תפסיר רס"ג, שמות ו

קאל אללה למוסי אלאן תנט̇ר מא אצנע לפרעון אנה סיטלקהם ביד שדידה ויטרדהם מן בלדה ביד שדידה

ת̇ם כלם אללה מוסי וקאל לה אנא אללה

אלד̇י תג̇לית לאברהים ואסחק ויעקוב באלטאיק אלכאפי ואסמי אללה פקט לם אערפהם

ואיצ̇א ת̇בת עהדי מעהם לאעטיהם בלד כנעאן בלד סכנאהם אלד̇י סכנוה

ואיצ̇א אני קד סמעת שהיק בני אסראיל ממא אלמצריון יסתכ̇דמונהם פד̇כרת עהדי

לד̇לך קל לבני אסראיל אנא אללה לאכ̇רג̇כם מן נקל אלמצריין ואכ̇לצכם מן כ̇דמתהם ואפככם בד̇ראע ממדודה ובאחכאם עט̇ימה

ואתכ̇ד̇כם לי אמה ואכון לכם אלאהא ותעלמון אנני אללה רבכם אלמכ̇רג̇כם מן נקל אלמצריין

ואדכ̇לכם אלי אלבלד אלד̇י אקסמת באמרי אן אעטיה לאברהים ואסחק ויעקוב פאעטיה לכם חוזא אנא אללה אפי בד̇לך

פכלם מוסי בד̇לך בני אסראיל ולם יקבלו מנה מן צ̇יק ארואחהם ומן כ̇דמתהם אלצעבה

ת̇ם כלם אללה מוסי תכלימא

אדכ̇ל כלם פרעון מלך מצר פי אן יטלק בני אסראיל מן בלדה

וכלם מוסי בין ידי אללה קאילא הוד̇א בנו אסראיל לם יקבלו מני פכיף יסמע מני פרעון ואנא אלת̇ג אלפם

פכלם אללה מוסי והרון ווצאהמא בסבב בני אסראיל ופרעון מלך מצר אן יכ̇רג̇א בני אסראיל מן בלד מצר

האולי רוסא ביות אבאיהם בנו ראובן בכר אסראיל חנוך ופלוא חצרן וכרמי האולי עשאיר ראובן

ובנו שמעון ימואל וימין ואהד ויכין וצחר ושאול אבן אלכנעאניה האולי עשאיר שמעון

והד̇ה אסמא בני לוי עלי תאלידהם גרשון וקהת ומררי וסנו חיוה לוי מיאה וסבע ות̇לת̇ון סנה

ובנו גרשון לבני ושמעי לעשאירהם

ובנו קהת עמרם ויצהר וחברון ועזיאל וסנו חיותה מיאה ות̇לת̇ ות̇לת̇ון סנה

ובנו מררי מחלי ומושי האולי עשאיר אלליואניין עלי תאלידהם

פתזוג̇ עמרם ביוכבד עמתה קבל אן תחט̇ר פולדת לה הרון ומוסי וכאן סנו חיותה מיאה וסבע ות̇לת̇ין סנה

ובנו יצהר קרח ונפג וזכרי

ובנו עזיאל מישאל ואלצפן וסתרי

פתזוג̇ הרון באלישבע בנת עמינדב אכ̇ת נחשון פולדת לה נדב ואביהוא ואלעזר ואיתמר

ובנו קרח אסיר ואלקנה ואביאסף הד̇ה עשאיר אלקרחיין

ואלעזר אבן הרון תזוג̇ במראה מן בנאת פוטיאל פולדת לה פינחס האולי רוסא אבא אלליואניין לעשאירהם

המא הרון ומוסי אללד̇אן קאל להמא אללה אכ̇רג̇א בני אסראיל מן בלד מצר עלי ג̇יושהם

המא אלמכ̇אטבאן פרעון מלך מצר ליכ̇רג̇א בני אסראיל מן בלד מצר המא מוסי והרון

ולמא כאן יום כ̇אטב אללה מוסי פי בלד מצר

וקאל אללה למוסי קאילא אנא אללה כלם פרעון מלך מצר בג̇מיע מא אמרך בה

וקאל מוסי בין ידי אללה הוד̇א אנא אלתיג אלפם וכיף יסמע מני פרעון