר רס"ג, בראשית כו

ת̇ם כאן ג̇וע פי אלבלד סוי אלג̇וע אלאול אלד̇י כאן עלי עהד אברהים ומצ̇א אסחק אלי אבימלך מלך פלסטין אלי אלכ̇לוץ

פתג̇לא לה אללה פקאל לא תנזל אלי מצר אקם פי אלבלד אלד̇י אקול לך

ובאלעאג̇ל אסכן הד̇א אלבלד ואכון מעך ואבארך עליך פאני לך ולנסלך אעטי הד̇ה אלבלדאן ואפי באלקסם אלד̇י אקסמת לאברהים אביך

ואכת̇ר נסלך ככואכב אלסמא ואעטיהם ג̇מיע הד̇ה אלבלדאן ויתבארך בהם ג̇מיע אמם אלארץ̇

ג̇זא מא קבל אברהים קולי וחפט̇ מא אסתחפט̇תה מן רסומי ווצאיאי ושראיעי

פאקאם אסחק פי אלכ̇לוץ

ת̇ם סאלה אהל אלמוצ̇ע ען זוג̇תה פקאל הי אכ̇תי לאנה תכ̇וף אן יקול הי זוג̇תי קאילא כילא יקתלני אהל אלבלד עליהא אד̇ הי חסנה אלמנט̇ר

פלמא טאלת לה איאם מקאמה ת̇ם אטלע אבימלך מלך פלסטין מן כוה לה פנט̇ר פאד̇א אסחק ילאעב רבקה זוג̇תה

פדעא בה וקאל אד̇ הי זוג̇תך לם קלת הי אכ̇תי קאל אני תכ̇ופת אן אקתל בסבבהא

קאל אבימלך מא ד̇א צנעת בנא ען קליל לו צ̇אג̇ע אחד קומנא זוג̇תך לג̇לבת עלינא את̇מא

פנאדי פי ג̇מיע אלקום קאילא מן אד̇א הד̇א אלרג̇ל או זוג̇תה פליקתל קתלא

ת̇ם זרע אסחק פי תלך אלארץ̇ פוג̇ד פי תלך אלסנה מאיה באלחזר ובארך אללה לה

פכת̇ר אלרג̇ל וכאן כל מא מר כת̇ר אלי אן עט̇ם ג̇דא

פצארת לה מאשיה גנם ובקר וחשם כת̇יר חתי חסדוה אלפלסטיניון

וג̇מיע אלאבאר אלתי חפרהא עביד אביה עלי עהד אברהים אביה כאן קד סדהא אלפלסטיניון ומלוהא תראבא

ת̇ם קאל אבימלך לאסחק אמץ̇ מן ענדנא פאנך קד עט̇מת מנא ג̇דא

פמצ̇א אסחק מן ת̇ם ונזל פי ואדי אלכ̇לוץ ואקאם ת̇ם

ת̇ם עאד פחפר אבאר אלמא אלתי כאנת חפרת פי איאם אברהים אביה וסדהא אלפלסטיניון בעד מותה וסמאהא באסמא כמא סמאהא אברהים אבוה

ולמא חפרו עביד אסחק פי אלואדי וג̇דו ת̇ם ביר מא נאבע

פכ̇אצם רעאה אלכ̇לוץ מע רעאה אסחק קאילין לנא אלמא פסמי אלביר שגלא למא אשתגלו מעה

וחפרו בירא אכ̇רי פכ̇אצמוה עליהא פסמאהא ד̇את אלענאד

ת̇ם אנתקל מן ת̇ם וחפר בירא אכ̇רי ולם יכ̇אצמוה עליהא פסמאהא ד̇את אלסעה וקאל אלאן יוסע אללה לנא וינמינא פי אלבלאד

ת̇ם צעד מן ת̇ם אלי ביר סבע

ותג̇לא לה אללה פי תלך אללילה וקאל אנא אלאה אברהים אביך לא תכ̇ף פאני מעך אבארך עליך ואכת̇ר נסלך בסבב אברהים עבדי

ובנא ת̇ם מד̇בחא ודעא באסם אללה ומד ת̇ם כ̇באה וכרו ת̇ם עביד אסחק בירא

ואבימלך צאר אליה מן אלכ̇לוץ ואחזת נדימה ופיכל רייס ג̇ישה

פקאל להם אסחק מא באלכם ג̇יתם אלי ואנתם שניתמוני וטרדתמוני מן ענדכם

קאל אנא ראינא אן אללה מעך פקלנא יכון אלאן חרג̇ ביננא ובינך ונעאהדך עהדא

אלא תצנע בנא שרא כמא לם נוד̇ך וכמא צנענא מעך כ̇ירא מחצ̇א ואטלקנאך בסלאם פאנת אלאן מבארך אללה

פצנע להם מג̇לסא אכלו פיה ושרבו

ואדלג̇ו באלגדאה פחלף כל אמר לאכ̇יה פאטלקהם אסחק ומצ̇ו מן ענדה בסלאם

ולמא כאן פי ד̇לך אליום ג̇או עביד אסחק פאכ̇ברוה בסבב אלביר אלד̇י חפרוה וקאלו לה קד וג̇דנא מאא

פסמאהא סבעה ולד̇לך אסם אלקריה ביר סבע אלי הד̇א אליום

ולמא כאן עשו אבן ארבעין סנה תזוג̇ באמראה אסמהא יהודית בנת בארי אלחתי ובשמת בנת אלון אלחתי

פכאנתא מכ̇אלפתי ראי אסחק ורבקה